ಬದುಕಿನ ಮುಸ್ಸಂಜೆಯಲಿ ಸವೆಸಿದ ದಾರಿ ನೆನಪಾಗಿ ಮನವು ಭಾರವಾಯಿತೋ
ನಿನ್ನ ನೆನೆಯದಲೇ ಬದುಕು ನಡೆಸಿ ದಡ ಸೇರದ ನಾವೆಯಂತೆ ಗಾಳಿಗೆ ತೇಲಿತೋ|
ಬದುಕು ಮುಗಿದಿಲ್ಲ ಇನ್ನಾದರೂ ನಾಳೆಗೊಂದು ಅರ್ಥ ನೀಡಿ ನನ್ನ ಕರುಣಿಸೋ
ಅಲ್ಪರಲಿ ಅಲ್ಪನು ನಾನು ನಿನ್ನ ಕಣ್ಣಿಗೆ ಬಿದ್ದು ಹೆಜ್ಜೆ ಮುಂದಿಡಲು ಬೆಳಕ ತೋರೋ|
ಬದುಕಿಗೊಂದು ಅರ್ಥವೆನುವರು ಯಾವುದೂ ಅರಿಯದ ಮೂಡ ಜೀವಿಯು ನಾನೋ
ಸುಮ್ಮನೇ ಕಾಲ ಕಳೆದು ಲೌಕಿಕದಲಿ ಮಣ್ಣು ಹೊತ್ತು ಬರಡು ಬಾಳ ನಡೆಸಿದೆನೋ|
ಬದುಕು ನಡೆಸುವ ಬರದಿ ಬಾಳಿದುದೇ ಸರಿ ಎನುತ ಹಂಬಿನಲಿ ಹಾರಾಡಿದೆನೋ
ಬರೀ ಕಾಮವೇ ಕಾಂಚಾಣವೇ ಬದುಕೆನುತ ಸಂತೆಯೊಳು ಬದುಕಿ ಹಾಳಾದೆನೋ|
ಬದುಕು ಬರಡಾಗಿ ಬಾಡುವ ಮುನ್ನ ನಿನ್ನ ಪಾದಚರಣ ಬಯಸಿ ನಿನ್ನ ಮುಂದೆ ನಿಂತಿಹೆನೋ
ಕರುಣಿಸೆನೆಗೆ ಅಲ್ಪ ಸಮಯವಾದರೂ ಅರ್ಥ ಅರಿಯಲು ಓ ನನ್ನ ಸಖರಾಯಪುರದ ಗುರುನಾಥ|
