ಶ್ರೀ ಸದ್ಗುರು ಮಹಿಮೆ   

 

   ಗ್ರಂಥ ರಚನೆ - ಚರಣದಾಸ 

 

  ಅಧ್ಯಾಯ  - 27

ಪರಮ ದಯಾಳು 

ಸ್ವಾತ್ಮಾ ರಾಮಂ  ನಿಜಾನಂದಂ ।
ಶೋಕ ಮೋಹ ವಿವರ್ಜಿತಂ ।।
ಸ್ಮರಾಮಿ ಮನಸಾ ನಿತ್ಯಂ ।
ವೆಂಕಟಾಚಲ ದೇಶಿಕಂ ।।

  

ಇಷ್ಟಕ್ಕೇ ಸುಮ್ಮನಾಗದ ನಾನು ಇನ್ನಷ್ಟು ಅನುಭವಗಳನ್ನು ಹೇಳಿ ಎಂದು ಕೆದುಕಲು ಆ ತಾಯಿ ಮಹದಾನಂದದಿಂದ "ನಮ್ಮ ಅನುಭವದ ಜಗದಲ್ಲಿ ಪರಮ ದಯಾಳು ಎಂದರೆ ಆ ನನ್ನೊಡೆಯ ಮಾತ್ರವೇ..... " ಎಂದು ನುಡಿದು ಹೀಗೆ ಹೇಳತೊಡಗಿದರು. 

ಅದು ಬಹುಶಃ 2003 ರ ಅವಧಿ. ನಮ್ಮ ಯಜಮಾನರು ಕಾರ್ಯನಿಮಿತ್ತ ಪ್ಯಾರಿಸ್ ಗೆ ಹೋಗಬೇಕಿತ್ತು. ನನ್ನ ಕೆಲಸದ ಒತ್ತಡದಲ್ಲಿ ಗುರುನಾಥರಿಗೆ ವಿಚಾರ ತಿಳಿಸಲು ಆಗಲಿಲ್ಲವಲ್ಲ.... ಎಂದು ಚಿಂತಿತಳಾಗಿದ್ದೆ. ಹೀಗಿರಲು ಒಂದು ದಿನ ಗುರುದೇವರು ನಮ್ಮ ಮನೆಯ ಎದುರಿದ್ದ ಭಕ್ತರ ಮನೆಗೆ ಬಂದ ವಿಚಾರ ತಿಳಿದು ಅಲ್ಲಿಗೆ ಹೋಗಿ ನಮ್ಮ ಯಜಮಾನರ ಪ್ರವಾಸದ ಬಗ್ಗೆ ತಿಳಿಸಿದೆ. ಕೂಡಲೇ "ನೀನೂ ಜೊತೆಗೆ ಹೋಗೋದಲ್ವೇ?" ಎಂದು ನಗುತ್ತಾ ಕೇಳಿ ಜೊತೆಗೆ ಒಂದು ವಸ್ತ್ರದಲ್ಲಿ ಒಂದಷ್ಟು ಅಡಿಕೆ ಅರಿಶಿನ ಕುಂಕುಮ ಇತ್ತು ಕಟ್ಟಿ "ನಿಮ್ಮ ಯಜಮಾನರ ಚೀಲದಲ್ಲಿ ಇದು" ಎಂದರು. ನಾನು ಹಾಗೆ ಮಾಡಿದೆ. 

ಪ್ರವಾಸ ಹೊರಟ ನಮ್ಮ ಯಜಮಾನರು ಮುಂಬೈನ ತಾಜ್ ಹೋಟೆಲ್ ಸಮೀಪ ಕೆಲಕಾಲವಿದ್ದು ನಂತರ ವಿಮಾನ ನಿಲ್ದಾಣದೆಡೆಗೆ ಸಾಗಿದರು. ಅದಾಗಿ ಕೇವಲ ಅರ್ಧ ತಾಸಿನಲ್ಲಿ "ತಾಜ್ ಹೋಟೆಲ್ ನಲ್ಲಿ ಬಾಂಬ್ ಸ್ಫೋಟ ಸಂಭವಿಸಿತ್ತು. ಗುರುಕೃಪೆ ನಮ್ಮನ್ನು  ಕಾಪಾಡಿತ್ತು ಎಂದು ಹೇಳಿ ಕ್ಷಣ ಕಾಲ ಮೌನವಾದರು. 

ತುಸು ಹೊತ್ತಿನ ಬಳಿಕ ಮತ್ತೆ ಹೀಗೆ ಹೇಳತೊಡಗಿದರು: "ನಮ್ಮ ಕಚೇರಿಯಲ್ಲಿ ಮುಂಬಡ್ತಿ ವಿಚಾರ ನ್ಯಾಯಾಲಯದಲ್ಲಿ ಇದ್ದುದ್ದರಿಂದ ಕಳೆದ ಐದಾರು ವರ್ಷಗಳಿಂದ ಯಾವುದೇ ಮುಂಬಡ್ತಿ ನಡೆದಿರಲಿಲ್ಲ. ಒಂದು ಮಧ್ಯಾನ್ಹ ಊಟವಾದ ನಂತರ ಗುರುನಾಥರು ಒಂದಷ್ಟು ಅರಿಶಿನ ಕುಂಕುಮ ಪೊಟ್ಟಣ ನನ್ನ ಕೈಗಿತ್ತು "ಇದನ್ನು ನಿನ್ನ ಸಹೋದ್ಯೋಗಿಗಳಿಗೆ ಕೊಡು" ಎಂದರು. ಜೊತೆಗೆ ಮುಂಬಡ್ತಿಯಾಗುವ ಸೂಚನೆಯನ್ನು ನೀಡಿದರು. ಅದಾಗಿ ಆರು ತಿಂಗಳಲ್ಲಿ ನನಗೆ ಮುಂಬಡ್ತಿಯಾಯಿತು....... ,,,,,,,,

ಹೆಚ್ಚಿನ ಮಾಹಿತಿಗಾಗಿ ಗುರು ಬಂಧುಗಳು ಶ್ರೀ ಸದ್ಗುರು ಮಹಿಮೆ ಕನ್ನಡ ಮತ್ತು ಇಂಗ್ಲೀಷ್ ಗ್ರಂಥವನ್ನು ಪರಾಂಬರಿಸುವುದು..... 

।। ಶ್ರೀ ಗುರು ವೆಂಕಟಾಚಲ ಶರಣಂ ಪ್ರಪದ್ಯೇ ।।

For more info visit :  http://srivenkatachalaavadhoota.blogspot.in/