ಹರನೂ ನೀನೇ ಹರಿಯೂ ನೀನೇ - ರಚನೆ : ಶ್ರೀ. ಆನಂದ ರಾಮ್, ಶೃಂಗೇರಿ

ಹರನೂ ನೀನೇ ಹರಿಯೂ ನೀನೇ ನನ್ನ ಪಾಲಿಗೆ ಎಲ್ಲವೂ ನೀನೆ ಗುರುವೇ

ನೀನಿಲ್ಲದೇ ಬದುಕು ಇಲ್ಲವೆನಗೆ ಸದಾ ನಿನ್ನಲ್ಲೇ ಲೀನನಾಗಿಹೆ ಪ್ರಭುವೇ.

ಒಂದೊಂದು ಕ್ಷಣ ನಿನ್ನ ನೆನೆಯದೇ ಹೋದರೆ ಬೆದರುವುದು ಜೀವ

ನಿನ್ನ ಆಸರೆಯೊಂದೇ ಸಾಕೆನಗೆ ಬದುಕಿನ ಕೊನೆಯ ತನಕ ಬೇಡುವುದು ಜೀವ.

ನಿನ್ನ ಭಜಿಸುವ ಪರಿಯ ಅರಿಯಲಾರೆ ನಿನ್ನ ಇರುವಿನ ಅರಿವು ತಿಳಿಯಲಾರೆ

ನಿನ್ನ ಕೃಪೆಯ ಬೇಡಿ ಬರುವೆ ನಾನು ಬದುಕು ಬರಿದಾಗಿ ದಾರಿ ಕಾಣಲಾರೆ.

ತಪ್ಪು ಒಪ್ಪುಗಳ ಅರಿವಿಲ್ಲ ಎನಗೆ ದಾರಿ ತೋರುವ ಗುರು ನೀನಾಗು ಪ್ರಭುವೇ

ಅಂಧಕಾರ ಅಳಿಸಿ ಜ್ಞಾನವನು ಕರುಣಿಸಿ ಎನ್ನ ಪೊರೆಯೋ ಸಖರಾಯ ದೊರೆಯೇ.