ಶ್ರೀ ಸದ್ಗುರು ಮಹಿಮೆ   

   ಅಧ್ಯಾಯ  - 60

    ಗ್ರಂಥ ರಚನೆ - ಚರಣದಾಸ 

ರೋಹಿಣಿ ವೃತ್ತಾಂತ 

ಸ್ವಾತ್ಮಾ ರಾಮಂ  ನಿಜಾನಂದಂ ।
ಶೋಕ ಮೋಹ ವಿವರ್ಜಿತಂ ।।
ಸ್ಮರಾಮಿ ಮನಸಾ ನಿತ್ಯಂ ।
ವೆಂಕಟಾಚಲ ದೇಶಿಕಂ ।।

ಒಂದು ದಿನ ಚರಣದಾಸನಾದ ನನ್ನ ಸೋದರಿಯಿಂದ ಕರೆ ಬಂತು. ಆಕೆಯ ನಾದಿನಿಯೊಬ್ಬರು ಪಾರ್ಶ್ವವಾಯು ಸಂಬಂಧಿ ಖಾಯಿಲೆಯಿಂದ ಬಳಲುತ್ತಿದ್ದು, ಯಾವುದೇ ಚಿಕಿತ್ಸೆ ಫಲಕಾರಿಯಾಗುತ್ತಿರಲಿಲ್ಲವೆಂದು ತಿಳಿದು ಬಂತು. ಒಂದೆರಡು ದಿನಗಳಲ್ಲಿ ಭಾವನವರು ಸಖರಾಯಪಟ್ಟಣಕ್ಕೆ ಬಂದು ಗುರುಗಳನ್ನು ಭೇಟಿಯಾದರು. 

ನಂತರ ಗುರುನಾಥರು ಸಹೋದರಿಗೆ ಕರೆ ಮಾಡಿಸಿ "ನಿನ್ನ ಬಲದಿಂದ ನಿನ್ನ ನಾದಿನಿ ಉಳಿಯುತ್ತಾಳೆ. ಸರ್ವಮಂಗಳ - ಸ್ತೋತ್ರ ಹೇಳ್ತಾ ಇರು ಸಾಕು" ಎಂದರು. 

ಅದಾಗಿ ಎರಡು ಮೂರು ದಿನ ಕಳೆದ ನಂತರ ಚರಣದಾಸನಾದ ನನ್ನನ್ನು "ಬೆಂಗಳೂರಿಗೆ ಹೋಗಿ ಭಾವನ ಅಕ್ಕನನ್ನು ನೋಡಿ ಬಾ" ಎಂದು ಕೆಲ ವಿಷಯಗಳನ್ನು ತಿಳಿಸಿ ಕಳಿಸಿದರು. 

ಬೆಂಗಳೂರಿನ ನಿಮ್ಹಾನ್ಸ್ ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರೂ ಅವರು ಸ್ವತಂತ್ರವಾಗಿ ಎದ್ದು ನಡೆಯುವ ಶಕ್ತಿಯನ್ನೇ ಕಳೆದುಕೊಂಡಿದ್ದರು. 

ನಾನು ಆಸ್ಪತ್ರೆ ಪ್ರವೇಶಿಸುವ ಮೊದಲು ಗುರುನಾಥರು ಹೇಳಿದಂತೆಯೇ ಮಾಡಿ ಒಳ ಹೋದೆನು. ಕೆಲ ನಿಮಿಷಗಳಲ್ಲಿ ಆಕೆ ಸ್ವತಂತ್ರವಾಗಿ ಎದ್ದು ನಡೆದಾಡಿದರು. ನಾ ಆಸ್ಪತ್ರೆಯಿಂದ ಹಿಂತಿರುಗಿದ ಮರುದಿನ ಆಕೆಗೆ ಹೊಟ್ಟೆಯಲ್ಲಿ ನೀರು ತುಂಬಿದ್ದು ಆಪರೇಷನ್ ಆಗಲೇಬೇಕೆಂದು ತಿಳಿದುಬಂತು. ಗುರುವಾಕ್ಯದಲ್ಲಿ ಶ್ರದ್ಧೆ ಇದ್ದ ನಾನು ಮತ್ತೆ ಗುರುಗಳು ಹೇಳಿದಂತೆಯೇ ಮಾಡಲು ಮತ್ತೊಮ್ಮೆ ಪರೀಕ್ಷಿಸಿದ ವೈದ್ಯರು ಮಾತ್ರೆಯಲ್ಲೇ ಗುಣಪಡಿಸಬಹುದೆಂದು ತಿಳಿಸಿ, ಆಪರೇಷನ್ ಬೇಡವೆಂದು ಹೇಳಿದ್ದು ತಿಳಿದುಬಂತು. 

ಆ ಮಹಿಳೆ ಇಂದು ಸ್ವತಂತ್ರವಾಗಿ ನಡೆದಾಡುವ ಸ್ಥಿತಿಯಲ್ಲಿದ್ದು ಆರೋಗ್ಯದಿಂದಿದ್ದಾರೆ. "ಗುರುವಾಕ್ಯ ಪ್ರಮಾಣ" ವೆನ್ನಲು ಇದಕ್ಕಿಂತ ಇನ್ಯಾವ ನಿದರ್ಶನ ಬೇಕು?

ಒಮ್ಮೆ ಚರಣದಾಸನಾದ ನನನ್ ಬಂಧುವೊಬ್ಬರು ತನ್ನ ಪತ್ನಿಯೊಂದಿಗೆ ಗುರುನಿವಾಸಕ್ಕೆ ಬಂದಿದ್ದರು. ಬೆಂಗಳೂರಿನಲ್ಲಿ ವ್ಯಾಪಾರ ನಡೆಸುತ್ತಿದ್ದ ಅವರ ಪತ್ನಿ ಸ್ತನ ಕ್ಯಾನ್ಸರ್ ನಿಮ್ದ ಬಳಲುತ್ತಿದ್ದರು. ವೈದ್ಯರು ಸಹ ಆಕೆ ಬದುಕುಳಿಯುವ ಬಗ್ಗೆ ಖಾತ್ರಿ ನೀಡಿರಲಿಲ್ಲ. 

ಸದಾಕಾಲ ಹಣಕ್ಕಾಗಿ ಹಂಬಲಿಸುತ್ತಿದ್ದ ಆ ವ್ಯಕ್ತಿಯನ್ನು ಕುರಿತು ಗುರುನಾಥರು "ಏನು ನಿನ್ನ ಹಣ ಈಗ ನಿನ್ ಹೆಂಡ್ತೀನ ಉಳಿಸುತ್ತಾ? ಈಗ ಆಕೇನ ಉಳಿಸೋದು ಒಳ್ಳೆತನ ಹಾಗೂ ಗುರು ಮಾತ್ರ.... ಅರ್ಥವಾಯ್ತಾ?" ಎಂದು ಗದರಿಸಿದರು. 

ಆ ವ್ಯಕ್ತಿ ತನ್ನ ತಪ್ಪಿನ ಅರಿವಾಗಿ ತಲೆತಗ್ಗಿಸಿ ನಿಂತರು. 

ಗುರುನಾಥರು ಅವರನ್ನು ಕರೆದು "ಆಪರೇಷನ್ ಮಾಡಿಸು. ಆಕೆ ಉಳೀತಾಳೆ. ಜೀವಕ್ಕೇನೂ ತೊಂದರೆಯಿಲ್ಲ. ಯಾವುದಾದರೂ ಕುದುರೆಗೆ ಇವಳು ಮುಟ್ಟಿದ ಹುರಳಿಯನ್ನು ತಿನ್ನಿಸು ಸಾಕು" ಎಂದು ಹೇಳಿ ಆಶೀರ್ವದಿಸಿ ಕಳಿಸಿದರು. ಅಂತೆಯೇ ಮಾಡಲು ಇಂದು ಆಕೆ ಸಂಪೂರ್ಣ ಗುಣಮುಖರಾಗಿದ್ದಾರೆ. 

ಹಾಗೆಯೇ ಇನ್ನೊಮ್ಮೆ ಕಡೂರು ಸಮೀಪದ ವ್ಯಕ್ತಿಯೊಬ್ಬರು ಗುರುನಿವಾಸಕ್ಕೆ ಬಂದರು. ಆತ ಯಾವುದೋ ಖಾಯಿಲೆಯಿಂದ ಬಳಲುತ್ತಿದ್ದು ಯಾವ ಚಿಕಿತ್ಸೆಯೂ ಫಲ ನೀಡಿರಲಿಲ್ಲ. ಆತ ಬದುಕುಳಿಯುವುದೇ ಕಷ್ಟವೆಂದು ವೈದ್ಯರು ಹೇಳಿದ್ದರು. ಈ ವಿಷಯ ತಿಳಿದ ಗುರುನಾಥರು ಎರಡು ದಿನ ವಿಳ್ಳೇದೆಲೆ, ಅಡಿಕೆ ತಿನ್ನಲು ತಿಳಿಸಿದರು. ಇಂದು ಆತ ಗುರುಕೃಪೆಯಿಂದ ಆರೋಗ್ಯವಾಗಿದ್ದಾರೆ, ಮಾತ್ರವಲ್ಲ ಬೆಂಗಳೂರಿನಲ್ಲಿ ಕೆಲಸದಲ್ಲಿ ಇರುವರು....,,,,,,,,, 

ಹೆಚ್ಚಿನ ಮಾಹಿತಿಗಾಗಿ ಗುರು ಬಂಧುಗಳು ಶ್ರೀ ಸದ್ಗುರು ಮಹಿಮೆ ಕನ್ನಡ ಮತ್ತು ಇಂಗ್ಲೀಷ್ ಗ್ರಂಥವನ್ನು ಪರಾಂಬರಿಸುವುದು..... 

।। ಶ್ರೀ ಗುರು ವೆಂಕಟಾಚಲ ಶರಣಂ ಪ್ರಪದ್ಯೇ ।।

For more info visit :  http://srivenkatachalaavadhoota.blogspot.in/