ಗುರುನಾಥ ಗಾನಾಮೃತ 

ಹುಚ್ಚನೆಂದಾರಲ್ಲೋ ಗುರುವೇ ನಿನ್ನ

ರಚನೆ: ಅಂಬಾಸುತ 

ಹುಚ್ಚನೆಂದಾರಲ್ಲೋ ಗುರುವೇ ನಿನ್ನ

ಜಗವರಿಯೊ ಅರಿವನ್ನೀಯೊ ಪ್ರಭುವೇ ನಿನ್ನ ||ಪ||

ಕೊಚ್ಚೆಯೊಳಾಡುತಾ ಇದೆ ಹಿತವೆನ್ನುತ್ತಾ

ಜೊಳ್ಳು ಸಿರಿಸಂಸಾರದ ಮನೆಯೊಳು ಕುಳಿತು ||ಅ.ಪ||

ಬಡ ಬಡ ಬಡಾಯಿಸುವನು ಅವನು

ನಕ್ಕಾನು ಒಮ್ಮೆ ಸಿಟ್ಟಾಗುವನೊಮ್ಮೆ

ಕಟ್ಟಾಳೆ ಹೇಳುವನು ಕಳವಳಪಡಿಸುವನು

ಕೂಡಿಟ್ಟದ್ದನ್ನೆಲ್ಲಾ ಕೊಡಿರೆಂದು ಪೇಳಿದಾ ||೧||

ನಾಲ್ವರ ಮುಂದೆ ಮನಮಾತ ಹೇಳುವನು

ಪ್ರತಿ ನಾಡಿಮಿಡಿತವ ಕಂಡು ಹಿಡಿವನು

ಪರಮಾತ್ಮ ಪರಬ್ರಹ್ಮ ಎಂದೆಲ್ಲ ಉಸುರಿ

ಪರಿಪರಿ ಪ್ರಶ್ನೆಗಳ ಕೇಳುತಲಿರುವಾ ||೨||

ದಟ್ಟಿಯೊಂದನೆ ಸುತ್ತಿಕೊಂಡಂತವನವನು

ಮಾನಾಭಿಮಾನವ ಬಿಟ್ಟವನವನು

ಎಲ್ಲೆಂದರಲ್ಲೇ ಜನರ ಕೂಡಿರುವನು

ಬಾಯ್ತೆರದರೆ ಗುರು ಗುರು ಎನ್ನುತ್ತಲಿರುವಾ ||೩||

ಸಖರಾಯಪುರದಲ್ಲಿ ಸುಖದಿಂದಿರುವನು

ಶ್ರೀವೇಂಕಟಾಚಲ ಎಂಬ ಹೆಸರಿನವನು

ಅಂಬಾಸುತನಾ ಪ್ರತಿ ಪದಕೆ ಪ್ರೇರಣೆಯಾಗಿ

ಗುರುವಾಗಿ ಅಂತರಂಗದ ಅರಿ ನಿಗ್ರಹಿಸುವ ||೪||