ಗುರುನಾಥ ಗಾನಾಮೃತ 

ಅಪರಾಧ ಎನದಲ್ಲವೋ ಅಪಮಾನ ಎನಗೇತಕೋ

ರಚನೆ: ಅಂಬಾಸುತ 

ಅಪರಾಧ ಎನದಲ್ಲವೋ ಅಪಮಾನ ಎನಗೇತಕೋ

ಅಪರೋಕ್ಷ ಜ್ಞಾನಿ ಸದ್ಗುರು ನಿನಗಿದು ತಿಳಿದೇನೋ ||ಪ||

ಮೌನ ಮುತ್ತೆಂದು ನೀ ಹೇಳಿದಂತೆ ನಾನಿರುವೇ

ಮಾತನಾಡದೆ ನಾನೀಗಪರಾಧಿಯಾಗಿಹೆ 

ಮುಂದೆ ಮಾತಾಡಲು ಹಿಂದೇಕೆ ನುಡಿಯಲಿಲ್ಲ

ಅಪರಾಧ ನಿನದು ಅಪರಾಧಿ ನಿನೆನುತಿಹರೋ ||೧||

ಸತ್ಯಸುಳ್ಳಿನ ತಕ್ಕಡಿ ಮೇಲೆ ಕೆಳಗಾಗುತಿಹುದೊ

ಧರ್ಮ ಅಧರ್ಮ ಹಾದಿ ಮಂಜಾಗಿಹುದೊ

ಧ್ವನಿ ಕೇಳರೋ ಎನ್ನ ಕಟಕಟೆಯೊಳಗಿರಿಸಿಹರೊ

ತಪ್ಪಿತಸ್ಥ ಇವನೆಂದು ತೀರ್ಪಿತ್ತಿಹರೋ ||೨||

ಭಕ್ತಪಾಲಕ ಗುರುದೇವಾ ಅವಧೂತ

ಕೇಳೋ ಅಂಬಾಸುತನಾ ಅಂತರಂಗದ ಮಾತ

ತಿಳಿತಿಳಿದು ನಾನೇನು ಅಪರಾಧ ಮಾಡಿಲ್ಲವೋ

ಈ ಅಪಮಾನ ಸಹಿಸುವ ಮನವೂ ಎನಗಿಲ್ಲವೋ ||೩||

ಗುರುನಾಥ ಗಾನಾಮೃತ 

ಜಯ ಜಯವೆನ್ನಿ ಸದ್ಗುರುವರಗೆ ಶ್ರೀಗುರುವರಗೆ

ರಚನೆ: ಅಂಬಾಸುತ 

ಜಯ ಜಯವೆನ್ನಿ ಸದ್ಗುರುವರಗೆ ಶ್ರೀಗುರುವರಗೆ

ಸಚ್ಚಿದಾನಂದ ಅವಧೂತಗೆ ಜಯ ಜಯಾ ||ಪ||

ಪರಮನೆನಿಸಿ ಪಾಪಿಗಳನೂ ಉದ್ಧರಿಸೀ

ಪರಮಾತ್ಮನೆಡೆಗೇ ಕರೆದೊಯ್ದಾ ಪ್ರಭುವಿಗೆ ಜಯ ಜಯಾ ||೧||

ಆಶ್ರಮದಾ ಶ್ರಮ ತ್ಯಜಿಸಿ ಅರಿವಿನದೊರೆ ಎನಿಸೀ

ಗಾಡಾಂಧಕಾರವಾ ಕಳೆಯುವ ದೇವನಿಗೆ ಜಯ ಜಯಾ ||೨||

ಆರನು ಮೆಟ್ಟಿ ಮೂರನು ಏರಿ ನಿಂತವಗೇ

ಅತಿಷಯ ಪ್ರೇಮದಿ ಭಕ್ತರ ಸಲಹುವ ನಿಜಗುರುವಿಗೆ ಜಯ ಜಯಾ ||೩||

ಬೋಧರೂಪ ಸುಜ್ಞಾನವ ನೀಡುವಗೇ

ಭವದಾ ಬಾಧೆಯ ಹರಿಸೋ ಭಗವಂತನೀಗೆ ಜಯ ಜಯಾ ||೪||

ವಿತ್ತದಾಸೆಯ ಅಳಿಸಿ ಚಿತ್ತ ಶುದ್ದಿಯ ಮಾಡೀ

ನಿಜಸಂತರ ಸಂಘವಾ ನೀಡುವ ಸದ್ಗುರುವಿಗೆ ಜಯ ಜಯಾ ||೫||

ಸಖರಾಯಪಟ್ಟಣದೊಳು ಸಂತತ ತಾ ನೆಲೆಸೀ

ಅಂಬಾಸುತನಾ ಅನವರತಾ ಪೊರೆವವಗೇ ಜಯ ಜಯಾ ||೬||

ಗುರುನಾಥ ಗಾನಾಮೃತ 

ಸಖರಾಯಪುರವೆಂಬ ಪುಟ್ಟ ಷಹರಾ

ರಚನೆ: ಅಂಬಾಸುತ 

ಸಖರಾಯಪುರವೆಂಬ ಪುಟ್ಟ ಷಹರಾ

ಅಲ್ಲಿ ಅವಧೂತನೆಂಬ ಒಬ್ಬ ಮಾಯಾಕಾರ

ಅವಧೂತನೆಂದಿಗು ಭಕ್ತಪರಾ

ಅವನ ನಾಮವ ನೆನೆದರೆ ಭವಭಯ ದೂರ ||

ಶುದ್ಧಮನದಿ ಭಜಿಸಿದರೆ ಅವನ ಸಾಕ್ಷಾತ್ಕಾರ

ಅವನ ನುಡಿಗೆ ಬದ್ಧನಾಗೇ ನಮ್ಮ ಆತ್ಮೋದ್ಧಾರ

ಮರೆಯಬೇಡ ಗುರುವೇ ಅಜ ಹರಿ ಹರ

ಮರೆತೆಯಾದರೆ ಬದುಕೇ ಬಹು ದುಸ್ಸಾರ ||

ಪದಪೂಜೆ ಉತ್ತಮ ಪಾದಪೂಜೆ ಅಲ್ಲ

ಭಾವದಿ ಗುರು ಕಾಣು ಭಾವಚಿತ್ರದಲ್ಲಲ್ಲ

ಕೂಡಿ ಹಾಕಬೇಡ ಹಂಚಿ ತಿಂದರೆ ಎಲ್ಲ

ನಾನೊಪ್ಪುವೆನು ಎಂದ ಗುರುವೆ ನಮಗೆ ಎಲ್ಲ ||

ವೇಂಕಟಾಚಲನೆಂಬ ನಾಮ ಧರಿಸಿ ನಿಂತವ

ಶಾರದಾಂಬೆ ಉದರದಿ ಅವತರಿಸಿದವ

ಅಂಬಾಸುತನ ಅಂತರಂಗದಿ ಕುಳಿತವ

ಗುರುನಾಥನೆಂದು ಲೋಕ ವಿಖ್ಯಾತನಾದವ||

ಗುರುನಾಥ ಗಾನಾಮೃತ 

ನನ್ನತನವೇನಿಲ್ಲ ನಿನ್ನದಹುದಿಹುದೆಲ್ಲ

ರಚನೆ: ಅಂಬಾಸುತ 

ನನ್ನತನವೇನಿಲ್ಲ ನಿನ್ನದಹುದಿಹುದೆಲ್ಲ

ನಾ ನಿನ್ನ ದಾಸನೋ ಸದ್ಗುರುರಾಯಾ ||ಪ||

ನೀನಿಟ್ಟ ಹಾಗಿರುವೇ ನಿನ್ನನೇ ನಂಬಿರುವೆ

ನೀ ತೋರ್ದ ದಾರಿಯಲ್ಲೇ ನಾ ನೆಡೆವೆನಯ್ಯಾ ||ಅ ಪ||

ಕಣಕಣದಲೂ ನಿನ್ನ ಕಾಣುವಾ ಕಾತುರತೆ

ಎನ್ನಲ್ಲಿ ಮೂಡಿಹುದೋ ಸದ್ಗುರುರಾಯಾ

ನಿನ್ನ ಪದಗಳೇ ಸದಾ ಎನ್ನ ಕಿವಿಯೊಳಗಿರಲಿ

ನಿನ್ನ ಪಾದಧೂಳೆನ್ನ ಶಿರದ ಮೇಲಿರಲಯ್ಯಾ ||೧||

ನಾ ಮಾಡುವಾ ಕರ್ಮ ನಿನಗೆ ಪ್ರಿಯವಾಗಿರಲಿ

ನೀ ಒಪ್ಪುವಂತಿರಲಿ ಸದ್ಗುರುರಾಯಾ

ನಾ ನುಡಿವ ಮಾತಿನಲಿ ನಿನ್ನ ನಾಮ ಬೆರತಿರಲಿ

ನನ್ನುಸುರಿನಾ ಹೆಸರು ನಿನದಾಗಲಯ್ಯಾ ||೨||

ನಿನ್ನುಚ್ಚಿಷ್ಟವೇ ಎನಗೆ ಅನ್ನವಾಗಿರಲಿ

ಪ್ರಾಣಕಾರಣವದೇ ಸದ್ಗುರುರಾಯಾ

ಎನ್ನ ಮೈ ಸೋಕುವ ತಿಳಿಗಾಳಿ ಎಂದಿಗೂ

ನಿನ್ನ ಪಾದಸೇವಕರ ಉಸಿರಾಗಿ ಇರಲಯ್ಯಾ ||೩||

ಸಖರಾಯಪುರವಾಸ ಗುರುನಾಥ ಅವಧೂತಾ

ಸದ್ಭಕ್ತಪಾಲಕ ಸದ್ಗುರುರಾಯಾ

ಅಂಬಾಸುತನ ಈ ಪದ ಪದವು ನಿನಗಯ್ಯಾ

ಒಪ್ಪಿಸುವೆ ಸ್ವೀಕರಿಸೋ ಓ ಎನ್ನ ಜೀಯಾ ||೪||

ಗುರುನಾಥ ಗಾನಾಮೃತ 

ಗುರುನಾಥರ ದರ್ಶನಕೆಂದು ಬಂದೆ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗುರುನಾಥರ ದರ್ಶನಕೆಂದು ಬಂದೆ

ಆ ತೇಜೋಮೂರ್ತಿಯ ನೋಡುತ ನಿಂದೆ |

ಭಕ್ತಿಕುಸುಮಗಳ ಅರ್ಪಿಸಲು ತಂದೆ 

ಸಂತೋಷದಿ ಮಾತುಬಾರದೆ ಮೂಕಳಾದೆ ||

ನನ್ನ ಮನದಾಳದ ದನಿಯೇ ನೀನು

ನನ್ನ ಚಿತ್ತದೊಳಗಿನ ಧಣಿಯೇ ನೀನು |

ನನ್ನ ಹೃದಯದೊಳಗಿನ ಮೂರ್ತಿಯೇ ನೀನು 

ನನ್ನ ಅಂತರಂಗದ ಮೌನವೇ ನೀನು || ೧ ||

ಸಮವುಂಟೇ ಇವರ ಹೋಲಿಕೆಗೆ

ಸಾದೃಶ್ಯವುಂಟೇ ಇವರ ಅನುಗ್ರಹಕೆ |

ಶರಣಾಗತರಿಗೆ ಅಭಯನೀಡುವ ಪರಿಗೆ

ಸಾಧಕರಿಗೆ ದಾರಿತೋರುವ ರೀತಿಗೆ || ೨ ||

ಮಾಡುವ  ಕರ್ಮಗಳು ನಿನ್ನುಪಾಸನಾ

ಫಲಗಳೆಲ್ಲವು ನಿನಗೇ ಸಮರ್ಪಣಾ |

ನಿನ್ನ ಪಾದಸೇವಕನೆಂಬ ಭಾವನೆ

ಉಸಿರೊಳು ಬೆರೆತಿರಲೆಂದೇ  ಯಾಚನೆ || ೩ ||

ಗುರುನಾಥ ಗಾನಾಮೃತ 

ಕಂಡೇ ನಾ ಅವಧೂತನ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಕಂಡೇ ನಾ ಅವಧೂತನ

ಸಖರಾಯಾಧೀಶನಾ |

ಕಂಡೇ ನಾ ಚೈತನ್ಯನ

ಸಚ್ಚಿದಾನಂದನಾ ||

ಅನ್ನವನು ನೀಡುತಿಹ

 ಪರಬ್ರಹ್ಮನಾ

ಜೀವರಲಿ ಬೆರೆತಿಹ

ಉಸಿರಾಗಿಹಾ |

ಹೃದ್ದೀಪವ ಬೆಳಗುತಿಹ

 ಪರಂಜ್ಯೋತಿಯಾ

ಜ್ಞಾನವನು ನೀಡುತಿಹ 

ಮಹಾಜ್ಞಾನಿಯಾ || ೧ ||

ನರನಾರಿಯರಲಿ ಸಮತೆಯಿಹ 

ವಿಶ್ವಬಂಧುವಾ

ಅಣುರೇಣುಗಳಲಿ ಕಾಣುತಿಹ

ವಿಶ್ವವ್ಯಾಪಕನಾ |

ಆರ್ತರ ಕರ್ಮಕಳೆಯುವ

ವಿಶ್ವಪೂಜಿತನಾ

ಯಕ್ಷಕಿನ್ನರರು ಪೂಜಿಸುವ

ವಿಬುಧವಂದಿತನಾ || ೨ ||

ಭಕ್ತರ ಮನಗಳಲಿ ಅಡಗಿಹ

ಸುಪ್ತಚೇತನನಾ 

ಮನದಹಂಕಾರವ ತೊಲಗಿಸೋ

ಸನ್ಮತಿದಾಯಕನಾ |

ಕರುಣಾದೃಷ್ಟಿ ಬೀರುತಿಹ

ಪ್ರೇಮಪೂರ್ಣನಾ 

ಆತ್ಮತತ್ತ್ವವನು ಬೋಧಿಸುವ 

  ಗುರುಪುಂಗವನಾ || ೩ ||

ಗುರುನಾಥ ಗಾನಾಮೃತ 

ಗುರುವ ನಂಬಿರಯ್ಯಾ ಮನದಲಿ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗುರುವ ನಂಬಿರಯ್ಯಾ ಮನದಲಿ

ಗುರುವ ನಂಬಿರಯ್ಯಾ |

ಗುರಿಯ ಸೇರಿರಯ್ಯಾ ಜಗದಲಿ 

ಗುರಿಯ ಸೇರಿರಯ್ಯಾ ||

ಅಂಕೆಯಿಲ್ಲದ ಶುದ್ಧ ದೈವಕೆ

ಶಂಕೆಮಾಡದೆ ನಂಬಿರಯ್ಯಾ |

ಸಂಖ್ಯೆಯಿಲ್ಲದ ಜಪವ ಮಾಡಿ 

ಆತ್ಮನನು ಅರಿಯಿರಯ್ಯಾ || ೧ ||

ಚಿದ್ಘನರೂಪಿ  ಚಿದಾನಂದನ

ಚಿನ್ಮಯಭಾವದಿ ಭಜಿಸಿರಯ್ಯಾ |

ಭವದ ಚಿಂತೆಯ ದೂರಮಾಡಿ 

ಚೈತನ್ಯವ ಹೊಂದಿರಯ್ಯಾ || ೨ ||

ಸಾತ್ವಿಕಭಾವದ ಸತ್ಯಮೂರುತಿಗೆ 

ಸಾಧುಮನದಿ ನಮಿಸಿರಯ್ಯಾ |

ಮೋಹವನಳಿಸುವ ಮಂದಸ್ಮಿತನರ್ಚಿಸಿ

ಮುಕ್ತಿಮಾರ್ಗವ ಕಾಣಿರಯ್ಯಾ || ೩ ||

ಗುರುನಾಥ ಗಾನಾಮೃತ 

ಎಷ್ಟು ತಪಸಿನ ಪುಣ್ಯವೋ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಎಷ್ಟು ತಪಸಿನ ಪುಣ್ಯವೋ 

ಯಾವ ಹಿರಿಯರ ಭಾಗ್ಯವೋ  |

 ಲಭಿಸಿತೆಮಗೆ 

ಸದ್ಗುರುವ ಕಾಣುವ ಸೌಭಾಗ್ಯವು ||

ಹೊಸಿಲಲಿ ಗುರುವಿನ  

 ಪಾದಧೂಳಿಯ ಸ್ಪರ್ಷ |

ನೊಸಲಿಗೆ ಹಚ್ಚಿದೊಡೆ      

 ವಿನೂತನ ಹರ್ಷ ||

ಮನೆಯಂಗಳದಲ್ಲಿ ಅವರು   

 ನೆಡೆದಾಡಿದ ಪದಧೂಳಿ |

ಮನದಂಗಳದಲ್ಲಿ ಉಳಿಯಿತು 

ಅಚ್ಚಳಿಯದ ಗುರುಮೂರ್ತಿ ||

ಪ್ರೀತಿಯಿಂದ ಹರಸಿದ

ಅಮೂಲ್ಯ ಸ್ವರಸಿಂಚನ |

ಅನುರಣಿಸಿತ್ತು ಹೃದಯದಲಿ 

ಅಪೂರ್ವ ಸಿರಿಚಂದನ ||

ಪರಿತಪಿಸಿತ್ತು ಮನವು 

ಈ ಅಮೃತಘಳಿಗೆಗೆ  |

ಕರುಣಿಸಿದನು ಗುರುವು

ದೀನರಾ ಈ ಕೋರಿಕೆಗೆ ||

ಮನವನಾವರಿಸಿತ್ತು

ಅನಿರ್ವಚನೀಯ ಭಾವನೆ |

ಮಾತು ಬಾರದೇ ನಮಿಸಿತ್ತು 

ಮನದಲೇ ಗುರುಪಾದಕೆ ||

ಗುರುನಾಥ ಗಾನಾಮೃತ 

ಶರಣಾಗತನಾಗೆಲೆ ಮನವೆ

ರಚನೆ: ಅಂಬಾಸುತ 

ಶರಣಾಗತನಾಗೆಲೆ ಮನವೆ

ಸದ್ಗುರು ಘನ ಸಖರಾಯನಿಗೆ  ||ಪ||

ಶರಣಾಗತರನು ಕಾಯುವನವನು

ಅತಿಷಯ ವರಗಳ ನೀಡುವನು

ವರ್ಣಿಸಲಸದಳ ಮಹಿಮನು ಅವನು

ಸ್ವಾತ್ಮಾರಾಮನು ಸುಂದರನು ||೧||

ಪಾಪರಾಶಿಗಳ ಸುಡುವವನವನು

ಕಣ್ಣೋಟದೇ ಎಮ್ಮ ಉದ್ಧರಿಸುವನು

ಮುತ್ತಿನಂಥಾ ಮಾತುಗಳಾ ಆಡುವವನು

ಮಾತಿಂದಲೇ ಮನಕ್ಲೇಶ ಹರಿಸುವನು ||೨||

ತೋರಿಕೆಗೆ ಸಿಟ್ಟಾಗುವನು

ತನ್ಮಯ ಭಕ್ತಿಗೆ ಒಲಿಯುವನು

ನಿಜಮುಕ್ತಿದಾಯಕನು ಬೋಧರೂಪನು

ಭಕುತರ ಪಾಲಿಗೆ ಭಾಗ್ಯನಿವನು ||೩||

ಗತಿ ಮತಿ ಪಾಲಿಸೊ ಗುರುವೇ ಎನುತಾ

ಸಖರಾಯಪುರವಾಸಿ ಕಾಯೋ ಎನುತಾ

ದಾಸ ಅಂಬಾಸುತನ ದೊರೆಯೇ ಎನುತಾ

ಬಿಡದೇ ಅವನಡಿಯನ್ನೇ ಪಿಡಿಯುತಾ ||೪||

ಗುರುನಾಥ ಸ್ತೋತ್ರ  ಕುಸುಮಾಂಜಲಿ 

ಅಜ್ಞಾನಂ ವರ್ತತೇ ಯತ್ರ 

ರಾಜತೇ ಶೋಕಾದಿ ಮೋಹಾಃ |

ಆತ್ಮೈಕತ್ವೇ ಸ್ಥಿತೇ ಯತ್ರ 

ಕುತೋ ಶೋಕಮೋಹಾದಯಃ ||

ಅಜ್ಞಾನವು ಎಲ್ಲಿ ಇರುವುದೋ ಅಲ್ಲಿ ಶೋಕಮೋಹಗಳು ಇರುತ್ತವೆ.ಆದರೆ ಆತ್ಮೈಕತ್ವವು ಎಲ್ಲಿ ಇರುವುದೋ ಅಲ್ಲಿ ಶೋಕಮೋಹಗಳೆಂಬ ಭಾವಗಳ ಉಗಮವಾದರೂ ಹೇಗಾಗುವುದು.

.ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು

ಗುರುನಾಥ ಗಾನಾಮೃತ 

ಸುಲಭವಲ್ಲವೀ ಗುರುಸೇವೆ ಮನುಜರಿಗೆಲ್ಲಾ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಸುಲಭವಲ್ಲವೀ ಗುರುಸೇವೆ ಮನುಜರಿಗೆಲ್ಲಾ

ಸುಲಭವಲ್ಲವೀ ಗುರುಸೇವೆ ಮರುಳರಿಗೆಲ್ಲಾ || 

ಇಹಕು ಗುರುವೇ ಗತಿಯು

ಪರಕೂ ಅವನೇ ಮತಿಯು |

ಗುರುಪಾದವಲ್ಲದೆ ಬೇರೇನು

ಅರಿತು ಸಾಗಿದರೆ ಹಾಲ್ಜೇನು || ೧ ||

ಕಣ್ಣು ಮುಚ್ಚಿದರೆ ಗುರುವಿನ ಬಿಂಬ  

ಕಣ್ಣ ತೆರೆದರೆ ಅವನ ಪ್ರತಿಬಿಂಬ |

ಹೋದೆಲ್ಲಲ್ಲಾ ‌ಬರುವ ಜೊತೆಯಲ್ಲಿ

ಮಾತೆಲ್ಲಲ್ಲಾ ನುಡಿವ ಹರ್ಷದಲ್ಲಿ || ೨ ||

ನೀನೇ ದೈವ ಬದುಕಿನಲಿ

ನೀನೇ ಸಕಲ ಜನ್ಮದಲಿ ।

ಉಸಿರಾಡುವೆ ನಿನ್ನ ನಾಮದಲ್ಲಿ

ಬೆಳಕ ಪಡೆವೆ ನಿನ್ನ ನಗೆಯಲ್ಲಿ ।। ೩ ।।