ಗುರುನಾಥ ಗಾನಾಮೃತ 

ಗುರುವೇ ಬೇಗ ಬಾರಯ್ಯಾ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗುರುವೇ ಬೇಗ ಬಾರಯ್ಯಾ

ನಮ್ಮ ಮನೆಗೆ |

ಸದ್ಗುರುವೆ ಒಮ್ಮೆ ಬಾರಯ್ಯಾ

ನಮ್ಮ ಮನಕೆ ||

ಜ್ಞಾನದ ಹೆಜ್ಜೆಯನಿಡುತಾ

ಕರುಣೆಯ ದೃಷ್ಟಿಯ ಬೀರುತಾ |

ಭಕ್ತಿಯ ರಸವಾ ಚೆಲ್ಲುತಾ

ಮಂದದ ನಗೆಯಾ ಸೂಸುತಾ || ೧ ||

ಕಣ್ಣಂಚಿನಲೇ ಎಲ್ಲರ ನೋಡುತಾ

ಮನದಲ್ಲಿಯೇ ಭಕ್ತರಾ ಹರಸುತಾ |

ನಿಮ್ಮೊಡನೆ ನಾನಿರುವೆನೆಂದು ಹೇಳುತಾ

ಪ್ರತೀಕ್ಷೆಯ ಫಲವು ಉತ್ತಮವಿದೆಯೆನುತಾ || ೨ ||

ಕರ್ಮದ ಕಾಷ್ಠವಾ ದಹಿಸುತಾ

ಧರ್ಮದ ಹಾದಿಯ ತೋರಿಸುತಾ |

ಹೃದಯದಲೇ ದೈವವ ಕಾಣಿರೆನುತಾ

ಸದ್ವಿದ್ಯೆಯ ದೀಪವಾ ಬೆಳಗಿಸುತಾ || ೩ ||

ಗುರುನಾಥ ಗಾನಾಮೃತ 

ಏಕೆ ಮೌನವಾಗಿಹೆ ಗುರುವೇ ಎನ್ನ ಮೊರೆ ಕೆಳದೇ ಗುರುವೇ

ರಚನೆ: ಆನಂದರಾಮ್, ಶೃಂಗೇರಿ  

ಏಕೆ ಮೌನವಾಗಿಹೆ ಗುರುವೇ ಎನ್ನ ಮೊರೆ ಕೆಳದೇ ಗುರುವೇ

ನಿನ್ನದೇ ಧ್ಯಾನದಲಿ ಮನವು ಮುಳುಗಿಹುದು ದಯೆ ತೋರು ಗುರುವೇ|

ಚಿತ್ತವು ನಿನ್ನಲೇ ನೆಲೆ ನಿಲ್ಲಲಿ ವಿತ್ತದ ಹಿಂದೆ ಹೋಗದಿರಲಿ 

ಕಡುಬಡವನಾದರೂ ಚಿಂತೆಇಲ್ಲಾ ಬಕುತಿಯಲಿ ಸಿರಿವಂತನ ಮಾಡು ಗುರುವೇ|

ಮನವು ಬಯಸುವುದು ಲೌಕಿಕದ ಎಲ್ಲಾ ಸುಖವನು ದಿನವೂ

ಎಲ್ಲೆ ಮೀರಿ ಹೋಗದಿರಲಿ ಆಸೆಯು ನಿನ್ನ ನಿಗವು ಎನ್ನ  ಮೇಲಿರಲಿ ಗುರುವೇ|

ಸಂಸಾರ ಬಂಧನದ ಸುಳಿಯಲಿ ಸಿಲುಕಿ ನಿನ್ನ ಮರೆತನೇ  ನಾನು

ಎನ್ನ ಮನ್ನಿಸಿ ನಿನ್ನೊಳು ಎನ್ನ ಮನ ನಿಲ್ಲುವಂತೆ ಮಾಡೋ ಗುರುವೇ|

ಬಕುತಿಯ ಸೋಗಿನಲಿ ಎನ್ನ ಸ್ವಾರ್ಥವ ಮುಂದಿಟ್ಟು ನಿನ್ನ  ಬೇಡಿದೆನು

ಎನ್ನ ಮನ್ನಿಸಿ ನಿನ್ನವನೆಂದು ಕನಿಕರಿಸಿ ಹರಸೋ ನನ್ನ ಗುರುವೇ|

ಸಕಲವೂ ತಿಳಿದ ದೇವನು ಸಕರಾಯಪುರದಿ ನೆಲೆಸಿಹೆ ನೀನು

ಸಕಲ ಬಕುತರ ನಿತ್ಯವೂ ಸಲಹುವ ನೀನು ಎನ್ನನೂ ಸಲಹು ಗುರುವೇ|

ಗುರುನಾಥ ಗಾನಾಮೃತ 

ಎನ್ನ ಗುರುನಾಥನೇ ಸದಾ ಎನ್ನ ಕಾಯುವನು ಮನವೇ

ರಚನೆ: ಆನಂದರಾಮ್, ಶೃಂಗೇರಿ  

ಎನ್ನ ಗುರುನಾಥನೇ ಸದಾ ಎನ್ನ ಕಾಯುವನು ಮನವೇ

ಇನ್ನು ಯಾತಕೆ ಭಯವು ಅವನಲೇ ಲೀನನಾಗು ಮನವೇ|

ಪೊಳ್ಳು ಮಾತುಗಳ ನೀ  ನಂಬದೆ ಅವನನೇ ನಂಬು ಮನವೇ

ನಿತ್ಯ ನಿರಂತರ ಸತ್ಯವು ಅವನ ಇರುವು ಕೇಳೋ ಮನವೇ|

ಭಯ ಭೀತನಾಗಬೇಡ ಅನ್ಯರಿಗೆ ಅಂಜಿ ಬದುಕ ಬೇಡ ಮನವೇ

ನಿತ್ಯ ಅವನನೇ ನೆನೆಯುತ ಸುಂದರ ಸತ್ಯವ ನೀ ಅರಿಯೊ ಮನವೇ|

ಅವನ ಪಾದವ ಮನದಿ ತುಂಬಿ ಬಹು ಬಕುತಿಯ ಮಾಡು ಮನವೇ

ಮಕುತಿಯ ನೀಡುವ  ಆ ಪಾದವೇ ಮಹಾದೇವನ

ಪಾದ ತಿಳಿ ಮನವೇ|

ತುಂಡು ಉಡುಗೆಯ ದೊರೆಯೋ  ಮಹಾ ಮಹಿಮನೋ ಮನವೇ

ದಟ್ಟ ದಾರಿದ್ರವ ಹೊಡೆದೋಡಿಸುವ ಮಹಾ ಪುರುಷನೋ ಮನವೇ|

ಎಲ್ಲರೊಳಗೂಡಿ ತನ್ನ ಕೆಲಸವ ಮಾಡಿ ಸುಮ್ಮನಿರುವನೋ ಮನವೇ

ಹೃದಯ ತುಂಬಿ ಕೂಗಿದಾಗ ಓಗೊಡುವನೊ ಮನವೇ|

ಎನೂ ಬಯಸದ ಗುರು ಇವನು ಸರ್ವರನೂ ಕಾಯ್ವನು ಮನವೇ

ನೀ ಎತ್ತಲಾದರೂ ಸಾಗು ನಾ ಗುರುವ ನಂಬಿ ನಡೆವೆ ಓ ನನ್ನ ಮನವೇ|

ಗುರುನಾಥ ಗಾನಾಮೃತ 

ನಿತ್ಯ ನಿಮ್ಮ ಬಜಿಪೆ ಗುರುವೇ ನಿತ್ಯ ನಿಮ್ಮ ಸ್ತುತಿಪೆ ಗುರುವೇ

ರಚನೆ: ಆನಂದರಾಮ್, ಶೃಂಗೇರಿ  

ನಿತ್ಯ ನಿಮ್ಮ ಬಜಿಪೆ ಗುರುವೇ ನಿತ್ಯ ನಿಮ್ಮ ಸ್ತುತಿಪೆ ಗುರುವೇ

ಅಂತರಾಳದಿ ನೆಲೆ ನಿಂತ ನನ್ನದೆಂಬ ಬಾವ ಅಳಿಸಿ ಉದ್ಡರಿಸೋ ಗುರುವೇ|

ಬವರೋಗ ವೈದ್ಯ ನೀನು ಮೂಡ ಮನದ ಕ್ಲೇಶ ದೂರ ಮಾಡೋ

ದೃಷ್ಟಿಹೀನ ನಾನು  ಸರಿ ತಪ್ಪುಗಳ ಭೇದ ಅರಿಯದಾದೆನೊ ಗುರುವೇ|

ಸುಳ್ಳು ನುಡಿಯು ನಿನ್ನ ಮುಂದೆ ನಡೆಯಲಾರದೋ ಗುರುವೇ

ಉಗ್ರನಾಗಿ  ನುಡಿವಮಾತು ಬದುಕ ದಾರಿ ತೋರಿ ನಡೆಸಿದೆ  ಗುರುವೇ|

ದಯಾಮಯ ಗುರುವೇ ನೀನು ಪಾದಸೇವೆ ಭಾಗ್ಯ ನೀಡೋ ಗುರುವೇ

ಎನ್ನ ಶಿರವ ನಿನ್ನ ಪಾದಕಮಲದಡಿ ಇಡುವೆ ಮನ್ನಿಸಿ ಎನ್ನ ಹರಸು ಗುರುವೇ|

ಆಚಾರ ವಿಚಾರಗಳರಿವು ಈ  ಮನಕೆ ಇನ್ನೂ  ಇಲ್ಲ ಗುರುವೇ

ಮೌನದಿಂದ ನಿನ್ನ ಮುಂದೆ ಶಿರವಬಾಗಿ ಶರಣಾಗುವೆ ಓ ನನ್ನ ಗುರುವೇ|

ಗುರುನಾಥ ಗಾನಾಮೃತ 

ಕೃಪೆತೋರೋ ಗುರೋ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಕೃಪೆತೋರೋ ಗುರೋ

ಬೆಳಕ ನೀಡೋ ಗುರೋ

ಕಳೆವುದು ಮೋಹಮಾಯ |

ಕೈಯ ನೀಡೋ ಗುರೋ

ದಾರಿತೋರೋ ಗುರೋ

ಮರೆವುದು ಜಗದ ಮಾಯ ||

ಭವದಾ ಈ ಬಂಧನದಲ್ಲಿ

ಸುಖ ದುಃಖಗಳ ಸುಳಿಯಲ್ಲಿ

ಒಮ್ಮೆ ದೃಷ್ಟಿಬೀರು ಗುರುವೇ |

ಅಜ್ಞಾನದಾ ಕತ್ತಲೆಯಲ್ಲಿ

ದಾಸ್ಯದಾ ಸುಳಿಯಲ್ಲಿ

ಸತ್ಯದರ್ಶನವಾ ಮಾಡಿಸು ಗುರುವೇ || ೧ ||

ಬಂದು ಹೋಗುವ ಬಂಧುಜನರಲ್ಲಿ

ಚಿತ್ತವ ಕೆಡಿಸೋ ಚಂಚಲತೆಯಲ್ಲಿ 

ಆತ್ಮಬಂಧುವಾಗು ನೀ ಗುರುವೇ |

ಬೋಧವ ಮಾಡುವ ಬೋಧಕನಾಗಿ

ಸನ್ಮತಿಯ ತೋರುವಾ ಸಂತನಾಗಿ

ಮಾರ್ಗಬಂಧುವಾಗು ನೀ ಗುರುವೇ || ೨ ||

ಗುರುನಾಥ ಗಾನಾಮೃತ 

ಬರೆಯಲಾರೆ ಪದಗಳಲ್ಲಿ ನುಡಿಯಲಾರೆ ಮಾತಿನಲ್ಲಿ

ರಚನೆ: ಆನಂದರಾಮ್, ಶೃಂಗೇರಿ  

ಬರೆಯಲಾರೆ ಪದಗಳಲ್ಲಿ ನುಡಿಯಲಾರೆ ಮಾತಿನಲ್ಲಿ

ಮೌನದಲ್ಲಿ ಲೀನನಾಗಿ ಗುರುವೇ ನಿನ್ನ ಧ್ಯಾನದಲ್ಲಿ ಮುಳುಗಿ ಹೋದೆನೋ|

ಬರೆದು ಬರೆದು ಸೋತೆನೋ ಮನಸು ಭಾರವಾಗಿ  ನೊಂದೆನೋ

ನಿನ್ನ ಕರುಣೆ ಪಡೆಯಲಾರದೆ ನೊಂದು ಗುರುವೇ ನಿನ್ನ ಕೂಗಿ ಕರೆದೆನೋ |

ಹುಚ್ಚು ಮನವ  ನಿಲ್ಲಿಸದೆ ಎಲ್ಲೆ ಮೀರಿ ಓಡುತಿದೆ ಕರ್ಮ ಮಾಡುತಿದೆ

ಸುಳ್ಳ ನುಡಿಯ ನುಡಿಸಿ ಮನವು ಬದುಕ ಮಲಿನ ಮಾಡಿದೆ |

ನುಡಿವಮಾತು ಬೇರೆ ನಡೆವ ಕರ್ಮ ಬೇರೆ ಬದುಕು ಮಿಥ್ಯೆಯೆನಿಸಿದೆ

ತೋರಿಕೆಯೇ ಮೆರೆಯುತಿದೆ ಬಕುತಿ ಮರೆಯಾಗಿ 

ಅಹಂ ಎದ್ದು ನಿಂತಿದೆ|

ಗುರುವೇ ನಿನ್ನ ನಂಬಿ ನಡೆದರೆ ಬದುಕ ದಾರಿ ಸುಗಮವೋ

ಗುರುವೇ ಎಲ್ಲಾ ನೀನೆ ಎನ್ನದೇನು ಇಲ್ಲವೆಂದೆ ಬದುಕು ಹಸನವೋ|

ನಿನ್ನ ಕರುಣೆಗಾಗಿ ಹಂಬಲಿಸಿ ನಿತ್ಯ ನಿನ್ನ ನೆನೆವೆನೋ ಗುರುವೇ

ಮನವ ಶುದ್ದಗೊಳಿಸಿ ತನುವು ನಿನ್ನ ಸೇವೆ ನಡೆಸಿ ಧನ್ಯವಾಗಲಿ|

ಗುರುನಾಥ ಗಾನಾಮೃತ 

ಎಲ್ಲರಂತಲ್ಲಾ ನನ್ನ ಗುರುದೇವ ಬಲು ಕರುಣಾಳುವೋ

ರಚನೆ: ಆನಂದರಾಮ್, ಶೃಂಗೇರಿ  

ಎಲ್ಲರಂತಲ್ಲಾ ನನ್ನ ಗುರುದೇವ ಬಲು ಕರುಣಾಳುವೋ

ಬಲು ಸಜ್ಜನನೋ ಬಲು ಸರಳನೋ ನಮ್ಮ ಗುರುನಾಥನೋ|

ದೇಹಿ ಎಂದವರ ಎಂದೂ ಕೈ ಬಿಡನೊ ನಮ್ಮ ಗುರುವರನು

ಪರಿಹರಿಸಿ ನೋವುಗಳ ಕ್ಷಣಮಾತ್ರದಿ ಗುರುನಾಥನು|

ಬುದ್ದಿ ಹೇಳುತ ಶುದ್ದ ಮನಸ ಕೊಂಡಾಡುತಾ  ಹರಸುವನು

ಅನ್ಯರ ಗೊಡವೆ ಭೇಡೆನ್ನುತ ಸತ್ಯವರಿತು ಬಾಳೆಂದ ಗುರುನಾಥನು|

ತಂದೆ ತಾಯಿಯ ಗೌರವದಿ ಬಾಳಿಸೆಂದನೋ ಗುರುವು

ಮನ  ನೋಯಿಸದೆ ಒಡ ಹುಟ್ಟಿದವರೊಡಗೂಡಿ ಬಾಳೆಂದರು|

ಬದುಕಲಿ ಮಾನ ಅಪಮಾನ ಎರಡನು ಸಮಬಾವದಿ ಕಾಣೆಂದರು 

ಎಲ್ಲವನು ಅವಗರ್ಪಿಸಿ ಎನದೇನು ಇಲ್ಲವೆಂದೆನುತ ಬಾಳೆಂದರೋ|

ನಡೆದಾಡಿದ ದೇವ ಇವನು ಎಲ್ಲರೊಳ ಒಬ್ಬನಾಗಿ ದಾರಿ ತೋರಿದನೋ

ನಂಬಿ ಬರುವ ಬಕುತರ ನೋವ ತಾ ನುಂಗಿ ಮಹಾದೇವನಾದನೋ|

ಗುರುನಾಥ ಗಾನಾಮೃತ 

ಪೂಜಿಸಿರಿ ನಮ್ಮ ಗುರುದೇವನ ಮಹಾ ಮಹಿಮನ

ರಚನೆ: ಆನಂದರಾಮ್, ಶೃಂಗೇರಿ  

ಪೂಜಿಸಿರಿ ನಮ್ಮ ಗುರುದೇವನ ಮಹಾ ಮಹಿಮನ

ಬಜಿಸಿರಿ ಗುರುನಾಥನ ಎಲ್ಲರನೆಚ್ಚಿನ ಮಹಾದೇವನ|

ಹೂವಿನ ರಾಶಿಯಲಿ ಕುಳ್ಳಿರಿಸಿ ಪೂಜಿಸಿ ಅವಧೂತನ

ಮಲ್ಲಿಗೆ ಜಾಜಿಯೊಳು ಸಿಂಗರಿಸಿ ನಮ್ಮ ಗುರುನಾತನ|

ಗಂಧಾಕ್ಷತೆ ದೂಪ ದೀಪ ವೈಭವ ತೋರಿಸಿ ಬಜಿಸಿರಿ

ಎಳನೀರು ಸುಗಂದಿತ ದ್ರವ್ಯವ ಅಭಿಷೇಕ ಮಾಡಿರಿ|

ದಿವ್ಯ ಫಲ ಭವ್ಯ ಫಲವ ಅರ್ಪಿಸಿ ಗುರುನಾಥರಿಗೆ

ತಾಂಬೂಲ ದ್ರವ್ಯಾಧಿಗಳ ಸಮರ್ಪಿಸಿ ಗುರುದೇವಗೆ|

ವಿಧವಿಧದ ಆರತಿ ಬೆಳಗಿ ಬಲು ಮೋದದಿ ಬಜಿಸಿರಿ

ದೂಪದೀಪಗಳ ಸಂಭ್ರಮದಿ  ಗುರುವನು ವಂದಿಸಿರಿ|

ಮಂತ್ರಗಳ ಘೋಷದ ನಡುವೆ ಮೆರೆಸಿರಿ ಗುರುವರನ

ಪರಿಮಳ ಪುಷ್ಪದಿ  ಮಂತ್ರಪುಷ್ಪ  ಅರ್ಪಿಸಿ ಗುರುನಾಥಗೆ|

ಗುರುನಾಥ ಗಾನಾಮೃತ 

ನಿನ್ನ ಮುಂದೆ ನಿಂತೆನೋ ಎನೂ ಅರಿಯದಾದೆನೋ

ಗುರುವೇ 

ರಚನೆ: ಆನಂದರಾಮ್, ಶೃಂಗೇರಿ  

ನಿನ್ನ ಮುಂದೆ ನಿಂತೆನೋ ಎನೂ ಅರಿಯದಾದೆನೋ ಗುರುವೇ 

ಕೈ ಹಿಡಿಯುವೆಯೋ ಕೈ ಬಿಡಿಯುವೆಯೋ ಒಂದೂ  ತಿಳಿಯದಾದೆನೋ|

ಬೇಡಲು ಬಯವೋ ಗುರುವೇ ಕೈ ಮುಗಿದು ಮೌನದಿ ನಿಂತಿಹಿನೋ

ಮನದಿ ತುಂಬಿದ ದುಗುಡವ ಹೊರಲಾಗದೆ ಹೆದರಿ ಹೋಗಿಹೆನೋ|

ಹೇಗೆ ಪೂಜಿಸಲು ನೀ ಒಲಿದು ಎನ್ನ ಮನವ ತುಂಬುವೆಯೋ

ಏನು ಅರ್ಪಿಸಲಿ ನಿನಗೆ ಗುರುವೇ ಪಲವೋ ಪಂಚಾಮೃತವೋ|

ಶುದ್ದ ಬಾವ ಬೇಕೆನ್ನುವೆ ಗುರುವೇ ನೀನು  ಅದು ನನ್ನಲಿಲ್ಲವೋ

ನಿನ್ನ ಕರುಣೆ ಬೇಕೆನ್ನುವ ನಾನು ನಿನ್ನನು ಬೇಡಿ ಫಲವಿಲ್ಲವೋ|

ಸಂಸಾರ ನೌಕೆಯಲಿ ಸಾಗುತ ನಡೆವ ಕರ್ಮಕೆ ನಾನೇ ಹೊಣೆಯೋ

ನನ್ನನೇ ನಿನ್ನ ಪದಕಮಲಕೆ ಅರ್ಪಿಸಿರೆ ಎನಗೆ ಇನ್ಯಾತರ ಭಯವಿಲ್ಲವೋ|

ಗುರುನಾಥ ಗಾನಾಮೃತ 

ಮನುಜ ಜನುಮ ಬಹು ದುರ್ಲಬವು ಅರಿಯಿರೋ

ರಚನೆ: ಆನಂದರಾಮ್, ಶೃಂಗೇರಿ  

ಮನುಜ ಜನುಮ ಬಹು ದುರ್ಲಬವು ಅರಿಯಿರೋ

ಸಾಧಿಸಿ ಮೇಲೇರಿ ಎಂದನು ಗುರುವು ತಿಳಿಯಿರೋ|

ಎಲ್ಲಾ ಬ್ರಹ್ಮಮಯವು ಭೇದವೇತಕೋ ಎಂದರೋ

ಕಾಣದೆ ಚೈತನ್ಯವ   ಪರತಪಿಸುವೆಯಾಕೆ ಎಂದರೋ|

ಹರಿಕಾರ ಗುರಿಕಾರ ನೀನಲ್ಲ ಬರೀ ನೆಪ ಮಾತ್ರವೋ

ಅವನ ಪ್ರೇರಣೆಯ ಬಲದಿ ನಟಿಪ  ಕಲಾಕಾರನೋ|

ಮನವ  ಲಯಮಾಡಿ ಬಲುಆನಂದವ ಸವಿಯಿರೋ

ನಿರ್ಗುಣ ನಿರ್ವಿಕಾರನ ಅನಂತ ಮಹಿಮನ ಅರಿಯಿರೋ|

ಸಂಸಾರನೌಕೆಯಲಿ ಸಾಗುತ ನಿಮ್ಮ ಅರಿವ ಪಡೆಯಿರೋ

ಯಾವುದೂ ನಿಮದಲ್ಲವೆಂಬ ಸತ್ಯವ ಅರಿಯೀರೋ|

ನಿಮ್ಮ ಕಾರ್ಯವು ಅವನ ಅಣತಿಯಂತೆ ತಿಳಿಯಿರೋ

ಜೀವನ ನಾಟಕದ ಹರಿಕಾರ ಸೂತ್ರದಾರ ಅವನೆನ್ನಿರೋ|

ಮರು ಮಾತನಾಡದೆ ಮಹಾದೇವನಾ ನಂಬಿರೋ

ಬವ ಬಂದನ ಕಳಚಿ ಮುಕ್ತಿ ಕಾಣುವ ಮಾರ್ಗವಾ ಅರಿಯೀರೋ||

ಗುರುನಾಥ ಗಾನಾಮೃತ 

ಐದು ಬೆಲ್ಲದಚ್ಚಲೇ ಪೂರ್ವ

ರಚನೆ: ಅಂಬಾಸುತ 

ಐದು ಬೆಲ್ಲದಚ್ಚಲೇ ಪೂರ್ವ

ಕರ್ಮ ಕಳೆದ ಗುರುನಾಥ

ಇವನ ಮರ್ಮ ಅರಿಯಲಾದೀತೇ

ಇವಗಿನ್ಯಾರಾದರೂ ಸರಿಸಮರುಂಟೇ ||

ಭವ ಸಾಗರದಿ ಬಹು ನೊಂದು 

ಬಳಲಿ ಬೆಂಡಾದ ಭಾಮೆ

ಗುರುಮನೆಯ ಬಾಗಿಲಾ ತಟ್ಟಿದಳು ತಡವಿರದೆ

ಬದುಕಿದು ಸಾಕಿನ್ನು ಭಾರ ಬಹಳವಿಹುದು

ಉಸಿರ ನಿಲ್ಲಿಸು ಒಂದಿರುಳು

ಕೂಡ ತಡಮಾಡದೆ ಗುರುನಾಥ ಎಂದು ||

ಕರುಣಾಳು ಗುರುನಾಥ ಕರುಣೆಯಾ

ತೋರಿದಾ ಹುಸಿ ನಗೆಯ ಒಡನೆ

ಅಚ್ಚು ಐದು ಬೆಲ್ಲ  ಐದು ಮನೆಯಾಕೆಗೆ

ಸ್ವಚ್ಚ ಮನದಲಿ ಕೊಡಲು ಅಚ್ಚರಿಯು 

ನಿನಗಹುದು ಹುಚ್ಚುತನ ಬಿಡು

ಹಚ್ಚಹಸುರಿನ ಬಾಳು ಮುಂದೆ ನಿನಗಹುದೆಂದು ||

ಗುರುವಾಕ್ಯ ನೆಡೆಸಿದಳು ಭಾವುಕ ಭಕುತಳು

ಬೆಲ್ಲದಚ್ಚನು ನೀಡಿ ಭಕ್ತಿಯಿಂದಲೀ

ಕಷ್ಟ ಕಳೆಯಿತು ಆ ಕ್ಷಣ ನಿಷ್ಠೂರ ದೂರಾಯ್ತು

ಗುರು ಮಹಿಮೆಯಿಂದಲಿ ಗುರು ಮಹಿಮೆಯಿಂದಲಿ

ಎನುತ ಕಣ್ಣೀರಿಡುತ ನುಡಿದಳಾ ಭಾಮೆ

ಅಂಬಾಸುತನ ಮನವ ತೇವಗೊಳಿಸುತಲಿ ||

ಗುರುನಾಥ ಗಾನಾಮೃತ 

ಸಲಹಬೇಕೈ ಸದ್ಗುರುರಾಯ

ರಚನೆ: ಅಂಬಾಸುತ 

ಸಲಹಬೇಕೈ ಸದ್ಗುರುರಾಯ

ಬಲು ಆಯಾಸ ಈ ಭವ ಪ್ರಯಾಸವಾಗಿಹುದು ||ಪ||

ಪರಿಪರಿಯ ಮೋಹ ದಾಹದ ಬಾಧೆಗಳು

ಮರೆಸುತಿವೆ ಸಜ್ಜನಿಕೆಯಾ

ಮೆರೆಯುತ್ತಿಹೇ ನಾನೆಂಬಾ ಮಕುಟ ಹೊತ್ತು

ನಾಳೆ ಮರೆಯಾಗೊ ಈ ತನುವ ನೆಚ್ಚಿದ್ದು ||೧||

ಕಂಡು ಕಾಣದಂತಾಗೊ ಸುಖದ ಅಮಲು

ಕಂಗೆಡಿಸಿದೆ ಈ ಮನವಾ

ಕುಂದಿರೊ ಮಂದಭಾಗ್ಯನು ನಾನು ಅರಿವಿನ

ಕದ ತಟ್ಟದೇ ಕಾರಿರುಳಾ ಹೊಕ್ಕಿಹೆನಲ್ಲಾ ||೨||

ನಿಜವಾ ನಿರಾಕರಿಸಿ ಮದಗಜನಂತರಸಿ

ಸೋಜಿಗವೆಲ್ಲವ ಅಳಿಸಿದೆನೊ

ರಾಜೀಯ ಮಾತಿಲ್ಲ ರಾಜೀವಲೋಚನನಿಲ್ಲ

ಎನ್ನುತ್ತ ರೋಗವ ನಾನೇ ಕರೆದೇನಲ್ಲೋ ||೩||

ಗುರಿ ಇರದೆ ಗುರು ನೆನೆಯದೇ ಗತಿಮತಿ ತಿಳಿಯದೆ

ಗುಮ್ಮನಾನಾದೆನೋ ಅಸ್ಥಿತ್ವವಿರದ

ಅಂಬಾಸುತನ ಈ ಪದಕೇ ಈಡಾದೆನೊ

ಲೋಕಾದೊಳು ನರಕ ನಾ ಕಂಡು ಹೋದೆನೋ ||೪||

ಗುರುನಾಥ ಗಾನಾಮೃತ 

ತೊಟ್ಟಿಲೊಳಗಿಟ್ಟು ತೂಗೀರೇ ನಮ್ಮ ಗುರುನಾಥನಾ ಅವಧೂತನಾ 

ರಚನೆ: ಅಂಬಾಸುತ 

ತೊಟ್ಟಿಲೊಳಗಿಟ್ಟು ತೂಗೀರೇ ನಮ್ಮ ಗುರುನಾಥನಾ ಅವಧೂತನಾ ||ಪ||

ಪುಟ್ಟ ಕಂದನೆಂದು ಬಗೆದು ಪರಿಪರಿಯ ಹಾಡುಗಳ ಪಾಡುತ್ತ ನೀರೆಯರೇ ||ಅ.ಪ||

ಯೋಗನಿದ್ರೆಯ ಮಾಡುವ ಯೋಗೀವರ್ಯನ ಸಾನುರಾಗದಿಂದ

ಸಾಲದಿಹ ಮತಿಯಾ ನೀಡುವ ಸದ್ಗುರುನಾಥನ ಬಲುಪ್ರೇಮದಿಂದಾ ||೧||

ಪಟ್ಟವ ಬಿಟ್ಟು ಪುಟಕಿಟ್ಟ ಚಿನ್ನದಂತೆ ಕಂಗೊಳಿಸುತಿರುವನಾ

ಶಾರದೆ ಮಡಿಲೇರಿ ಬಂದಾ ಶ್ರೀ ಶ್ರೀನಿವಾಸನ ಸುತನಾ ||೨||

ಹುಸಿ ಮುನಿದು ತೋರಿ ಹಠ ಮಾಡಿ ಹೂಮಾಲೆ ಧರಿಸಿಕೊಳ್ಳದವನಾ

ಹಿರಿತನ ಸಿರಿತನ ದೊರೆತನ ಬಿಟ್ಟು ಗುರುತರ ಗುರುತನದಿಂದ ಮೆರೆದವನಾ ||೩||

ಸಖರಾಯಪುರದೊಳು ಸುಖವನ್ನೀಯುವ ಸಾತ್ವಿಕ ರೂಪವ ಧರಿಸಿದವನಾ

ಅಂಬಾಸುತನಾ ಭಾವಕೆ ಕಂದನಾಗಿ ಕಂಡು ಮುತ್ತೀನ ತೊಟ್ಟಿಲನೇರಿದವನಾ ||೪||

ಗುರುನಾಥ ಗಾನಾಮೃತ 

ಜಯ ಸಖರಾಯಪುರವಾಸ ಜಯ ಸದ್ಭಕ್ತಪಾಲಕ

ರಚನೆ: ಅಂಬಾಸುತ 

ಜಯ ಸಖರಾಯಪುರವಾಸ ಜಯ ಸದ್ಭಕ್ತಪಾಲಕ

ಜಯ ಪರಮೇಶ್ವರ ರೂಪ ಜಯ ಜಯ ಗುರುನಾಥ ||೧||

ಜಯ ಶ್ರೀನಿವಾಸ ಸುತ ಜಯ ಚಂದ್ರಶೇಖರ ನುತ

ಜಯ ಶ್ರೀಶಾರದ ಪ್ರೀತ ಜಯ ಜಯ ಗುರುನಾಥ ||೨||

ಜಯ ಸನ್ಮಾರ್ಗ ಬೋಧಕ ಜಯ ಸತ್ಕರ್ಮ ಕಾರಕ

ಜಯ ಸದ್ಧರ್ಮ ಪಾಲಕ ಜಯ ಜಯ ಗುರುನಾಥ  ||೩||

ಜಯ ಶ್ರೀಕೃಷ್ಣ ಯೋಗೀಂದ್ರ ಜಯ ಅವತಾರಿ ಪುರುಷ

ಜಯ ಯೋಗಿಜನ ವಂಧ್ಯ ಜಯ ಜಯ ಗುರುನಾಥ ||೪||

ಜಯ ಸದ್ಗುಣ ಸಾಕಾರ ಜಯ ನಿರ್ಗುಣ ನಿರಾಕಾರ

ಜಯ ಸದ್ವಿಚಾರ ಸಾಧಕ ಜಯ ಜಯ ಗುರುನಾಥ ||೫||

ಜಯ ಭವಬಂಧ ನಾಶಕ ಜಯ ನಿಜಾನಂದ ದಾಯಕ

ಜಯ ಆಧ್ಯಾತ್ಮ ನಿಜಸೂರ್ಯ ಜಯ ಜಯ ಗುರುನಾಥ ||೬||

ಜಯ ಆದ್ಯಂತ ರಹಿತ ಜಯ ಆತ್ಮಾನಂದ ವರಾ

ಜಯ ಶ್ರೀ ದೇಶೀಕೇಂದ್ರ ಜಯ ಜಯ ಗುರುನಾಥ ||೭||

ಜಯ ಅವಧೂತವರೇಣ್ಯ ಜಯ ಅಕ್ಷರ ಅನಂತಾ

ಜಯ ಅಂಬಾಸುತ ಪೋಷ ಜಯ ಜಯ ಗುರುನಾಥ ||೮||

ಗುರುನಾಥ ಗಾನಾಮೃತ 

ನೀ ರಥವನೇರುವುದಾ ಕಾಂಬುವ ಬಯಕೆ

ರಚನೆ: ಅಂಬಾಸುತ 

ನೀ ರಥವನೇರುವುದಾ ಕಾಂಬುವ ಬಯಕೆ

ಸದ್ಗುರುನಾಥ ನೀ ಸರ್ವಾಲಂಕಾರಯುಕ್ತನಾಗಿ ||ಪ||

ಕೋಟಿ ಕಣ್ಗಳು ಕಾಣಬಯಸಿಹವೊ

ನಿನ್ನ ರಥಾರೋಹಣವನ್ನು ಪತಿತಪಾವನನೇ

ಪರಿಪರಿಯ ಪುಷ್ಪಗಳಿಂದಲಂಕೃತಗೊಂಡು

ಛತ್ರಚಾಮರ ರಾಜಲಾಂಛನ ಮೊದಲಾಗಿ ||೧||

ಸುಸ್ವರದ ವೇದಮಂತ್ರಗಳೊಡನೇ

ಪಂಚವಾದ್ಯಗಳಾ ಸುನಾದದ ನಡುವೇ

ಭಕುತರ ಭಾವಿಕ ಭಜನೆಯಿಂದೊಡಗೂಡಿ

ಹೊನ್ನಿನ ಹಿರಿದಾದ ತೇರೊಳು ಗುರುವೇ ||೨||

ಈ ಭಾವಕೆ ಅಸ್ತು ಎನ್ನುತ ಬೇಗ

ಮನದ ಸಿರಿವಂತಿಕೆಯ ಮನ್ನಿಸಿ ಈಗ

ಬಯಕೆ ಹುಟ್ಟಿಸಿದವನೆ ಬಳಲಿಸದೆ ರಾಗ

ಹಾಕಿದ ಅಂಬಾಸುತನಾ ಪದ ಭಿನ್ನಹವಾಗಿ ||೩||