ಗುರುನಾಥ ಗಾನಾಮೃತ 

ಬಾರಿ ಬಾರಿಗೂ ನಿನ್ನ ಭಜಿಸುವೆ ಬಾರೈ

ರಚನೆ: ಅಂಬಾಸುತ 

ಬಾರಿ ಬಾರಿಗೂ ನಿನ್ನ ಭಜಿಸುವೆ ಬಾರೈ

ಹೇ ಅವಧೂತಾ ನಿನ್ನ ವದನ ತೋರೈ |ಪ||

ಎಷ್ಟೋ ಜನುಮದಾ ಪುಣ್ಯಾ ನೀ ದೊರಕಿರುವೇ

ಮನದಿಷ್ಟ ಸಲಿಸೋ ಪ್ರಭುವೇ ನೀನೆನ್ನೊಡನಿರುವೇ

ನಿರ್ಗುಣರೂಪ ಅರಿಯದಾ ಮೂಢನೋ ನಾನೂ

ಸಗುಣನಾಗಿ ಬಾರೈ ಕಂದನಾ ಸಲಹೈ ||೧||

ನೀ ಸಾಕಾರಾ ನೀ ನಿರ್ವಿಕಾರಾ

ನೀ ಓಂಕಾರಾ ನೀ ಶಾಸ್ತ್ರಸಾರಾ

ನಾನೆಂಬುದ ಅಳಿಸೋ ನೀ ಘನ್ನಮಹಿಮಾ

ಗುರುವಾಗಿ ಬಾರೈ ಶಿಷ್ಯನ ಪೊರಯೈ ||೨||

ಕಾರುಣ್ಯಮೂರುತಿ ನೀ ಗುರುರಾಯಾ

ಕತ್ತಲ ಕಳೆಯೇ ನೀನೇ ಸೂರ್ಯಾ

ಎನ್ನ ಮನಮಂದಿರದೀ ನೀ ವಿರಾಜಿಸೋ

ತಾಯಾಗಿ ಬಾರೈ ಅಮೃತವನುಣಿಸೈ ||೩||

ಸಖರಾಯಪುರವರಾಧೀಶ್ವರಾ

ಅಂಬಾಸುತನಾ ಕುಲಸ್ವಾಮಿ ನೀನೀಶ್ವರಾ

ಅಡಿಗಡಿಗೆರಗುವೇ ಈ ಮೊರೆಯ ಆಲಿಸೈ

ಸಖನಾಗಿ ಬಾರೈ ಸರಿದಾರಿ ತೋರೈ ||೪||