ಗುರುನಾಥ ಗಾನಾಮೃತ 

ಎಚ್ಚರಗೊಳ್ಳೋ ಗುರುವೇ ಎಮ್ಮನು ಎಚ್ಚರಿಸೋ ಪ್ರಭುವೇ

ರಚನೆ: ಅಂಬಾಸುತ 

ಎಚ್ಚರಗೊಳ್ಳೋ ಗುರುವೇ ಎಮ್ಮನು ಎಚ್ಚರಿಸೋ ಪ್ರಭುವೇ

ಅಚ್ಚರಿಯಲ್ಲವೋ ನಿನ್ನೀ ಎಚ್ಚರಾ ಜಗದೋದ್ಧಾರಕೆ ಅದುವೇ ಸಾಕಾರಾ ||ಪ||

ಮೂಡಣದೊಳು ರವಿಯೂ ಮೂಡೀ ಬರುತಿಹನೂ

ಆರತಿಯ ಬೆಳಗಲೂ ಕಾದೂ ನಿಂತಿಹನೂ

ನಕ್ಷತ್ರದ ಸಾಲೊಂದೂ ನಿನ್ನಡಿಯ ಸೇರಲೂ

ನಾಮುಂದು ತಾಮುಂದೂ ಎನುತಾ ಬೆಳಗಿಹವೂ||೧||

ಭೂಸುರರೂ ವೇದದ ಪಠಣವಗೈದಿಹರೂ

ಸೌಮಂಗಲ್ಯೆಯರೆಲ್ಲರು ರಂಗೋಲಿಯ ಹಾಕಿಹರೂ

ಭಾವುಕ ಭಕುತರು ಭಜನೆಯ ಮಾಡಿಹರೂ

ಏಳಯ್ಯಾ ಏಳಯ್ಯಾ ಗುರುನಾಥಾ ಎನುತಿಹರೂ ||೨||

ಗಂಗಾದಿ ತೀರ್ಥಗಳೂ ನಿನ್ನಡಿಯಲಿ ಕಾದಿಹವೂ

ನಿನ್ನ ಪಾದವ ತೊಳೆದೂ ಪರಿಶುದ್ಧರೆನಿಸಲೂ

ಮಲ್ಲಿಗೆ ಸಂಪಿಗೆ ಕೇದಿಗೆ ಪುಷ್ಪಗಳೂ

ನಿನ್ನ ಕೊರಳನು ಸೇರಲೂ ಹಂಬಲಿಸಿಹವೂ ||೩||

ಎಚ್ಚರಗೊಳ್ಳೋ ಸಖರಾಯಪುರವಾಸಾ

ಎಚ್ಚರಗೊಳ್ಳೋ ಶ್ರೀವೇಂಕಟಾಚಲ

ಎಚ್ಚರಗೊಳ್ಳೋ ಅಂಬಾಸುತನಾ ಪ್ರಭುವೇ

ಎಚ್ಚರಗೊಳ್ಳೋ ನೀ ಯೋಗನಿದ್ರೆಯಿಂದಾ ||೪||