ಗುರುನಾಥ ಗಾನಾಮೃತ 

ವರವೊಂದ ನೀಡಯ್ಯಾ ಗುರುದೇವ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ವರವೊಂದ ನೀಡಯ್ಯಾ ಗುರುದೇವ

ಅಂಜಲಿಪಿಡಿದು ಬೇಡುತಿಹೆ ನಾನು

ವರವೊಂದ ನೀಡಯ್ಯಾ ಗುರುವೇ ||

ಮನದ ಬಿಂಬದಲಿ ನೀನಿಹೆ ದೇವ

ನೀನಿಲ್ಲದೆ ಗತಿಯಾರೆನಗೆ ಗುರುದೇವ !|

ಮನೋವಾಕ್ಕಾಯಗಳಲಿ ತುಂಬಿರಲಿ ನಿನ್ನ ಮೂರುತಿ

ಶಾಂತಮಂದಿರದಿ ನೆನೆಯಲಿ ನಿನ್ನ ಕೀರುತಿ || ೧ ||

ಕಂಗಳಲಿ ತುಂಬಿಹುದು ಆರ್ತತೆಯ ಕಣ್ಣೀರು

ಮನದಲಿ ಹರಿದಿಹುದು ಭಕ್ತಿರಸದಾ ಪನ್ನೀರು |

ನಿ‌ನ್ನ ಸೇವೆಧ್ಯಾನವೆಮ್ಮಯ ಉಸಿರಾಗಲೀ 

ನಿನ್ನ ಮಾತೇ  ಅನುಶಾಸನವಾಗಲೀ || ೨ ||

ಮೌನಮನವು ಕಾಯುತಿದೆ ನಿನ್ನ ವರವ 

ಅಂತರಂಗವು ಬೇಡುತಿದೆ ನಿನ್ನ ಕರುಣೆಯ |

ನಿನ್ನ ಮಹಿಮೆಯು ನಮಗೆ ಅಮೃತವಾಗಲೀ

ಸುಮಾರ್ಗದಿ‌ ನೆಡೆದು ನಿನ್ನ ಪಾದವ ಸೇರುವಂತಾಗಲೀ || ೩ ||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ದೈವರುಷ್ಟೋ ಗುರುಸ್ತ್ರಾತಾ

ಗುರುರುಷ್ಟೋ ಕೋ ರಕ್ಷಕಃ !

ಸೇವಯಾ ಪ್ರೀಯತೇ ಗುರುಃ 

ಪೀಡಯಾ ಕೃದ್ಧ್ಯತೇ ಗುರುಃ ||

ಅಜಹರಿಹರಾದಿ ದೈವಗಳು ಕೋಪಗೊಂಡರೆ ಗುರುವು ರಕ್ಷಕನಾಗುತ್ತಾನೆ.ಗುರುವೇ ಕೋಪಗೊಂಡರೆ ಮತ್ತಿನ್ನಾರು ರಕ್ಷಕರು ಇಹರು.ಮನಶುದ್ಧಿಯ ಸೇವೆಯು ಗುರುವಿಗೆ ಪ್ರಿಯವಾದುದು.ಪರಪೀಡೆಯಿಂದ ಗುರುವು ಅತ್ಯಂತ ಕೃದ್ಧನಾಗುತ್ತಾನೆ.

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ಭಕುತಿ ನೀಡೊ ಗುರುವೇ ಭಕುತಿ ನೀಡೊ

ರಚನೆ: ಅಂಬಾಸುತ 

ಭಕುತಿ ನೀಡೊ ಗುರುವೇ ಭಕುತಿ ನೀಡೊ

ಭಕುತಿ ನೀಡೊ ಗುರುವೇ ಭಕುತಿ ನೀಡೊ||ಪ||

ಮುಕುತಿಗಾಗಲ್ಲವೋ ಶಕುತಿಗಾಗಲ್ಲವೋ

ವಿರಕುತಿಗಾಗಲ್ಲವೋ ವಿಶೇಷತೆಗಾಗಲ್ಲವೋ ||ಅ.ಪ||

ಸತ್ಯ ಸಚ್ಚಿದಾನಂದನೆ ನಿನ್ನನು ನಿತ್ಯವು ಭಜಿಸಲು

ಮಿಥ್ಯೆ ಅಳಿಸುವ ಬೋಧರೂಪನೆ ನಿನ್ನನು ನೆನೆಯಲು

ಹೆತ್ತ ತಾಯ್ತಂದೆಯಂತಿರುವವನೆ ನಿನ್ನನು ಸ್ತುತಿಸಲು

ಅಚ್ಚಳಿಯದ ಮನಮಂದಿರವಾಸನ ಅರ್ಚಿಸಿ ಪೂಜಿಸಲು ||೧||

ಅಂತರಂಗದ ಆತ್ಮಬಂಧುವೇ ನಿನ್ನನು ಅರಿಯಲು

ಆಗಮ ನಿಗಮ ಸ್ತುತಿಸಿದ ರೂಪನೆ ನಿನ್ನನು ಕಾಣಲು

ಅಜಹರಿಹರರು ಒಂದಾದ ನಿನ್ನ ಮೂರತಿ ಸ್ಪರ್ಶಿಸಲು

ನಿನ್ನ ನುಡಿಯೆಂಬಾ ಅನಂದಾಮೃತವನೆ ಸವಿಯಲು||೨||

ನಶ್ವರಕಾಯದಿ ಈಶ್ವರನಾ ಕಂಡು ಪುನೀತನಾಗಲು

ನಾ ನಿನ್ನೊಳಗೆ ಒಂದಾಗಿ ಸದಾ ನಲಿಯಲು

ಸಖರಾಯಪುರದಾ ಸದ್ಗುರುನಾಥನೆ ನಿನ್ನ ಸೇವೆಯೊಳಗಿರಲು

ಅಂಬಾಸುತ ನಾ ಅನವರತಾ ಸದ್ಗುರು ಎನುತಿರಲು ||೩||

ಗುರುನಾಥ ಗಾನಾಮೃತ 

ಸದಾ ನಿನ್ನ ದಿವ್ಯಚರಣವ ನೆನೆವ ಮನವ ನೀಡೊ

ರಚನೆ: ಅಂಬಾಸುತ 

ಸದಾ ನಿನ್ನ ದಿವ್ಯಚರಣವ ನೆನೆವ ಮನವ ನೀಡೊ

ನಾನು ನಿನ್ನೊಳು ಬೆರೆತು ಹೋಗುವಾ ಸ್ವಾನಂದವ ನೀಡೊ ||ಪ||

ಆಸೆಗಳನು ಅಳಿಸಿ ಗುರುವೆ ಆತಂಕವ ಕಳೆಯೊ

ಹಗಲು ರಾತ್ರಿ ಎನ್ನದೆ ನಿನ್ನ ಸ್ಮರಣೆಯೊಳಗೆ ಎನ್ನ ಮರೆಸೊ

ನಿನ್ನ ನಾಮವೊಂದೇ ಎನಗೆ ಅನ್ನ ನೀರು ಉಸಿರಾಗಿರಲಿ

ಈ ಕಣ್ಣಿನಲ್ಲಿ ನಿನ್ನ ಮೂರುತಿಯೇ ನಿತ್ಯವೂ ತುಂಬಿರಲಿ ||೧||

ನಿನ್ನ ಮಹಿಮೆಗಳನು ನೆನೆವುದೆ ಎನಗೆ ಸತ್ಸಂಗವು

ಹೃದಯ ಮಂದಿರದೊಳು ನೀನಿರಲು ಪರಮಾತ್ಮನ ಸಾಮೀಪ್ಯವು

ಬೇಡೆ ನಾನು ಸಾಯುಜ್ಯವ ಗುರುವೇ ನೀನೆಗಿರಲು

ಸಾಧಕನಾನಾಗಲಾರೇ ನಿಜಸಂತ ನಿನ್ನ ಸೇವೆ ಬಿಟ್ಟು ||೨||

ನೀ ಸಖರಾಯನು ಅಂಬಾಸುತ ಆತ್ಮಬಂಧು

ಅಂತರಂಗದೊಡೆಯ ಅಗಣಿತ ಅನಾಥರಾ ಬಂಧು

ಬೇಡುವೇ ನಿನ್ನಡಿಗೆ ಬಾಗುತಾ ನಿನ್ನ ಸೇವೆಯ ನೀಡೊ

ಇದೆ ಎನ್ನ ಕೋರಿಕೆಯು ಕನಿಕರಿಸಿ ಹರಸೊ ||೩||

ಗುರುನಾಥ ಗಾನಾಮೃತ 

ಮನಮಲ್ಲಿಗೆಯ ಇಡು ನೀ ಗುರುಪಾದಕೇ

ರಚನೆ: ಅಂಬಾಸುತ 

ಮನಮಲ್ಲಿಗೆಯ ಇಡು ನೀ ಗುರುಪಾದಕೇ

ಆ ಯೋಗಿ ಬರುತಾನೆ ನಿನ್ನ ಉದ್ಧರಿಸುವುದಕ್ಕೇ ||ಪ||

ಧನವಾ ಕೇಳನು ಅವನು ಧಾನ್ಯ ಕೇಳನು ಅವನು

ಕಾಂಚಾಣ ಕೊಪ್ಪರಿಗೆ ಎಂದೂ ಕೇಳನು

ಪೂಜೆ ಕೇಳನು ವಾಜೀ ಉತ್ಸವ ಕೇಳನವನು

ರಾಜ ಮರ್ಯಾದೆಯಾ ಎಂದೀಗೂ ಬಯಸನು ||೧||

ಶುದ್ಧಃಂತಕರಣದಿಂದ ಅವನಿಗೆ ಬದ್ದನಾಗೇ

ಅವನಿಯ ತಾಪವ ಹರಿಸುವನು

ಅವರಿವರೆಂದು ಅನ್ಯರ ಪಾದ ಪಿಡಿಯದೇ

ಗುರು ನೀನೇ ಗತಿ ಎನಲು ಕಾಯುವನು ||೨||

ಸೇವಕನಾಗು ಅವನ ಮನೆಬಾಗಿಲಾ ಕಾಯ್ದು

ಸಾವಿರದ ಪುಣ್ಯವು ನಿನಗುಂಟು

ಸೋಗಿನ ಮನಬಿಟ್ಟು ಅವನಾ ಚರಣಕ್ಕೆರಗೆ

ಸ್ವರ್ಗವ ಇಳೆಯಲ್ಲೇ ತೋರಿಸುವನು ||೩||

ಸಖರಾಯಪುರದಿಂದ ನಿನ್ನಾ ನಿಜಸಖನು

ಆತ್ಮದ ಮೊರೆ ಕೇಳಿ ಓಡಿ ಬರುವನು

ಅಂಬಾಸುತನ ಅಂತರಂಗದಾ ಮಾತಿದು

ನಮ್ಮೀ ಅವಧೂತನು ನಿಜಭಗವಂತನು ||೪||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ಜ್ಞಾನೇನ ಲಭ್ಯತೇ ಸ್ಥಿರಂ

ಜ್ಞಾನೇನ ಸಾಧ್ಯತೇ ಸರ್ವಂ |

ಜ್ಞಾನೇನ ವಂದ್ಯತೇ ನರಃ 

ಜ್ಞಾನದಾತ್ರೇ ಗುರುಂ ವಂದೇ ||

ಪ್ರಕರ್ಷವಾದ ಜ್ಞಾನದಿಂದ ಶಾಶ್ವತವಾದುದು ಲಭ್ಯವಾಗುತ್ತದೆ.ಉತ್ತಮ ಜ್ಞಾನದಿಂದಲೇ ಸಕಲವೂ ಸಾಧ್ಯವಾಗುತ್ತದೆ.ಜ್ಞಾನವಂತನಾದ ಮನುಜನು ಎಲ್ಲರಿಂದಲೂ ಗೌರವಿಸಲ್ಪಡುತ್ತಾನೆ. ಇಂತಹ ಸರ್ವಶ್ರೇಷ್ಠ ಜ್ಞಾನವನ್ನು ನೀಡುವಂತಹ ಸದ್ಗುರುವಿಗೆ ನಮಸ್ಕರಿಸುತ್ತೇನೆ...

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ಶ್ರೀಗುರುನಾಥ ಸದ್ಗುರುನಾಥ ಶ್ರೀವೇಂಕಟಾಚಲ ಅವಧೂತಾ

ರಚನೆ: ಅಂಬಾಸುತ 

ಶ್ರೀಗುರುನಾಥ ಸದ್ಗುರುನಾಥ ಶ್ರೀವೇಂಕಟಾಚಲ ಅವಧೂತಾ

ಶ್ರೀಗುರುನಾಥ ಸದ್ಗುರುನಾಥ ಶ್ರೀವೇಂಕಟಾಚಲ ಅವಧೂತಾ        ||ಪ||

ಶ್ರೀನಿವಾಸ ಶ್ರೀಶಾರದಾತನಯ ಶ್ರೀವೇಂಕಟಾಚಲ ನಾಮಾಂಕಿತ

ಧರೆಯನುದ್ಧರಿಸೆ ಅವತರಿಸಿದಾ ಸಾಕ್ಷಾತ್ ದತ್ತನವತಾರಿ ||೧||

ಶ್ರಿತಜನ ಪಾಲಕ ಕ್ಷಿತಿಯೊಳಗುತ್ತಮ ಕರುಣಾಸಾಗರನೇ

ಬಿರುದು ಬಿಟ್ಟು ಬಾಧೆಗಳ ಸುಟ್ಟು ಭವ ಹರಿಸುವಾ ಪ್ರಭುವೆ ||೨||

ನಗುವೆ ಒಮ್ಮೆ ನೀ ಮುನಿವೆ ಮತ್ತೊಮ್ಮೆ ನಿನ್ನ ಅರಿವರ್ಯಾರೋ

ಊಹೆಗೆ ನಿಲುಕದ ಅನುಭವ ವೇದ್ಯನೆ ಕರವ ಮುಗಿವೆ ಬಾರೋ ||೩||

ಧರ್ಮ ಕರ್ಮದಾ ಬೋಧರೂಪ ನೀ ಸ್ವಾತ್ಮಾರಾಮನೇ

ಆತ್ಮಾರಾಮರ ಆರಾಧಿಸುವ ಯೋಗ ನೀಡೊ ಎಮಗೇ ||೪||

ಮರ್ಮದ ಮಾತುಗಳಿಂದ ಮನಸಿನ ಕಲ್ಮಷ ನೀ ತೊಳೆದೆ

ಮೌನದಾ ರುಚಿಯ ಹತ್ತಿಸಿ ಮಹಾದೇವನ ತೋರಿಸುವೇ ||೫||

ಪರಂಧಾಮ ನಿನ್ನೊಳಗಿಹುದೈ ಪರಮಾತ್ಮ ನೀನಿಮಗೇ

ಪರಮಪದವಿ ನಾ ಬೇಡೆನಯ್ಯ ನಿನ್ನ ಪಾದದೊಳಗೇ ಇರುವೇ ||೬||

ನಿಜಭಕ್ತಿಯೊಂದ ಬೇಡುವೆನು ನೀಡೋ ನೀನಿನ್ನು ತಡಮಾಡದೆ

ಅಂಬಾಸುತನಾ ನಿನ್ನ ದಾಸರಾ ದಾಸರಾ ದಾಸನಾಗಿರುವೇ ||೭||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ಸದ್ಗುರುಸ್ತು ಭಾವಗಮ್ಯಃ

ನ ತು ಸಃ ದೇಹೇನ ಪೂಜ್ಯಃ |

ಸ್ವಾತ್ಮನಶ್ಚ ಪ್ರತಿರೂಪಃ 

ವ್ಯರ್ಥಮನ್ವೇಷಣಂ ಬಹಿಃ ||

ಸದ್ಗುರುವು ನಮ್ಮ ಭಾವಗಮ್ಯನು..ಅವನನ್ನು ದೇಹಭಾವದಿಂದ ಪೂಜಿಸಬಾರದು.. ಅವನು ನಮ್ಮ ಆತ್ಮದ ಪ್ರತಿರೂಪವಾದುದರಿಂದ ಹೊರ ಪ್ರಪಂಚದಲ್ಲಿ ಆತನನ್ನು ಹುಡುಕುವುದು ವ್ಯರ್ಥ..

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ವೇಂಕಟಾಚಲ ವೇಂಕಟಾಚಲ

ರಚನೆ: ಅಂಬಾಸುತ 

ವೇಂಕಟಾಚಲ ವೇಂಕಟಾಚಲ

ವೇಂಕಟಾಚಲ ಪಾಹಿಮಾಂ

ವೇಂಕಟಾಚಲ ವೇಂಕಟಾಚಲ

ವೇಂಕಟಾಚಲ ರಕ್ಷಮಾಂ ||ಪ||

ತತ್ವಪೂರ್ಣ ಬೋಧರೂಪ ಶ್ರೀವೇಂಕಟಾಚಲ ಪಾಹಿಮಾಂ

ತೇಜಃಪುಂಜ ತಮವಿನಾಶಿ ಶ್ರೀವೇಂಕಟಾಚಲ ರಕ್ಷಮಾಂ

ಪರಮಪಾವನ ಪುಣ್ಯನಾಮ ಶ್ರೀವೇಂಕಟಾಚಲ ಪಾಹಿಮಾಂ

ಪದಕೆ ನಿಲುಕದ ಪುಣ್ಯರೂಪ ಶ್ರೀವೇಂಕಟಾಚಲ ರಕ್ಷಮಾಂ ||೧||

ಆರನು ಮೀರಿದ ಆನಂದ ರೂಪ ಶ್ರೀವೇಂಕಟಾಚಲ ಪಾಹಿಮಾಂ

ಅಗಣಿತ ಗುಣ ಮಹಿಮಾಪೂರ್ಣ ಶ್ರೀವೇಂಕಟಾಚಲ ರಕ್ಷಮಾಂ

ಅಂತರಂಗದ ಆದಿ ಮೂರುತಿ ಶ್ರೀವೇಂಕಟಾಚಲ ಪಾಹಿಮಾಂ

ಅನಾಥ ನಾಥ ದೀನಬಂಧು ಶ್ರೀವೇಂಕಟಾಚಲ ರಕ್ಷಮಾಂ ||೨||

ಶ್ರೀನಿವಾಸ ಶಾರದಾ ತನಯ ಶ್ರೀವೇಂಕಟಾಚಲ ಪಾಹಿಮಾಂ

ಭಕ್ತೋದ್ಧಾರಕೆ ನೀನವತರಿಸಿದೆ ಶ್ರೀವೇಂಕಟಾಚಲ ರಕ್ಷಮಾಂ

ಲೀಲಾ ಮೂರುತಿ ಲೋಕರಕ್ಷಕ ಶ್ರೀವೇಂಕಟಾಚಲ ಪಾಹಿಮಾಂ

ಚತುರಾಶ್ರಮವ ಮೀರಿದ ಗುರುದೇವ ಶ್ರೀವೇಂಕಟಾಚಲ ರಕ್ಷಮಾಂ ||೩||

ಪ್ರೇಮ ಪುತ್ಥಳಿ ಮಾತೃಹೃದಯಿ ಶ್ರೀವೇಂಕಟಾಚಲ ಪಾಹಿಮಾಂ

ಪಾಪ ವಿಧೂರ ಪುಣ್ಯಕಾರಣ ಶ್ರೀವೇಂಕಟಾಚಲ ರಕ್ಷಮಾಂ

ಸ್ಥಿತಿ ಗತಿ ಕಾರಣ ಸೂಕ್ಷ್ಮರೂಪ ಶ್ರೀವೇಂಕಟಾಚಲ ಪಾಹಿಮಾಂ

ಅರಿವಿನ ದೊರೆ ನೀ ಆತ್ಮೋದ್ಧಾರಕ ಶ್ರೀವೇಂಕಟಾಚಲ ರಕ್ಷಮಾಂ ||೪||

ಸ್ವಾನುಭವದಾ ಸ್ವಾತ್ಮಾರಾಮ ಶ್ರೀವೇಂಕಟಾಚಲ ಪಾಹಿಮಾಂ

ಆತ್ಮಾರಾಮನ ನಿತ್ಯಾರಾಧಕ ಶ್ರೀವೇಂಕಟಾಚಲ ರಕ್ಷಮಾಂ

ದಟ್ಟಿಯುಟ್ಟ ದಿಟ್ಟ ದೃಷ್ಠಿಯ ಶ್ರೀವೇಂಕಟಾಚಲ ಪಾಹಿಮಾಂ

ದತ್ತನವತಾರಿ ನೀನೇ ಶ್ರೀವೇಂಕಟಾಚಲ ರಕ್ಷಮಾಂ ||೫||

ಸಖರಾಯಪುರದಾ ನಿಜಸಖನೇ ಶ್ರೀವೇಂಕಟಾಚಲ ಪಾಹಿಮಾಂ

ಗುರುನಾಥ ಅವಧೂತ ಶ್ರೀವೇಂಕಟಾಚಲ ರಕ್ಷಮಾಂ

ಅಂಬಾಸುತನಾ ಅಂತರಂಗದೊಡೆಯ ಶ್ರೀವೇಂಕಟಾಚಲ ಪಾಹಿಮಾಂ

ಅನವರತ ನಿನ್ನ ಭಜಿಸುವೆ ಕಾಯೋ ಶ್ರೀವೇಂಕಟಾಚಲ ರಕ್ಷಮಾಂ ||೬||

ಗುರುನಾಥ ಗಾನಾಮೃತ 

ಆನಂದವನಕೆ ಕರೆದೊಯ್ದಾ 

ರಚನೆ: ಅಂಬಾಸುತ 

ಆನಂದವನಕೆ ಕರೆದೊಯ್ದಾ 

ಸದ್ಗುರುನಾಥ ಆನಂದ ಘನನೇ ತಾನಾದಾ ||ಪ||

ಆನಂದ ನೀಡಿದಾ ನಿಜಾನಂದದ ದಾರಿ ತೋರಿದ

ಆನಂದಿಸು ಆನಂದಿಸು ಎಂದು ಬಾರಿ ಬಾರಿಗು ಪೇಳಿದ ||ಅ.ಪ||

ಚೈತ್ರ ಚಿಗುರಿನ ಆನಂದ ಸಾಧು ಆವೀರ್ಭವಿಸಿದಾ ಆನಂದ

ಪಂಚಮಿಯ ಆನಂದ ಪಂಚೇಂದ್ರಿಯಗಳಿಗೆ ಮಹದಾನಂದ ||೧||

ಸೇವೆಯಲ್ಲಿನ ಆನಂದ ಸಾಧು ಕಂಡಾ ಆನಂದ 

ನಾಮಸ್ಮರಣೆಯ ಆನಂದ ನಾದೋಪಾಸದ ನಿತ್ಯದಾನಂದ||೨||

ವೇದಮಂತ್ರದ ಆನಂದ ವಿಷಯವರ್ಜಿತ ವಿನೋದಾನಂದ

ರಥಾರೋಹಿ ಆನಂದ ಶ್ರೀಶೇಷಾಚಲನಾ ಕಂಡಾನಂದಾ ||೩||

ಪ್ರದಕ್ಷಿಣೆಯಾ ಆನಂದ ಚಿತ್ತಾರಕಂಡು ನೇತ್ರಾನಂದ

ಚಿಂತೆ ಬಾರದ ಚಿತ್ತದೊಳಗೆ ಚಿನುಮಯಾತ್ಮಕ ನಿಂತಾನಂದ ||೪||

ಅನ್ನಬ್ರಹ್ಮನ ಪೂರ್ಣ ಆನಂದ ಅಗುಳು ಅಗುಳಲು ಗುರುಮಹಿಮೆ ಕಂಡ ಆನಂದ

ವರ್ಣಿಸಲಾಗದ ಈ ಆನಂದ ಪದಕೆ ನಿಲುಕದ ಪರಮಾನಂದ ||೫||

ಎನ್ನವಧೂತ ನೀಡಿದ ಆನಂದ ಸಖರಾಯಧೀಶ ಇತ್ತ ಆನಂದ

ಅಂಬಾಸುತಗೆ ವರವೀ ಆನಂದ ಅಂಬಿಕೆಯ ಕೃಪೆಯಿಂದ ಆನಂದ ||೬||

ಗುರುನಾಥ ಗಾನಾಮೃತ 

ಈ ಡಿಂಬದೊಳಡಗಿಹ ಜಂಭವ ಅಳಿಸೊ ಸದ್ಗುರುರಾಯನೇ

ರಚನೆ: ಅಂಬಾಸುತ 

ಈ ಡಿಂಬದೊಳಡಗಿಹ ಜಂಭವ ಅಳಿಸೊ ಸದ್ಗುರುರಾಯನೇ

ದೊಂಬಿಯಾಗಿಹ ಮನದಿ ನಿನ್ನಯ ನಿಜ ಬಿಂಬವನಿರಿಸುತಲೀ ||ಪ||

ಕಂಬ ಕಂಬದಿ ಹರಿಯ ಕಂಡ ಶಿಶುವಂತೆ ಎನ್ನನಿರಿಸೋ

ಉಂಬುವಾಗ ಉಟ್ಟು ನಲಿಯುವಾಗ ನಿನ್ನ ನೆನೆಯುವಂತೆ ಹರಸೋ ||೧||

ರಂಭೆಯರಾ ವ್ಯಾಮೋಹವ ಕೆಡಿಸೋ ಅಂಬೆಯ ಪಾದ ತೋರಿಸೋ

ಶುಂಭ ಮರ್ಧಿನಿಯಲ್ಲಿ ಭಕ್ತಿಯನ್ನಿರಿಸೋ ಪರಿಪೂರ್ಣನನ್ನಾಗಿಸೋ ||೨||

ಅಂಬುಜೋದ್ಭವ ನೀನು ಅಂಬುಜಾಪತಿ ನೀನು ಶಂಭುಶಂಕರ ನೀನೂ

ಅಂಡ ಪಿಂಡ ಬ್ರಹ್ಮಾಂಡಗಳೊಳೂ ವ್ಯಾಪಕನಾಗಿಹೆ ನೀನೂ ||೩||

ಅಂಬಾಸುತನ ಅಂತರಂಗದ ಒಡೆಯಾ ಸಖರಾಯಪುರದವ ನೀನು

ನಿಜಭಕ್ತರಿಗೆ ನಿಜಸುಖವನ್ನೀವ ನಿಜಾತ್ಮಸಖ ನೀನು ||೪||

ಗುರುನಾಥ ಗಾನಾಮೃತ 

ರಂಗೋಲಿ ಹಾಕಮ್ಮಾ

ರಚನೆ: ಅಂಬಾಸುತ 

ರಂಗೋಲಿ ಹಾಕಮ್ಮಾ

ಮನದೊಳು ಸ್ಥಿರವಾಗಿ ಗುರುನಾಮ ಸ್ಮರಿಸಿ

ಮುದ್ದಾದ ರಂಗೋಲಿ ಹಾಕಮ್ಮಾ ||ಪ||

ಉದಯದೊಳೆದ್ದು ಕಾಮಾದಿ ಕಲ್ಮಷ ತೆಗೆದು

ಶುದ್ಧಭಕ್ತಿ ಎಂಬಾ ಪನ್ನೀರ ಚಿಮುಕಿಸಿ ||೧||

ರಂಗೋಲಿ ಕಾಣದ ದೇಹವೇ ಅಶುಭವು

ರಂಗನೆಂದಿಗೂ ಅಲ್ಲಿಗೆ ಬಾರನು ||೨||

ಎಳೆಯಾ ರಂಗೋಲಿ ಚುಕ್ಕಿ ರಂಗೋಲಿ

ಬಣ್ಣ ಬಣ್ಣ ತುಂಬಿದಾ ಬಗೆ ಬಗೆಯಾ ||೩||

ರಂಗೋಲಿ ಇದ್ದೆಡೆ ಸದಾ ಶುಭ ಶೋಭನಗಳು

ರಂಗೋಲಿ ಇರದೆಡೆ ಮಂಕಾದ ಮನವು ||೪||

ಶುದ್ಧಭಾವವೆಂಬಾ ಅಚ್ಚ ಬಿಳಿ ಹಿಟ್ಟಿನಿಂದ

ಅಚ್ಚುಕಟ್ಟಾಗಿ ನಿನ್ನ ಅಂತರಂಗದೊಳಿಂದು ||೫||

ಗುರುನಾಥ ಅವಧೂತಗೆ ಸಖರಾಪುರಾಧೀಶಗೆ

ಅಂಬಾಸುತನ ಅರಿವಿನ ದೊರೆಗೆ ಪ್ರಿಯವಾದಂಥಾ ||೬||

ಗುರುನಾಥ ಗಾನಾಮೃತ 

ಗುರುದೇವನೆ ಗತಿ ಎಂಬುದ ನಂಬೀರೊ

ರಚನೆ: ಅಂಬಾಸುತ 

ಗುರುದೇವನೆ ಗತಿ ಎಂಬುದ ನಂಬೀರೊ

ಅತಿ ಭಕುತಿಯಿಂ ಅವನ ಪಾದವ ಪಿಡಿಯಿರೊ ||ಪ||

ಹಗಲಿರುಳೆನ್ನದೆ ಸ್ತುತಿಸಿರೊ ಹೆತ್ತ ತಾಯ್ತಂದೆ ನೀನೇ ಎನ್ನೀರೊ

ಭಾವಶುದ್ಧಿಯ ಅವನಲ್ಲಿ ಬೇಡಿರೋ ಭಗವಂತ ನೀನೇ ಎನ್ನೀರೊ ||೧||

ಅವನಿತ್ತರೆ ಎಮಗೆ ಅನ್ನ ನೀರೊ ಅವ ನಕ್ಕರೆ ನಾವು ನಕ್ಕೇವೊ

ಅವ ಮುನಿದರೆ ಯಾರೂ ಉಳಿಯೇವೋ ಅವನಿಯ ದೊರೆ ಅವನೇ ನಂಬಿರೊ ||೨||

ಕರುಣಾಸಾಗರನವನು ಕನಿಕರಿಸುವನೋ ಕರಪಿಡಿದೆಮ್ಮನು ಉದ್ಧರಿಸುವನೊ

ಕೋರಿಕೆಯ ಪೂರೈಸೋ ಕಾಮಧೇನು ಅವನು ಎಮ್ಮ ಸುಖದುಖಃಗಳ ಆಲಿಸುವವನೊ ||೩||

ಸಖರಾಯಪುರದೊಳಗೆ ನೆಲೆಸಿಹನೋ ಆತ್ಮಸಖನಾಗಿ ತಾ ಮೆರೆದಿಹನೊ

ಅಂಬಾಸುತನಾ ಅನವರತ ಪೊರೆದಿಹನೋ ಶ್ರೀವೇಂಕಟಾಚಲ ನಾಮಾಂಕಿತನೊ ||೪||

ಗುರುನಾಥ ಗಾನಾಮೃತ 

ಚಿಂತೆ ಮಾಡಲು ಕಾರಣವೇನು

ರಚನೆ: ಅಂಬಾಸುತ 

ಚಿಂತೆ ಮಾಡಲು ಕಾರಣವೇನು

ಚಿನುಮಯಾತ್ಮಕ ಗುರುವಿಲ್ಲವೇನು

ನಿಶ್ಚಿಂತನಾಗಲು ಬೇಕಿನ್ನೇನು

ಅವನ ಸ್ಮರಣೆ ಸಾಲದೇನು ||ಪ||

ದೇಹ ಕೊಟ್ಟವನವನಲ್ಲವೇನು

ಅನ್ನ ವಸ್ತ್ರ ಕೊಡದಿರನೇನು

ಆನಂದ ಪಡಲು ಬೇಕಿನ್ನೇನು

ಗುರುಕೃಪಾ ನಮಗಿರಲಿನ್ನು ||೧||

ಸರಳ ದಾರಿಯ ತೋರಿಸಿಲ್ಲವೇನು

ಗುರು ನಿನ್ನಯ ಕರ ಪಿಡಿದಿಲ್ಲವೇನು

ಕರೆದೊಯ್ಯುವ ಭಾರ ಅವನದಲ್ಲವೇನು

ಗುರು ನಿನ್ನ ಮುಂದೆ ನಿಂತಿಲ್ಲವೇನೊ ||೨||

ಗುರುವಿನಾ ಮಾತು ರಕ್ಷೆ  ಅಲ್ಲವೇನು

ಗುರುಕರುಣೆಗೆ ಸಮವಿನ್ನೇನು

ಗುರು ಗುರುತರ ಭಾಗ್ಯ ನೀಡನೇನು

ಗುರುವೇ ಎಮಗೆ ದೇವನಲ್ಲವೇನು ||೩||

ಅಂಬಾಸುತನ ಪದಪದಗಳಲ್ಲೂ

ಸದ್ಗುರುನಾಥ ಕಾಣನೇನು

ಸಖರಾಯಪುರಾಧೀಶ ಕಾಣನೇನು

ಎಲ್ಲಾ ಅವನ ಕೃಪಾಭಿಕ್ಷೆ ಅಲ್ಲವೇನೊ ||೪||

ಗುರುನಾಥ ಗಾನಾಮೃತ 

ಅರಿ ಅರಿ ಅರಿಯೋ ಗುರು ಹರಹರಿಯೊ

ರಚನೆ: ಅಂಬಾಸುತ 

ಅರಿ ಅರಿ ಅರಿಯೋ ಗುರು ಹರಹರಿಯೊ

ಅವ ನಿಜ‌ ಅಜನೋ ಆ ಜನ್ಮದ ಪುಣ್ಯದ ಫಲನೊ ||ಪ||

ಸುಲಭಕೆ ಸಿಗನೋ ಸಾಧನೆಯೊಳಗಿಹನೊ

ಬಾಧೆಯ ಕಳೆವನೋ ಬೋಧರೂಪನೊ ||೧||

ದೇಹರೂಪನಲ್ಲನೋ ಗುರು ತತ್ವಪೂರ್ಣನಾಗಿಹನೊ

ತನ್ಮಯತೆಯ ಬೇಡಿಹನೋ ಅಹಂಭಾವ ಕಳೆಯುವನೊ ||೨||

ಒಡಲಾಳದ ಉಸಿರಂತೆ ಅವನಿಹನೊ

ಒಲವಿನ ಘನ ಮೂರ್ತಿಯಾಗಿ ಕಂಗೊಳಿಸಿಹನೊ ||೩||

ನಗಿಸುವನು ಅಳಿಸುವನು ಎಮ್ಮ ಪಕ್ವಗೊಳಿಸುವನು

ಪಾಪದ ಹೊರೆ ಇಳಿಸುವನು ಪುಣ್ಯ ಹೊರಿಸುವನು ||೪||

ಹೊರಗಣ್ಣಿಗೆ ಕಾಣನೋ ಒಳಗರಳಿದ ಮಲ್ಲಿಗೆ ಇವನೊ

ಸದಾ ಘಂ ಎನ್ನುವನೋ ಅನುಭವ ವೇದ್ಯನೋ ||೫||

ಸಖರಾಯಪುರದೊಳಗೆ ನಿಜಸುಖ ನೀಡೆ ನೆಲಸಿಹನೊ

ಅಂಬಾಸುತನ ಮನದಿ ಪದವಾಗಿ ನಲಿದಿಹನೊ ||೬||