ಗುರುನಾಥ ಗಾನಾಮೃತ 

ಕಂಡೆ ನಾನೂ ಕಂಡೆ ನಾನೂ ವೇಂಕಟಪ್ಪನ ಕಂಡೆ ನಾನೂ

ರಚನೆ: ಅಂಬಾಸುತ 

ಕಂಡೆ ನಾನೂ ಕಂಡೆ ನಾನೂ ವೇಂಕಟಪ್ಪನ ಕಂಡೆ ನಾನೂ

ಕಂಡೆ ನಾನೂ ಕಂಡೆ ನಾನೂ ಎನ್ನಪ್ಪನ ಕಂಡೆ ನಾನೂ ||ಪ||

ಶಂಖ ಚಕ್ರವ ಪಿಡಿಯದವನಾ

ಮಾಲೆ ಮುಕುಟ ಧರಿಸದವನಾ

ಮಾನವಾಕೃತಿಯಿಂದ ಮೆರೆವಾ

ಭಕ್ತಪಾಲಕ ಭಗವಂತನಾ ||೧||

ಬೆಟ್ಟಹತ್ತಿ ಬಾ ಎನ್ನದವನಾ

ಕಾಣಿಕೆ ಪಾತ್ರೆ ಇರಿಸದವನಾ

ಕರುಣಾಮೃತವ ಸುರಿಸುತಲಿ ಸದಾ

ಆನಂದವ ನೀಡುವವನಾ ||೨||

ತಿರುನಾಮವ ಏರಿಸದವನಾ

ಪೂಜೆ ಉತ್ಸವ ಬೇಡದವನಾ

ದಟ್ಟಿಯೊಂದನು ಸುತ್ತಿಕೊಂಡೂ

ದಿಟ್ಟನಾಗೀ ಕುಳಿತವನಾ ||೩||

ರಥವನೇರೀ ಕೂರದವನಾ

ರಾಜನಂತೇ ಮೆರೆಯದವನಾ

ಭಕ್ತರ ರಕ್ಷಿಸೊ ಭಾರಹೊತ್ತೂ

ಭೋಗ ಭಾಗ್ಯವ ತ್ಯಜಿಸಿದವನಾ ||೪||

ಸಪ್ತಗಿರಿಯೊಳು ನಿಲ್ಲದವನಾ

ಸಖರಾಯಪುರವಾಸನಾ

ಅಂಬಾಸುತನಾ ಅನವರತ ಕಾಯ್ವಾ

ಅವಧೂತನಾ ಎನ್ನಪ್ಪನಾ ||೫||