ಶ್ರೀ ಸದ್ಗುರು ಮಹಿಮೆ   

    ಗ್ರಂಥ ರಚನೆ - ಚರಣದಾಸ 

   ಅಧ್ಯಾಯ  - 58

ಗುರುವಿನೊಡನೆ ಪ್ರಥಮ ಸಮಾಗಮ 

ಸ್ವಾತ್ಮಾ ರಾಮಂ  ನಿಜಾನಂದಂ ।
ಶೋಕ ಮೋಹ ವಿವರ್ಜಿತಂ ।।
ಸ್ಮರಾಮಿ ಮನಸಾ ನಿತ್ಯಂ ।
ವೆಂಕಟಾಚಲ ದೇಶಿಕಂ ।।

ಸರ್ಕಾರಿ ಸೇವೆಗೆ ಸೇರಬೇಕೆಂಬ ಅದಮ್ಯ ಹಂಬಲ ನನ್ನದಾಗಿತ್ತು. ಆದರೆ ವಿಧಿ ವೈಪರೀತ್ಯ ನಾ ಬರೆದ ಸ್ಪರ್ಧಾತ್ಮಕ ಪರೀಕ್ಷೆಗಳೆಲ್ಲವೂ ಹಗರಣಗಳ ಗೂಡಾಗಿ ನ್ಯಾಯಾಲಯದ ಮೆಟ್ಟಿಲೇರಿತ್ತು. ನನ್ನ ಸಂಬಂಧಿ ಒಬ್ಬರ ಸಹಾಯದಿಂದಾಗಿ ಮಾರ್ಚ್ 2000 ದಲ್ಲಿ ಗುರುನಾಥರ ಸಹೋದರಿಯ ಮನೆಯಲ್ಲಿ ಬೆಂಗಳೂರಿನಲ್ಲಿ ಮೊಟ್ಟ ಮೊದಲ ದರ್ಶನವಾಯಿತು. ನಾನು ನಮಸ್ಕರಿಸಲು, ಆ ಭವ್ಯ ಜೀವಿ ತನ್ನೆದುರಿದ್ದ ವಯೋವೃದ್ಧೆಗೆ ಒಂದು ಹಣ್ಣು ನೀಡಲು ಹೇಳಿ ನಮಸ್ಕರಿಸುವಂತೆ ಹೇಳಿದರು. 

ನಾ ಹಾಗೆಯೇ ಮಾಡಲು, "ನೀ ಅಧಿಕಾರಿ ಆಗಿಯೇ ಆಗುತ್ತಿ. ಸಂಶಯಬೇಡ" ಎಂದು ಅಭಯವಿತ್ತರು. 

ಒಡನೆಯೇ "ಜೂನ್ 21 ರಂದು ಮತ್ತೆ ನಮ್ಮಿಬ್ಬರ ಭೇಟಿ ಸರಿಯಾದ ಜಾಗದಲ್ಲಿ ಸರಿಯಾದ ರೀತಿಯಲ್ಲಿ ಆಗುವುದು" ಎಂದು ತಿಳಿಸಿದರು. ಹಾಗೂ "ಅದೆಲ್ಲಿ ಅಂತ ನನಗೆ ತಿಳೀತಿಲ್ಲ" ಅಂದ್ರು. 

ಗುರುವಿನ ಬಗ್ಗೆ ಅರಿವಿರದ ನಾನು ಅಷ್ಟಾಗಿ ತಲೆ ಕೆಡಿಸಿಕೊಳ್ಳದೇ ಅಲ್ಲಿಂದ ಮರಳಿದೆನು. ತದನಂತರ ಶೃಂಗೇರಿ ಸಮೀಪವಿರುವ ನನ್ನೂರಿಗೆ ಬಂದೆನಾದರೂ ಅಲ್ಲಿಂದ ಹೊರಡಲು ಅಡೆತಡೆಯಾಗುತ್ತಿತ್ತು 

ಜೂನ್ 20 ರ ಸಂಜೆ ಬೆಂಗಳೂರಿಗೆ ಹೊರಡಲು ಹಣಕಾಸಿನ ವ್ಯವಸ್ಥೆ ಆಯಿತು. ನೇರವಾಗಿ ಬೆಂಗಳೂರಿಗೆ ಟಿಕೆಟ್ ಪಡೆದಿದ್ದ ನಾನು ಆಕಸ್ಮಿಕವಾಗಿ ಚಿಕ್ಕಮಗಳೂರಿನಿಂದ ನೇರವಾಗಿ ಸಖರಾಯಪಟ್ಟಣಕ್ಕೆ ಬಂದಿಳಿದೆನು. ಆದರೆ ಅಂದು ಅವರು ನುಡಿದಿದ್ದ ದಿನಾಂಕದ ಯಾವುದೇ ಅರಿವು ನನಗಿರಲಿಲ್ಲ. ಬೆಳಿಗ್ಗೆ 11:30 ರ ಸುಮಾರಿಗೆ ಸಖರಾಯಪಟ್ಟಣ ತಲುಪಿದೆನು. 

ಅವರ ಮನೆಯ ಮುಂದಿನ ಕೋಣೆಯಲ್ಲಿ ಮಲಗಿದ್ದ ಅವರಿಗೆ ನನ್ನ ಪರಿಚಯ ತಿಳಿಸಲು, ಅವರು ಅಲ್ಲಿಯೇ ಇದ್ದ ಶಿಷ್ಯರೊಬ್ಬರಿಗೆ ನನಗೆ ಊಟ ನೀಡಲು ತಿಳಿಸಿದರು. ಬೆಳ್ಳಗಿದ್ದ ಆ ವ್ಯಕ್ತಿ ಹಿಂಜರಿಯುತ್ತಾ ನನಗೆ ಊಟ ನೀಡಿದರು. ವರಾಂಡದಲ್ಲಿ ಕುಳಿತು ಊಟ ಮಾಡುವಷ್ಟರಲ್ಲಿ ಗುರುಗಳಿಗೆ ಹೆಚ್ಚು ಪರಿಚಯವಿದ್ದ ಮೂವರು ಬೆಂಗಳೂರಿನಿಂದ ಬರಲು ಅವರಿಗೆ ಆ ಬೆಳ್ಳಗಿನ ವ್ಯಕ್ತಿ ಅಡುಗೆ ಮನೆಯಲ್ಲಿ ಊಟ ಹಾಕುತ್ತಿದ್ದರು. 

ಧಿಡೀರನೆ ಎದ್ದ  ಗುರುನಾಥರು ಏನೊಂದೂ ಮಾತನಾಡದೇ ನನ್ನ ಕೈ ಹಿಡಿದೆಳೆದುಕೊಂಡು ಅಡುಗೆ ಮನೆಗೆ ಕರೆದೊಯ್ದು ಊಟ ಮಾಡಲು ತಿಳಿಸಿದರು. 

ಆಗ ನಾನು ಊಟವಾಯಿತೆನ್ನಲು, "ಹಾಗಾದರೆ ಐದು ನಿಮಿಷ ಇಲ್ಲೇ ಒಳಗೆ ಕುಳಿತಿದ್ದು ಬಾ" ಎಂದರು. "ಜಗವನರಿತ ಗುರುವಿಗೆ ಜಾತಿ ಬಣ್ಣಗಳ ಬೇಧ ಅರಿವಿಗೆ ಬಾರದೀತೆ?". 

ಗುರುವಿನೊಂದಿಗೆ ರಾತ್ರಿ ತಂಗಿದ್ದು 11 ಗಂಟೆಗೆ ನಾನು ಪ್ರಯಾಣ ಮುಂದುವರೆಸಿದೆನು. "ಇನ್ನು ವಾರ ಹದಿನೈದು ದಿನಗಳಿಗೊಮ್ಮೆ ಭೇಟಿ ಆಗುತ್ತಲೇ ಇರುವುದು" ಎಂದರು. ಅದು ಅಂತೆಯೇ ನಡೆಯಿತು. 

"ಗುರುದೇವನ ಬಗ್ಗೆಯಾಗಲೀ ಗುರುವೆಂದರೇನೆಂದಾಗಲೀ ಅರಿವಿರದ ನನಗೆ ನನ್ನ ಮೂರನೇ ಭೇಟಿಯಲ್ಲಿ ಹನ್ನೊಂದು ದಿನ ಜೊತೆಗಿರಿಸಿಕೊಂಡ ಗುರುನಾಥರು ಆಡಿದ ಒಂದೊಂದು ಮಾತುಗಳು ಇಂದಿಗೂ, ಈವರೆಗೂ ನಡೆಯುತ್ತಲೇ ಇದೆ.....,,,,,, 

ಹೆಚ್ಚಿನ ಮಾಹಿತಿಗಾಗಿ ಗುರು ಬಂಧುಗಳು ಶ್ರೀ ಸದ್ಗುರು ಮಹಿಮೆ ಕನ್ನಡ ಮತ್ತು ಇಂಗ್ಲೀಷ್ ಗ್ರಂಥವನ್ನು ಪರಾಂಬರಿಸುವುದು..... 

।। ಶ್ರೀ ಗುರು ವೆಂಕಟಾಚಲ ಶರಣಂ ಪ್ರಪದ್ಯೇ ।।

For more info visit :  http://srivenkatachalaavadhoota.blogspot.in/