ಗುರುನಾಥ ಗಾನಾಮೃತ 

ಎಂಥಾ ಭಕುತನು ಕಂಡ್ಯಾ ನಾನು ಗುರುವೇ

ರಚನೆ: ಅಂಬಾಸುತ 

ಎಂಥಾ ಭಕುತನು ಕಂಡ್ಯಾ ನಾನು ಗುರುವೇ

ಸಂತೆ ವ್ಯಾಪಾರದ ನಡುವೆ ಒಮ್ಮೆ ನಿನ್ನನು ನೆನೆವೇ ||ಪ||

ತಡವಾಗಿ ಎದ್ದು ತಡಬಡಿಸಿ ಸ್ನಾನವ ಮಾಡಿ

ಕ್ಷಣಕಾಲ ನಿನ್ನೆದಿರು ನಿಂತು ನಾ ಹೊರಡುವೆ

ಅರ್ಥ ಗಳಿಸಲು ಮುದದಿ ಸ್ವಾರ್ಥ ಪರನಾಗುತಲಿ

ಆತ್ಮಸಖನೇ ನಿನ್ನ ಮರೆತಿರುವಂಥಾ ||೧||

ಕಷ್ಟವೆಂಬುದು ಬರಲು ನೀ ಕಾಯಲಿಲ್ಲವೆಂದು

ಜರಿಯುವೆ ಜನ್ಮವೆನಗೆ ಏಕಿತ್ತೆ ಎನುವೇ

ಸುಖದ ಕಾಲದಿ ಸತಿ ಸುತರ ಒಡಗೂಡುತಲಿ

ಹರುಷದಿ ನಿನ್ನನ್ನೇ ನೆನೆಯದಿರುವಂಥಾ ||೨||

ಉಂಬುವಾಗ ಉಡುವಾಗ ಉತ್ತಮಿಕೆ ಪಡೆವಾಗ

ಜಗದೊಳುತ್ತಮನೇ ನಿನ್ನ ಸ್ಮರಿಸಲಿಲ್ಲಾ

ಹೆಸರ ಪಡೆಯಲು ನಿನ್ನ ನಾಮವಾ ಜಪಿಸುವ

ಹೀನರೊಳಗತಿ ಹೀನ ಈತನು ||೩||

ಅಳಿಸೊ ನಾನೆಂಬುದಾ ಸಖರಾಯಪುರಾಧೀಶಾ

ಉಳಿಸೊ ನಿನ್ನಯತನವ ಎನ್ನೊಳಗೆ ಪ್ರಭುವೇ

ಅಂಬಾಸುತನ ಅರಿಕೆ ಇದುವೆ ಕೇಳೊ ಗುರುವೇ

ಉಸಿರುಸಿರಲು ನಿನ್ನ ನಾಮವೇ ಇರಲೈ ||೪||