ಗುರುನಾಥ ಗಾನಾಮೃತ 

ಎನ್ನ ಸದ್ಗುರು ಶ್ರೀವೇಂಕಟಾಚಲನ ಮನೆಗೆ  ಹೋಗೋಣ ಬಾರೇ ತಂಗಿ

ರಚನೆ: ಅಂಬಾಸುತ 

ಎನ್ನ ಸದ್ಗುರು ಶ್ರೀವೇಂಕಟಾಚಲನ 

ಮನೆಗೆ  ಹೋಗೋಣ ಬಾರೇ ತಂಗಿ ||ಪ||

ತಂಗೋಣ ಬಾರೇ ತಂಗಿ ಅಲ್ಲೇ

ಸದ್ಗುರು ಪಾದದಡಿಯಲ್ಲೇ ||ಅ.ಪ||

ಕಾಯವ ಹಣ್ಣಾಗಿಸಿ ತಂಗಿ

ಮನದ ಮಲ್ಲಿಗೆಯನ್ನರಳಿಸಿ

ಮೋಹ ದಾಹವ ಬಿಟ್ಟು ಮಡಿಯುಟ್ಟು ತಂಗಿ

ಆನಂದಿಂದ ಆನಂದದ ನಿಲಯಕ್ಕೆ ||೧||

ಆರು ಮೆಟ್ಟಿಲ ಮೆಟ್ಟಿ ತಂಗಿ

ಹದಿನಾರು ಚಿಂತೆಯ ಬಿಗಿದು ಕಟ್ಟಿ

ಮೂರನು ಮೀರಿದವನ ಪಾದವ ಮುಟ್ಟಲು ತಂಗಿ

ನೇತ್ರಾರತಿ ಮುಂದಿಟ್ಟುಕೊಂಡು ಮುದದಿ ||೨||

ಬಹುದೂರವಿಲ್ಲವೇ ತಂಗಿ

ಗುರುಮನೆ ಮೆರೆದಿಹುದು ನಿಜಸೌಖ್ಯ ರಂಗದಿ

ಆತ್ಮಸಖನ ಪುರದೊಳಗೇ ತಂಗಿ

ಅಂಬಾಸುತ ಈ ಪದ ಕೂಗಳತೆ ದೂರದಲ್ಲಿ ||೩||