ಗುರುನಾಥ ಗಾನಾಮೃತ 

ನಾ ಮಾಡಿದ ತಪ್ಪುಗಳನೆಲ್ಲಾ ಒಪ್ಪಿಕೊಳ್ಳೋ ಗುರುವೇ ಒಪ್ಪೊಕೊಳ್ಳೋ

ರಚನೆ: ಅಂಬಾಸುತ 

ನಾ ಮಾಡಿದ ತಪ್ಪುಗಳನೆಲ್ಲಾ ಒಪ್ಪಿಕೊಳ್ಳೋ ಗುರುವೇ ಒಪ್ಪೊಕೊಳ್ಳೋ

ಸುತ ನೀ ಪಿತ ನಾ ಎನ್ನುತ್ತಾ ಅಪ್ಪಿಕೊಳ್ಳೋ ಎನ್ನ ಅಪ್ಪಿಕೊಳ್ಳೋ ||ಪ||

ನಿತ್ಯಾನುಷ್ಟಾನ ಕರ್ಮವಾ ಮಾಡಲಿಲ್ಲವೋ ನಾ ಮಾಡಲಿಲ್ಲವೋ

ನಿನ್ನ ಪಾದುಕೆಯಾ ಮೇಲೇ ಮನಪುಷ್ಪವಾ ನಾನಿಡಲಿಲ್ಲವೋ

ಮಾತಾಪಿತರನು ನಿಂಧಿಸುತಾ ಮಂದನಾದೆನೋ ನಾ ಮಂದನಾದೆನೋ

ಸಾಧುಸಂತರ ಸೇವೆ ಮಾಡದೇ ನಿಂಧ್ಯನಾದೆನೋ ನಾ ನಿಂಧ್ಯನಾದೆನೋ ||೧||

ವ್ರತನೇಮಗಳನ್ನೆಲ್ಲಾ ವರ್ಜಿಸಿದೆನೋ ನಾ ವರ್ಜಿಸಿದೆನೋ

ಹಸಿದು ಧೇಹಿ ಎಂದವಗೇ ಅನ್ನವ ನಾ ನೀಡಲಿಲ್ಲವೋ

ಗುರುವೇ ನಿನ್ನ ಪದವನ್ನೂ ಮರೆತುಬಿಟ್ಟೆನೋ ನಾ ಮರೆತುಬಿಟ್ಟೆನೋ

ಗುರುವೇ ನೀ ಅರಿವೆಂದೂ ತಿಳಿಯಲಿಲ್ಲವೋ ಎನಗೆ ತಿಳಿಯಲಿಲ್ಲವೋ ||೨||

ಕಾಮಾಧಿ ಕರ್ಮಗಳಲ್ಲೇ ಕಾಲವ ನಾ ಕಳೆದಿಹೆನಲ್ಲೋ

ಸೋಮಶೇಖರನೂ ನೀನೇ ಎಂಬುದ ನಾನರಿಯಲಿಲ್ಲವೋ

ಹೊಟ್ಟೆ ತುಂಬಿಸುವಾ ಭರದೀ ಪಾಪಕೃತ್ಯವ ನಾ ಗೈದೆನೋ

ಇಷ್ಟಮೂರುತಿ ಸದ್ಗುರುವಾ ಕಾಣದೇ ಕುರುಡಾಗಿ ನಿಂತೆನೋ ||೩||

ಸಖರಾಯಪುರವಾಸನಾ ಸಂಧಿಸುವ ಭಾಗ್ಯವ ಬಿಟ್ಟೆನೋ

ಸೋಹಂ ಎಂಬುದನೇ ಮರೆತೂ ಅಹಂಕಾರದೀ ಮೆರೆದೆನೋ

ಅಂಬಾಸುತನ ಈ ತಪ್ಪುಗಳನ್ನು ಒಪ್ಪಿಕೊಳ್ಳೋ ಗುರುವೇ ಒಪ್ಪಿಕೊಳ್ಳೋ

ಸುತ ನೀ ಪಿತ ನಾ ಎನ್ನುತಾ ಅಪ್ಪಿಕೊಳ್ಳೋ ಎನ್ನ ಅಪ್ಪಿಕೊಳ್ಳೋ ||೪||