ಗುರುನಾಥ ಗಾನಾಮೃತ 

ದೈವವಂತೆ ದೇವತೆಯಂತೆ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ದೈವವಂತೆ ದೇವತೆಯಂತೆ

ಏನೂ ಕಾಣೆನು ನಾ

ಮನದಲ್ಲೇ ಬಿಂಬವ ಕಂಡು  ನಿತ್ಯ ಪೂಜಿಪೆನಯ್ಯಾ

ಪೂಜೆಯಂತೆ ಅರ್ಚನೆಯಂತೆ 

ಏನೂ ತಿಳಿಯೆ ನಾ 

ಹೃದಯದಲೇ ಗುರುನಾಥನಿಗೆ ಸದಾ ಅರ್ಚಿಪೆನಯ್ಯಾ ।।

ರಾಗವಂತೆ ತಾಳವಂತೆ 

ಏನೂ ಅರಿಯೆ ನಾ

ಭಕ್ತಿರಸದಿ ಅಕ್ಷರವನದ್ದಿ

ಗೀತೆ ಹೇಳ್ವೆನಯ್ಯಾ 

ಬಂಧವಂತೆ ಮೋಕ್ಷವಂತೆ

ಏನನು ಬೇಡೆನು ನಾ

ನಿನ್ನ ಸಾನಿಧ್ಯದ ಪಾದಧೂಳಿಯಷ್ಟೆ ಕೇಳ್ವೆನಯ್ಯಾ ।।

ತಮವಂತೆ ಜ್ಯೋತಿಯಂತೆ

ಏನೂ ಕಾಣೆನು ನಾ

ಕಣ್ಬೆಳಕಹೊಳಪಲ್ಲಿ ನಿನ್ನನೇ ಕಾಣ್ವೆನಯ್ಯಾ

ಜ್ಞಾನವಂತೆ ಅರಿವಂತೆ

ಒಂದೂ ಅರಿಯೆ ನಾ

ಹೃದ್ದೀಪದ ಸೊಡರಿನಲ್ಲಿ ನೀನೇ ಬೆಳಕಾಗಿರುವೆಯಯ್ಯಾ ।।