ಗುರುನಾಥ ಗಾನಾಮೃತ 

ಕಂಡೇ ನಾ ಅವಧೂತನ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಕಂಡೇ ನಾ ಅವಧೂತನ

ಸಖರಾಯಾಧೀಶನಾ |

ಕಂಡೇ ನಾ ಚೈತನ್ಯನ

ಸಚ್ಚಿದಾನಂದನಾ ||

ಅನ್ನವನು ನೀಡುತಿಹ

 ಪರಬ್ರಹ್ಮನಾ

ಜೀವರಲಿ ಬೆರೆತಿಹ

ಉಸಿರಾಗಿಹಾ |

ಹೃದ್ದೀಪವ ಬೆಳಗುತಿಹ

 ಪರಂಜ್ಯೋತಿಯಾ

ಜ್ಞಾನವನು ನೀಡುತಿಹ 

ಮಹಾಜ್ಞಾನಿಯಾ || ೧ ||

ನರನಾರಿಯರಲಿ ಸಮತೆಯಿಹ 

ವಿಶ್ವಬಂಧುವಾ

ಅಣುರೇಣುಗಳಲಿ ಕಾಣುತಿಹ

ವಿಶ್ವವ್ಯಾಪಕನಾ |

ಆರ್ತರ ಕರ್ಮಕಳೆಯುವ

ವಿಶ್ವಪೂಜಿತನಾ

ಯಕ್ಷಕಿನ್ನರರು ಪೂಜಿಸುವ

ವಿಬುಧವಂದಿತನಾ || ೨ ||

ಭಕ್ತರ ಮನಗಳಲಿ ಅಡಗಿಹ

ಸುಪ್ತಚೇತನನಾ 

ಮನದಹಂಕಾರವ ತೊಲಗಿಸೋ

ಸನ್ಮತಿದಾಯಕನಾ |

ಕರುಣಾದೃಷ್ಟಿ ಬೀರುತಿಹ

ಪ್ರೇಮಪೂರ್ಣನಾ 

ಆತ್ಮತತ್ತ್ವವನು ಬೋಧಿಸುವ 

  ಗುರುಪುಂಗವನಾ || ೩ ||

ಗುರುನಾಥ ಗಾನಾಮೃತ 

ಗುರುವ ನಂಬಿರಯ್ಯಾ ಮನದಲಿ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗುರುವ ನಂಬಿರಯ್ಯಾ ಮನದಲಿ

ಗುರುವ ನಂಬಿರಯ್ಯಾ |

ಗುರಿಯ ಸೇರಿರಯ್ಯಾ ಜಗದಲಿ 

ಗುರಿಯ ಸೇರಿರಯ್ಯಾ ||

ಅಂಕೆಯಿಲ್ಲದ ಶುದ್ಧ ದೈವಕೆ

ಶಂಕೆಮಾಡದೆ ನಂಬಿರಯ್ಯಾ |

ಸಂಖ್ಯೆಯಿಲ್ಲದ ಜಪವ ಮಾಡಿ 

ಆತ್ಮನನು ಅರಿಯಿರಯ್ಯಾ || ೧ ||

ಚಿದ್ಘನರೂಪಿ  ಚಿದಾನಂದನ

ಚಿನ್ಮಯಭಾವದಿ ಭಜಿಸಿರಯ್ಯಾ |

ಭವದ ಚಿಂತೆಯ ದೂರಮಾಡಿ 

ಚೈತನ್ಯವ ಹೊಂದಿರಯ್ಯಾ || ೨ ||

ಸಾತ್ವಿಕಭಾವದ ಸತ್ಯಮೂರುತಿಗೆ 

ಸಾಧುಮನದಿ ನಮಿಸಿರಯ್ಯಾ |

ಮೋಹವನಳಿಸುವ ಮಂದಸ್ಮಿತನರ್ಚಿಸಿ

ಮುಕ್ತಿಮಾರ್ಗವ ಕಾಣಿರಯ್ಯಾ || ೩ ||

ಗುರುನಾಥ ಗಾನಾಮೃತ 

ಎಷ್ಟು ತಪಸಿನ ಪುಣ್ಯವೋ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಎಷ್ಟು ತಪಸಿನ ಪುಣ್ಯವೋ 

ಯಾವ ಹಿರಿಯರ ಭಾಗ್ಯವೋ  |

 ಲಭಿಸಿತೆಮಗೆ 

ಸದ್ಗುರುವ ಕಾಣುವ ಸೌಭಾಗ್ಯವು ||

ಹೊಸಿಲಲಿ ಗುರುವಿನ  

 ಪಾದಧೂಳಿಯ ಸ್ಪರ್ಷ |

ನೊಸಲಿಗೆ ಹಚ್ಚಿದೊಡೆ      

 ವಿನೂತನ ಹರ್ಷ ||

ಮನೆಯಂಗಳದಲ್ಲಿ ಅವರು   

 ನೆಡೆದಾಡಿದ ಪದಧೂಳಿ |

ಮನದಂಗಳದಲ್ಲಿ ಉಳಿಯಿತು 

ಅಚ್ಚಳಿಯದ ಗುರುಮೂರ್ತಿ ||

ಪ್ರೀತಿಯಿಂದ ಹರಸಿದ

ಅಮೂಲ್ಯ ಸ್ವರಸಿಂಚನ |

ಅನುರಣಿಸಿತ್ತು ಹೃದಯದಲಿ 

ಅಪೂರ್ವ ಸಿರಿಚಂದನ ||

ಪರಿತಪಿಸಿತ್ತು ಮನವು 

ಈ ಅಮೃತಘಳಿಗೆಗೆ  |

ಕರುಣಿಸಿದನು ಗುರುವು

ದೀನರಾ ಈ ಕೋರಿಕೆಗೆ ||

ಮನವನಾವರಿಸಿತ್ತು

ಅನಿರ್ವಚನೀಯ ಭಾವನೆ |

ಮಾತು ಬಾರದೇ ನಮಿಸಿತ್ತು 

ಮನದಲೇ ಗುರುಪಾದಕೆ ||

ಗುರುನಾಥ ಗಾನಾಮೃತ 

ಶರಣಾಗತನಾಗೆಲೆ ಮನವೆ

ರಚನೆ: ಅಂಬಾಸುತ 

ಶರಣಾಗತನಾಗೆಲೆ ಮನವೆ

ಸದ್ಗುರು ಘನ ಸಖರಾಯನಿಗೆ  ||ಪ||

ಶರಣಾಗತರನು ಕಾಯುವನವನು

ಅತಿಷಯ ವರಗಳ ನೀಡುವನು

ವರ್ಣಿಸಲಸದಳ ಮಹಿಮನು ಅವನು

ಸ್ವಾತ್ಮಾರಾಮನು ಸುಂದರನು ||೧||

ಪಾಪರಾಶಿಗಳ ಸುಡುವವನವನು

ಕಣ್ಣೋಟದೇ ಎಮ್ಮ ಉದ್ಧರಿಸುವನು

ಮುತ್ತಿನಂಥಾ ಮಾತುಗಳಾ ಆಡುವವನು

ಮಾತಿಂದಲೇ ಮನಕ್ಲೇಶ ಹರಿಸುವನು ||೨||

ತೋರಿಕೆಗೆ ಸಿಟ್ಟಾಗುವನು

ತನ್ಮಯ ಭಕ್ತಿಗೆ ಒಲಿಯುವನು

ನಿಜಮುಕ್ತಿದಾಯಕನು ಬೋಧರೂಪನು

ಭಕುತರ ಪಾಲಿಗೆ ಭಾಗ್ಯನಿವನು ||೩||

ಗತಿ ಮತಿ ಪಾಲಿಸೊ ಗುರುವೇ ಎನುತಾ

ಸಖರಾಯಪುರವಾಸಿ ಕಾಯೋ ಎನುತಾ

ದಾಸ ಅಂಬಾಸುತನ ದೊರೆಯೇ ಎನುತಾ

ಬಿಡದೇ ಅವನಡಿಯನ್ನೇ ಪಿಡಿಯುತಾ ||೪||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ಅಜ್ಞಾನಂ ವರ್ತತೇ ಯತ್ರ 

ರಾಜತೇ ಶೋಕಾದಿ ಮೋಹಾಃ |

ಆತ್ಮೈಕತ್ವೇ ಸ್ಥಿತೇ ಯತ್ರ 

ಕುತೋ ಶೋಕಮೋಹಾದಯಃ ||

ಅಜ್ಞಾನವು ಎಲ್ಲಿ ಇರುವುದೋ ಅಲ್ಲಿ ಶೋಕಮೋಹಗಳು ಇರುತ್ತವೆ.ಆದರೆ ಆತ್ಮೈಕತ್ವವು ಎಲ್ಲಿ ಇರುವುದೋ ಅಲ್ಲಿ ಶೋಕಮೋಹಗಳೆಂಬ ಭಾವಗಳ ಉಗಮವಾದರೂ ಹೇಗಾಗುವುದು.

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ಸುಲಭವಲ್ಲವೀ ಗುರುಸೇವೆ ಮನುಜರಿಗೆಲ್ಲಾ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಸುಲಭವಲ್ಲವೀ ಗುರುಸೇವೆ ಮನುಜರಿಗೆಲ್ಲಾ

ಸುಲಭವಲ್ಲವೀ ಗುರುಸೇವೆ ಮರುಳರಿಗೆಲ್ಲಾ || 

ಇಹಕು ಗುರುವೇ ಗತಿಯು

ಪರಕೂ ಅವನೇ ಮತಿಯು |

ಗುರುಪಾದವಲ್ಲದೆ ಬೇರೇನು

ಅರಿತು ಸಾಗಿದರೆ ಹಾಲ್ಜೇನು || ೧ ||

ಕಣ್ಣು ಮುಚ್ಚಿದರೆ ಗುರುವಿನ ಬಿಂಬ  

ಕಣ್ಣ ತೆರೆದರೆ ಅವನ ಪ್ರತಿಬಿಂಬ |

ಹೋದೆಲ್ಲಲ್ಲಾ ‌ಬರುವ ಜೊತೆಯಲ್ಲಿ

ಮಾತೆಲ್ಲಲ್ಲಾ ನುಡಿವ ಹರ್ಷದಲ್ಲಿ || ೨ ||

ನೀನೇ ದೈವ ಬದುಕಿನಲಿ

ನೀನೇ ಸಕಲ ಜನ್ಮದಲಿ ।

ಉಸಿರಾಡುವೆ ನಿನ್ನ ನಾಮದಲ್ಲಿ

ಬೆಳಕ ಪಡೆವೆ ನಿನ್ನ ನಗೆಯಲ್ಲಿ ।। ೩ ।।

ಗುರುನಾಥ ಗಾನಾಮೃತ 

ಎನ್ನಂಥ ಪಾಪಿ ಇಲ್ಲ ನಿನಗಿಂತ ಪರಮನಿಲ್ಲ

ರಚನೆ: ಅಂಬಾಸುತ 

ಎನ್ನಂಥ ಪಾಪಿ ಇಲ್ಲ ನಿನಗಿಂತ ಪರಮನಿಲ್ಲ

ಪರಿಪಾಲಿಸಲೇಬೇಕೋ ಗುರುನಾಥಾ ||ಪ||

ಪರಿಪರಿಯ ಈ ಅಕ್ಷರ ಪುಷ್ಪಗಳನ್ನು

ನಿನ್ನಡಿಯೊಳಿಟ್ಟಿರುವೆ ಅನುಗ್ರಹಿಸೋ ||ಅ.ಪ||

ಮೂಢನಾಗಿಹೆನೋ ಬಹು ಮಾತನಾಡುತಿಹೆನೊ

ಮೋಹ ದಾಹ ಮಾಯೆಯೊಳಗೆ ನಾ ಸಿಲುಕಿಹೆನೊ

ಮೂಢತ್ವವನು ಕಳೆಯೋ ಮೌನವಾ ಎನ್ನಲಿರಿಸೊ

ಮಾಯಾ ಪ್ರಪಂಚವ ಮರೆಸೀ ಎನ್ನನಿರಿಸೊ ||೧||

ಧರ್ಮ ಕರ್ಮ ಅರಿಯದೆ ಚರ್ಮದಿ ಮನಸನ್ನಿಟ್ಟೆ

ದೈವ ಗುರುಹಿರಿಯರ ನಿಂದಿಸಿ ನಾ ಸೋತೆ

ಜಗ ಮರ್ಮವ ತಿಳಿಸೋ ಆಸೆಯನ್ನಳಿಸೊ

ಭಕ್ತಿ ಬೀಜವ ನೆಡಲು ಮನವಾ ಹದಗೊಳಿಸೊ ||೨||

ಸಖರಾಯಪಟ್ಟಣದ ಸದ್ಗುರುನಾಥನೆ

ಅಜಹರಿಹರರಾ ನಿಜ ರೂಪದಿಂದಿರುವನೆ

ಅಂಬಾಸುತನಾ ಈ ಅರಿಕೆಯಾ ಆಲಿಸೊ

ಪಾಪ ಕಳೆದೂ ಅವನಾ ಅಂತರಂಗದೊಳು ನೆಲೆಸೊ ||೩||

ಗುರುನಾಥ ಗಾನಾಮೃತ 

ಸಖರಾಯ ಸಖರಾಯ ಸಖರಾಯನೇ

ರಚನೆ: ಅಂಬಾಸುತ 

ಸಖರಾಯ ಸಖರಾಯ ಸಖರಾಯನೇ

ನಿಜ ಸುಖ ನೀಡೋ ಸಖ ಎನಗೆ ನೀನೇನೇ ||ಪ||

ಕಲ್ಲೆದೆಯಾ ಕರಗಿಸಿದೆ ಸಖರಾಯನೇ

ಮೆಲ್ಲಗೆ ಉಳಿ ಇಟ್ಟು ಶಿಲೆಯ ಕಲೆಯಾಗಿಸಿದೆ

ಪ್ರೇಮಪಾಶದಿ ಬಂಧಿಸಿದೆ ಎನ್ನ ಸಖರಾಯನೇ

ಪಾಪ ಛಾಯೆ ಕಳೆಯುತಾ ಪಾವನನನ್ನಾಗಿಸಿದೆ ||೧||

ಸೂತ್ರ ಶಾಸ್ತ್ರ ಮಂತ್ರ ನೀನೇ ಸಖರಾಯನೇ

ಅನ್ನ ವಸ್ತ್ರವಿತ್ತು ಎನ್ನಹಂಕಾರ ನೀ ಕಳೆದೇ

ನಕ್ಕು ಎನ್ನನು ಬರಸೆಳೆದೇ ಸಖರಾಯನೇ

ಮುಂದೆಂದೂ ನಾ ಅಳದಂತೆ ನೀ ಸಲಹಿಹೇ ||೨||

ಕಲ್ಪನೆ ಕೆಡುಹಿದೆ ಸಖರಾಯನೇ

ವಾಸ್ತವದಿ ಸಾಧನೆಗೆ ದಾರಿ ತೋರಿದೇ

ಗುರುನಾಥ ಅವಧೂತ ಸಖರಾಯನೇ

ಅಂಬಾಸುತನಾ ಅರಿವಿನ ದೊರೆ ನೀನೇ ||೩||

ಗುರುನಾಥ ಗಾನಾಮೃತ 

ಬಹು ಪುಣ್ಯಫಲದಿಂದಾ ಗುರುವರನ ನಾ ಕಂಡೇ

ರಚನೆ: ಅಂಬಾಸುತ 

ಬಹು ಪುಣ್ಯಫಲದಿಂದಾ ಗುರುವರನ ನಾ ಕಂಡೇ

ಅವನಿತ್ತ ಕರುಣೆಯೆಂಬಾ ಅಮೃತವಾ ನಾನುಂಡೇ ||ಪ||

ಗತಿಸಿಹೋದವು ಪಾಪವೆಲ್ಲವೂ ಸ್ತುತಿಸಲೆನ್ನ ಗುರುವರನಾ

ಕ್ಷಿತಿಯೊಳಾರನು ನಾ ಕಣೆ ಇವನಂಥಾ ಮಹಿಮನಾ ||೧||

ಎಂಥಾ ಮೂರುತಿಯೋ ಇವನದೆಂತ ಕೀರುತಿಯೋ

ಕಂಡೊಡನೆ ಕಣ್ಣಲ್ಲೇ ಆರತಿಯ ಮಾಡುವಂತಿಹಾ ||೨||

ಇವನ ಸಾನಿಧ್ಯದೊಳೇ ಕೈಲಾಸ ವೈಕುಂಠಾ

ನಕ್ಕರಿವ ರಮಾಕಾಂತ ಮುನಿದರೆ ಮಹಾರುದ್ರಾ ||೩||

ಭಾಗ್ಯ ಭೋಗವ ಬೇಡೆನು ಮೋಕ್ಷಪದವಿಯ ನಾ ಬೇಡೆನು

ಮತ್ತೆ  ಮತ್ತೆ ಹುಟ್ಟಿ ಬಂದು ಇವನ ಸಾನಿಧ್ಯವನೆ ಬೇಡುವೇ ||೪||

ಸಖರಾಯಪಟ್ಟಣದ ಅವಧೂತನಿವನಂತೆ

ಅಂಬಾಸುತನಾ ಪದ ಪದದೊಳು ಇವನ ಪಾದವಂತೇ ||೫||

ಗುರುನಾಥ ಗಾನಾಮೃತ 

ನನ್ನತನವ ಸುಡುವ ಅಗ್ನಿ

ರಚನೆ: ಅಂಬಾಸುತ 

ನನ್ನತನವ ಸುಡುವ ಅಗ್ನಿ

ನಿನ್ನ ಚರಣದಲ್ಲಿಹುದು

ನಿನ್ನ ಚರಣ ಸೇರೋ ಬಯಕೆ

ಎನ್ನ ಮನದಲ್ಲಿಹುದು ||ಪ||

ನನ್ನತನವ ಬೆಳೆಸಿಕೊಂಡು

ನಾನೇ ಕುಗ್ಗಿ ಹೋಗಿಹೆನೂ

ನಿನ್ನ ಚರಣ ಕಾಣದೇ

ಬಳಲಿ ಬೆಂಡಾಗಿಹೆನೂ ||೧||

ಯತ್ನಪಟ್ಟು ಸೋತು ನಿಂತೆ

ನಿನ್ನಡಿಯಾ ಕಾಣಲೂ

ಅರಿಯದಾದೆ ನೀ ಕರವಾ

ಪಿಡಿಯದೆ ಅದು ಆಗದೆಂದು ||೨||

ಅದರಿದೇ ಒದರಿದೇ

ನಾನೆಂದು ಹೆದರಿಸಿದೇ

ನೀನೆಂಬುದ ತೋರಿಸುವಾ

ನಿನ್ನ ಕರುಣೆ ಪಡೆಯದೇ ||೩||

ಗುರುಪಾದದ ಅಗ್ನಿ ಎಂದು

ನನ್ನತನವ ದಹಿಸುವುದೋ

ಶಾಂತ ಭಾವ ನೀಡುತಾ

ಮನ ಭಾರವ ಇಳಿಸುವುದೋ ||೪||

ಗುರುನಾಥ ಗಾನಾಮೃತ 

ನವವಿಧ ಭಕ್ತಿಯೆಂಬಾ 

ರಚನೆ: ಅಂಬಾಸುತ 

ನವವಿಧ ಭಕ್ತಿಯೆಂಬಾ 

ಬಣ್ಣ ತಂದು ಗುರುವಿನೊಡನೇ

ಹೋಳಿಯಾಡೋಣಾ

ಸದ್ಗುರುವಾ ನೆನೆಯೋಣಾ ||ಪ||

ಕಾಮನ ದಹಿಸಿದ ಪರಮೇಶ್ವರ ನೀ

ಕಳೆಯೋ ಕಾಮ ಕ್ರೋಧವ  ಎನುತಾ

ಹೋಳಿಯಾಡೋಣಾ ಸದ್ಗುರುವಾ ನೆನೆಯೋಣಾ ||೧||

ಕಾಮನ ಪಿತ ಶ್ರೀಕೃಷ್ಣಾ ನೀನೇ

ಕಾಯಾ ವಾಚಾ ಮನಸಾ ನಮಿಪೆ ಎನುತಾ 

ಹೋಳಿಯಾಡೋಣಾ ಸದ್ಗುರುವಾ ನೆನೆಯೋಣಾ ||೨||

ಬಣ್ಣ ಕೆಡಿಸುವವನು ನೀ ಹೊಂಬಣ್ಣ ನೀಡುವನು ನೀನೇ

ಭವದ ಬಂಧ ಹರಿಸೋ ಎನುತಾ

ಹೋಳಿಯಾಡೋಣಾ ಸದ್ಗುರುವಾ ನೆನೆಯೋಣಾ ||೩||

ಸಖರಾಯಪಟ್ಟಣದ ಅವಧೂತ ಗುರುನಾಥ

ಅಂಬಾಸುತನ ಅಂತರಂಗವಾಸ ನೀನೆನುತಾ

ಹೋಳಿಯಾಡೋಣಾ ಸದ್ಗುರುವಾ ನೆನೆಯೋಣಾ ||೪||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ಭಕ್ತಿಯೋಗೋ ವಾ ಚ ಜ್ಞಾನಂ

ರಾಜಯೋಗೋ ವಾ ಚ ಕರ್ಮ !

ಚತುರ್ಯೋಗೇಷ್ವೇಕೇನೈವ  

 ಆತ್ಮಜ್ಞಾನಂ ಸುಸಿಧ್ಯತೇ !!

ಭಕ್ತಿಯೋಗ ಜ್ಞಾನಯೋಗ ಕರ್ಮಯೋಗ ರಾಜಯೋಗ ಎಂಬ ನಾಲ್ಕು ಯೋಗಗಳಿವೆ. ಈ ನಾಲ್ಕು ಯೋಗಗಳಲ್ಲಿ ಯಾವುದನ್ನೇ ಅನುಸರಿಸಿದರೂ ಅವನು  ಆತ್ಮಜ್ಞಾನವ ಅರಿಯುತ್ತಾನೆ. ಈ ನಾಲ್ಕರಲ್ಲಿ ಯಾವ ಯೋಗವನ್ನು ಅಭ್ಯಾಸ ಮಾಡಿದರೂ ಉಳಿದ ಎಲ್ಲಾ ಯೋಗಗಳು ಅದರ ಹಿಂದೆ ಬರುತ್ತದೆ.

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು