ಗುರುನಾಥ ಗಾನಾಮೃತ 

ಹೇಳಿದ ಗುರುನಾಥ ಕೇಳಿದ ಗುರುನಾಥ

ರಚನೆ: ಅಂಬಾಸುತ 

ಹೇಳಿದ ಗುರುನಾಥ ಕೇಳಿದ ಗುರುನಾಥ

ಕಾಲ ಕಳೆದೇಯಲ್ಲ ಏನ ನೀ ಕಂಡೆ ಎಂದು ||ಪ||

ಯಾರಿಗೆ ಸುಖವಿತ್ತೆ ಯಾರಿಂದ ಸುಖ ಕಿತ್ತೆ

ಯಾರ ಮಾತಿಗೆ ನೀ ಮಾತ ಸೇರಿಸಿದೆ

ನಾನರಿತೆ ನಿನ್ನನು ಎನ್ನುವ ಗೂಢನೇ

ನೀನ್ಯಾರು ಎಂಬುದ ಅರಿತೇಯ ಮೂಢನೇ ||೧||

ಗುರುವೆಂದು ನಡೆದೆ ಗುರುವೆಂದು ದುಡಿದೆ

ಒಳಗೊಳಗೆ ಗುರು ಗುರುಗುಟ್ಟುತ್ತ ನಿಂತೆ

ಗುರುವೆಂದು ಉಂಡೆ ಗುರುವೆಂದು ಕಂಡೆ

ಗುರುತರ ಭಾಗ್ಯವು ಇದೆ ಎಂದೆಯಲ್ಲಾ ||೨||

ಕಣ್ಮುಚ್ಚಿ ಕುಳಿತರೆ ಕಾಣನು ಬ್ರಹ್ಮನು

ಪ್ರಾಸದಿ ಗೀಚಿದರೆ ಬಾರನು ಅವನು

ಹಿಡಿಯಬೇಕೊ ಅರಿವಿನ ಜಾಡನ್ನು ಅರಿತು

ನೆಡೆಯಬೇಕೊ ಗುರು ನುಡಿಯನ್ನು ಕಲಿತು ||೩||

ಸಖರಾಯಪುರವಾಸ ಸುಖವೀಯೊ ಮಹನೀಯಾ

ಹೇಳಿ ಕೇಳಿ ಮಾಡಿದ ತನ್ನ ಭಕ್ತನ

ಅಂಬಾಸುತನಂತರಂಗದಿ ಅನವರತ ನಗುವಾತ

ಅರಿವಿನರಮನೆಯಾ ಹಾದಿಯ ತೋರಿಸುತ ||೪||