ಗುರುನಾಥ ಗಾನಾಮೃತ 

ಇಂಥ ಗುರು ನಿಮಗೆಲ್ಲಿ ದೊರಕ್ಯಾನೊ

ರಚನೆ: ಅಂಬಾಸುತ 

ಇಂಥ ಗುರು ನಿಮಗೆಲ್ಲಿ ದೊರಕ್ಯಾನೊ ಈ ಧರೆಯೊಳಗೆ

ಇಂಥ ಗುರು ನಿಮಗೆಲ್ಲಿ ದೊರಕ್ಯಾನೊ ||ಪ||

ಕಾಂತನಂತೆ ಬಂದು ಅನಂತ ಚಿಂತೆಗಳಿಗೆ ಅಂತ್ಯ ಹಾಡಿ

ಅಂತರಂಗವ ನೋಡಿ ಅರಿವಿನ ಜ್ಯೋತಿ ಬೆಳಗುವ ಧೀಮಂತ ||ಅ.ಪ||

ದೃಷ್ಟಿಯಿಂದಲೇ ದುಷ್ಟತನ ಕಳೆವಾ

ಬಹುಶ್ರೇಷ್ಟತೆಯನೆ ಎತ್ತಿಹಿಡಿದು ಪಾಲಿಸಿರಿ ಎನುವಾ

ಪದಪೋಣಿಸಿ ವೇದವಾಕ್ಯಗಳನ್ನದರೊಳಗಿರಿಸಿ

ಪರಮಪದವನ್ನೀಯುವ ಪರಮಪಾವನ ನಾಮಕ ||೧||

ವಿತ್ತವನ್ನೆಂದಿಗೂ ಮುಟ್ಟ್ಯಾನೋ

ಭಕ್ತರ ಚಿತ್ತವನ್ನೆಂದಿಗೂ ಬಿಟ್ಟು ಹೋಗ್ಯಾನೋ

ಅತ್ತು ಕರೆಯಲು ಬೇಕು ಎನ್ನದೆ ಪಕ್ಕದಲ್ಲೇ ತಾನಿದ್ದು

ಚೊಕ್ಕವಾಗಿರಿಸೆಲ್ಲರ ಚಿಕ್ಕತನವ ದೂರಿರಿಸೊ ||೨||

ಮೆರೆದು ಮಹತ್ತೆನಿಸಿಕೊಳ್ಳಾನೊ

ಈ ಚಿನುಮಯಾತ್ಮಕ ಮರೆಯೊಳಗಿನ ಮೂರ್ತಿರೂಪನೊ

ಅಗಣಿತದ ಲೀಲೆಯನು ತೋರುತ ತ್ರಿಜಗ ವ್ಯಾಪಕನಾಗಿ ನಿಂತನೊ

ಸುಜನರಿಗೆ ಸುಮವಾಗಿ ಕಂಡನೆ ದುರ್ಜನರಿಗೆ ಸಿಂಹನೊ ||೩||

ಸಖರಾಯಪುರದೊಳಿಹನೊ

ಆನಂದದಿ ಆತ್ಮಸಖನೆನಿಸಿಹನೊ

ಅವಧೂತನಾಗಿಹನೊ ಆದಿ ಅಂತ್ಯವ ಮೀರಿಹನೊ

ಅಂಬಾಸುತನ ಪದಕೆ ಮುದದಿಂದ ನಲಿದಿಹನೊ ||೪||

ಗುರುನಾಥ ಗಾನಾಮೃತ 

ಭಜಕಜನ ಪಾಲಕ ಗುರುದೇವ 

ರಚನೆ: ಅಂಬಾಸುತ 

ಭಜಕಜನ ಪಾಲಕ ಗುರುದೇವ

ನಿನ್ನ ಭಜಿಸುವೆನನವರತ ಉದ್ಧರಿಸೊ ದೇವಾ

ಎಮ್ಮನುದ್ಧರಿಸೊ ದೇವಾ ||ಪ||

ತಂದೆ ತಾಯಿ ಬಂಧು ಬಳಗ

ಸಖ ಸರ್ವಸ್ವ ನೀನೆಂದು ನಂಬುತಲಿ

ನಿನಗೆ ಶರಣಾಗುತಲಿ

ಮಾಯೆಯ ಅಳಿಸೆನ್ನುತಲೀ

ಸುಜ್ಞಾನದ ಹಾದಿಯೊಳಿರಿಸೆನ್ನುತಲಿ

ಹರಸೆನ್ನುತಲೀ ||೧||

ಕನಸಿನಾಚೆಯೊಳೆಮ್ಮನಿರಿಸಿ

ಕಂದನೆನ್ನುತ ಕುಂದುಗಳನ್ನೆಲ್ಲ ಕ್ಷಮಿಸಿ

ಮನವಾ ಸ್ಥಿರಗೊಳಿಸಿ

ಅರಿವಿನಾನಂದವ 

ಸಲಹೊ ಅರಿವಿನ ಅರಸು ನೀನೆನ್ನುತಲೀ

ನಾನೆಂಬುದ ಕಳೆಯುತಲೀ ||೨||

ಸಖರಾಯಪುರದೊಳು ನೆಲೆಸಿ

ಅತ್ಮಸುಖದಾ ಸಾರವನು ಸಾತ್ವಿಕರಿಗುಣಿಸಿ

ಸಚ್ಚಿದಾನಂದನೆನಿಸಿ

ಅಂಬಾಸುತನಾ ಪಾಲಿಸಿ

ಜನ್ಮ ಜನ್ಮಾತಂತರದಾ ಪುಣ್ಯದ ಫಲ ತಾನೆನಿಸಿ

ಪೂರ್ಣತ್ವವ ಬೋಧಿಸಿದೆ ||೩||

ಗುರುನಾಥ ಗಾನಾಮೃತ 

ಎಲ್ಲಾ ನಿನ್ನದೇ ಗುರು ಈ ಜಗ ಈ ಮನ ಈ ತನುವು

ರಚನೆ: ಆನಂದರಾಮ್, ಶೃಂಗೇರಿ  

ಎಲ್ಲಾ ನಿನ್ನದೇ ಗುರು ಈ ಜಗ ಈ ಮನ ಈ ತನುವು

ನೀನಲ್ಲದೆ ಇನ್ನೇನಿದೆ ಜಗದಿ ಎಲ್ಲಾ ಗುರುಮಯವು|

ನಾನು ನನ್ನದು ಎಲ್ಲಾ  ಭ್ರಮೆಯು ನೀನೇ ಸತ್ಯವು

ಅಣು ಅಣುವು ತುಂಬಿ ತೋರುತ್ತಿದೆ ನೀನೇ ನಿತ್ಯವು|

ಏನು ನಿನ್ನ ಲೀಲೆಯೋ ಗುರುವೇ ಅರಿವಿಗೆ ಬಾರದು

ಎಲ್ಲಾ ನಿನದೆಂದು ನಿನಗರ್ಪಿಸೆ ಎಲ್ಲಾ ಕಳೆಯುವುದು|

ಮನ ನಿಲ್ಲದೆ ಎಲ್ಲೋ ಓಡುವುದು ಬಾರವಾಗುವುದು

ನಿನ್ನ ಬಜಿಸಿದೊಡೆ ಎಲ್ಲೆಮೀರದೆ ಶಾಂತವಾಗುವುದು|

ಆಸೆ ಬುರುಕನ ಮನವಿದು ಏನನೋ ಬಯಸುವುದು

ನಿನ್ನ ನಾಮವು ನಿಜ ಬಕುತಿಯ ದಾರಿ ತೋರುವುದು|

ನಿರರ್ಥಕ ಜೀವನ ಬೇಡವೋ ಗುರು ಅರ್ಥ ನೀಡೋ

ನೀ ನಡೆವ ಹಾದಿಯಲಿ  ದೂಳುಮಾಡಿ ನಡೆದಾಡೋ|

ಗುರುನಾಥ ಗಾನಾಮೃತ 

ಅರಿಯದಾದೆ ಗುರುವೇ ನಿನ್ನ ತಿಳಿಯದಾದೆ ಗುರುವೇ

ರಚನೆ: ಆನಂದರಾಮ್, ಶೃಂಗೇರಿ  

ಅರಿಯದಾದೆ ಗುರುವೇ ನಿನ್ನ ತಿಳಿಯದಾದೆ ಗುರುವೇ

ಎನೂ ಅರಿಯದೆ ಎಲ್ಲಅರಿತಂತೆ ನಟಿಸಿಮೂಡನಾದೆ|

ಏನು ಬಲ್ಲನು ಇವ ಬರೀ ಒಣಜಂಬದ ಗೂಡಿವನು

ನುಡಿವನು ಇವನು ಒಣ ವೇದಾಂತವನು ಮೂಡನು|

ಬಲ್ಲವರ ಸಂಗ ಮಾಡನುಇವನು ನಿನ್ನನೇನು ಬಲ್ಲನು

ಅಲ್ಪನು ಇವನು ನಾನೇ ಮೇಲೆ0ದು ತಿಳಿದಿಹನು|

ಮನಶುದ್ದಿ ಇಲ್ಲದ ಇವನು ಬಕುತಿ ಏನು ಮಾಡುವನು

ತೋರಿಕೆಯ ಬಕುತಿಯನು ತೋರಿ ಬದುಕುತಿಹನು|

ಹಾಡಿ ಹೊಗಳುವ ಇವ ಬರೀಪದಗಳಜೋಡಿಸಿಹನು

ಮನವ ಹರಿದೊಡೆ ಬಿಟ್ಟು ನಿಜ ಬಕುತಿ ಎನ್ನುವನು|

ಇನ್ನು ಸಾಕು ಗುರುವೇ ಕರುಣೀಸೋ ಇನ್ನು ಇವನನ್ನು

ಬಲು ದೈನ್ಯದಿ ಬೇಡಿಹನು ಗುರುವೇ ಕರುನಿಸೆಂದು|

ಗುರುನಾಥ ಗಾನಾಮೃತ 

ಅಳುಕದಿರು ಮನವೇ 

ರಚನೆ: ಅಂಬಾಸುತ 

ಅಳುಕದಿರು ಮನವೇ 

ಅರಿವನ ಗುರು ನಿನ್ನೊಡನೆ ಇದ್ದಾನೆ ||ಪ||

ಅರಿಗಳನೆಲ್ಲಾ ಗುದ್ದ್ಯಾನೆ

ಆತ್ಮಸುಖವನ್ನೀಯುತಾನೇ ||

ಕಂಡದ್ದೆಲ್ಲಾ ಒಳಿತಾಗಿ

ಅನೇಕತೆಯೊಳು ಏಕತೆಯಾಗಿ

ಅರಸುವುದ ಮರೆಸುತ್ತಾನೇ

ನಿನ್ನೊಳಗಿನ ಅರಸನ ತೋರುತ್ತಾನೆ ||೧||

ಉಂಡದ್ದೆಲ್ಲಾ ಸಿಹಿಯಾಗಿ

ಆತ್ಮಸುಖದಾ ರಸ ಧಾರೆಯಾಗಿ

ಹರಿಸುತ್ತಾನೆ ತಾ ಹರಸುತ್ತಾನೆ

ನಿನ್ನನ್ನೇ ಹರನಾ ಮಾಡುತ್ತಾನೆ ||೨||

ಬಾಧೆ ಕಳೆದು ಬೋಧನಾಗಿ

ಬುದ್ಧನ ಬದ್ದತೆ ಉದಾಹರಣೆಯಾಗಿ

ಕಲಿಸುತ್ತಾನೆ ಕಲಿಯ ಮರೆಸುತ್ತಾನೆ

ಮೌನದಿ ನಿನ್ನ ನಿಲ್ಲಿಸುತಾನೆ ||೩||

ಅಂಬೆಯನ್ನಾಗಿಸುತ್ತಾನೆ

ಸುತರನ್ನೆಲ್ಲಾ ಸೇರಿಸುತ್ತಾನೆ

ಸಖನಾಗಿ ತಾ ರಾಯನಾಗಿ

ಪುರಕೆ ದಾರಿಯ ತೋರುತಾನೆ ||೪||

ಗುರುನಾಥ ಗಾನಾಮೃತ 

ಸಾವಧಾನದಿಂದ ಸೇವೆ ಮಾಡಿ ಧನ್ಯರಾಗಿರೊ

ರಚನೆ: ಅಂಬಾಸುತ 

ಸಾವಧಾನದಿಂದ ಸೇವೆ ಮಾಡಿ ಧನ್ಯರಾಗಿರೊ

ಸಗುಣರೂಪಿ ಗುರುವ ಮೂರುತಿಯ ಮನದಿ ತುಂಬಿಕೊಳ್ಳರೊ ||ಪ||

ವಿಷಯವೆಂಬೊ ವಿಷವ ಬಿತ್ತದೆ ಪರವಶವು ನೀವಾಗಿರೊ

ರಾಗದ್ವೇಶವ ರಾಚೊ ಮಾತನು ಆಡದೆ ಮೌನವಾಗಿ ||೧||

ಕಳೆಯೊ ಸಮಯವ ಕೂಡಿಕೊಂಡು ಕೊಳೆಯ ಕಳೆದುಕೊಂಡು

ತನು ಮನವ ದಂಡಿಸಿ ತನ್ಮಯತೆಯನೇ ಇರಿಸೀ ||೨||

ಅರಿಗಳೆಲ್ಲರ ಮರೆತು ಅರಿವ ಕೊಡುವ ದೊರೆಯ ಅರಸೀ

ಸರಸದಿಂದ ಭಕ್ತಿ ರಸದಿ  ಗುರುವಿನೊಡನಾಡುತಾ ||೩||

ಸಮರ್ಥ ಸದ್ಗುರು ಸುಲಭ ಸಾಧ್ಯನು ಸೇವೆಗೆಂದಿಗೂ

ಅಂಬಾಸುತನ ಪದದೊಳಡಗಿಹ  ಹೇಳಲೆಂದಿಗೂ ||೪||

ಗುರುನಾಥ ಗಾನಾಮೃತ 

ದೂರ ತಳ್ಳಬೇಡ ಅರಿವೆ ದೂರ ತಳ್ಳಬೇಡ

ರಚನೆ: ಅಂಬಾಸುತ 

ದೂರ ತಳ್ಳಬೇಡ ಅರಿವೆ ದೂರ ತಳ್ಳಬೇಡ

ದಾರಿಹೋಕ ನಾನಲ್ಲ ದೈನ್ಯತೆಯನು ಮರೆವುದಿಲ್ಲ ||ಪ||

ಬಾಗಿ ಭೋಗ ಬಿಟ್ಟು ವಿರಾಗಿಯಾಗಿ ಬಂದಿಹೆನು

ರಾಗಿಗಾಗಿ ಅಲ್ಲವೇ ಅಲ್ಲ ತ್ಯಾಗಿಯೆಂದು ಮೆರೆವುದಿಲ್ಲ ||೧||

ಮುಚ್ಚಿಡಲು ಮನಸು ಇಲ್ಲ ಬಿಚ್ಚಿಡಲು ಭಯವು ಇಲ್ಲ

ಬಚ್ಚಿಡಲು ಏನೇನೂ ಇಲ್ಲ ಹುಚ್ಚುತನವೊ ತಿಳಿಯೆನಲ್ಲ ||೨||

ಹೆಣಕೂ ಉಸಿರು ಹಣದಿಂದ ಕ್ಷಣಿಕವೆಂದು ತಿಳಿವುದಿಲ್ಲ

ನೀ ಸಿಗದೇ ನಿಜಸುಖವೂ ಇಲ್ಲ ಸಿಕ್ಕರೆ ಜಗಕೆ ಸಖ ನಾನಲ್ಲ ||೩||

ಮೂರ್ತಿರೂಪವಾಗಿ ನೀನು ಕಾಣುವೆಯಂತೆ ಗುರುವೆನಿಸಿ

ಅಂಬಾಸುತಗೆ ಸರಸವೆನಿಸೊ ಪದದೊಳಗೆ ಅರಸನಾಗಿ ||೪||

ಗುರುನಾಥ ಗಾನಾಮೃತ 

ಕುಣಿಯುತ ಬಾರೋ ನಲಿಯುತ ಬಾರೋ

ರಚನೆ: ಅಂಬಾಸುತ 

ಕುಣಿಯುತ ಬಾರೋ ನಲಿಯುತ ಬಾರೋ

ಕನಿಕರ ತೋರಿ ಒಲಿಯುತ ಬಾರೋ

ಭಕ್ತರ ಭಾವಕೆ ನಗುತಲಿ ಬಾರೊ

ಬೇಡುವೆ ಸಖರಾಯಪುರಾಧೀಶನೆ ಬಾರೋ ||

ಮಂಗಳ ವಾದ್ಯದೊಡನೆ ಮಂಗಳವೆನ್ನುತ ಬಾರೋ

ಸುಮಂಗಲಿಯರಿಂ ಆರತಿ ಸ್ವೀಕರಿಸುತ ಬಾರೋ

ಸರ್ವಮಂಗಳೆಯೊಡಗೂಡುತ ಬಾರೋ

ಸರ್ವರಕ್ಷಕ ಪ್ರಭುವೇ ಸಂಭ್ರಮದಿ ನೀ ಬಾರೋ ||

ಸಖರಾಯಪುರವಾಸನೇ ಸರಸದಿ ಬಾರೋ

ಸುಖವೀಯುವ ಮಹನೀಯನೆ ಸಡಗರದಿ ಬಾರೋ

ಅಂಬಾಸುತನಂತರಂಗದ ಪ್ರಭುವೆ ಅರಿವಾಗಿ ಬಾರೋ

ಅಡಿಗಡಿಗೆರಗುವೆ ಆದರೂಪನಾಗಿ ಬಾರೋ ||

ಗುರುನಾಥ ಗಾನಾಮೃತ 

ತರಗೆಲೆಯಂತೇ ಬದುಕು

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ತರಗೆಲೆಯಂತೇ ಬದುಕು

ಎತ್ತ ಸಾಗುವುದು ಗುರಿಯಾ ಮರೆತು ||

ಗುರುನಾಮವೆಂಬ ತಂಪಾದ ಗಾಳಿ ಬೀಸಿ

ಗುರುಗೀತೆಯೆಂಬ ಗಂಧದಿ ತೇಲಿ |

ಸೇರಿತು ತರಗೆಲೆ ಗುರುಸಾನಿಧ್ಯವ

ಪಡೆಯಿತು ದಿವ್ಯ ಗುರುಪಾದಸ್ಪರ್ಶವ || ೧ ।।

ಕಂಡಿತದದಕೆ ಅಪೂರ್ವ ದಿವ್ಯಚೇತನಾ

ಸ್ವಾನಂದದಿ ನಗುವ ಪೂರ್ಣಚಂದಿರನಾ |

ಧನ್ಯತೆಯಿಂದ ಪಡೆಯಿತು ಮಾನಸೋಲ್ಲಾಸ 

ಜನ್ಮಾಂತರದ ಚಿದ್ವಿಕಾಸ || ೨ ||

ಮತ್ತೆ ಎತ್ತ ಗಾಳಿ ಬೀಸುವುದೋ 

ಯಾವ ಬಂಧನಕೆ ಸಿಲುಕುವುದೋ |

ಇರುವಷ್ಟು ಘಳಿಗೆ ಸಿಗಲಿ ಸಾರ್ಥಕತೆ

ಗುರುಛಾಯೆಯಡಿಯಲಿ ನಿಶ್ಚಿಂತತೆ || ೩ ||

ಗುರುನಾಥ ಗಾನಾಮೃತ 

ಗತಿ ನೀನೇ ಗುರುನಾಥ 

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ಗತಿ ನೀನೇ ಗುರುನಾಥ 

ಈ ಭವದಲಿಹ ನಮಗೆ |

ಮತಿ ನೀನೇ  ಗುರುದೇವ

ಈ ಅಜ್ಞಾನದಲಿಹ  ನಮಗೆ ||

ಮಾತಾಪಿತನು ನೀನು

ಜಗದ ಸಿರಿಯೇ ನೀನು |

ಬಂಧುಸಖನು ನೀನೇ

ನನ್ನ ಮನದೊಡೆಯನೂ ನೀನೇ ||

ನಾ ನುಡಿವ ಮಾತು ನೀ‌ನು

ನಾ ಸ್ಮರಿಸೋ ನಾಮ ನೀನು |

ನಾ ಪೂಜಿಸುವ ದೈವ ನೀನು 

ನಾ ಭಜಿಸುವ ಶಕ್ತಿ ನೀನು ||

ನನ್ನ ಜೀವನವೇ‌ ನಿನ್ನ ಭಿಕ್ಷೆ 

ಸಿಗಲಿ ನನಗೆ ನಿನ್ನ ರಕ್ಷೆ |

ಪದಸೇವೆಯ ಭಾಗ್ಯವ ಕೊಡು ನೀನು

ಕೇಳುವುದೊಂದೇ ನಿನ್ನಲ್ಲಿ ನಾನು ||

ಗುರುನಾಥ ಗಾನಾಮೃತ 

ಯಾರಿಹರೈ ಈ ಪ್ರಭುವಿನಂತವರು

ರಚನೆ: ಅಂಬಾಸುತ 

ಯಾರಿಹರೈ ಈ ಪ್ರಭುವಿನಂತವರು

ಯಾರಿಹರೈ ಎನ್ನ ಗುರುವಿನಂಥವರು ||ಪ||

ತ್ರಿಜಗವಂದಿತರು ತ್ರಿಗುಣಾತೀತರು

ತ್ರಿಮೂರ್ತಿರೂಪರು ತ್ರಿಭುವನ ಪಾಲಕರು ||ಅ.ಪ||

ನೋಟದಲೇ ಮನ ಕಲ್ಮಷ ಕಳೆವರು

ನಾಟುವ ಮಾತನ್ನಾಡುವಂಥವರು

ನಾಟಕೀಯತೆಯ ನಡೆ ನಡೆ ಎನ್ನುವವರು

ದಿಟ್ಟ ಮೂರುತಿಯಾಗಿ ಕಂಡಂಥವರು ||೧||

ನಾಲ್ಕಾಶ್ರಮವಾ ಮೀರಿದಂಥವರು

ನಾಕವ ಇಳೆಯಲೇ ತೋರಿದಂಥವರು

ನಾಡಿ ಹಿಡಿಯದೆ ಭವ ರೋಗ ಕಳೆವವರು

ನೋಯಿಸದಾ ಹಾಗೆ ನನ್ನತನ ಕಿತ್ತವರು ||೨||

ನಕ್ಕಾಗ ಹರಿಯಂತೆ ಕಂಡವರು

ಸಿಟ್ಟುಗೊಂಡಾಗ ನರಹರಿ ಇವರು

ಗಟ್ಟಿಯಾಗಿ ಬಿಡದೆ ಪಾದವ ಹಿಡಿಯೇ

ಜಗದಾ ಗುಟ್ಟನು ಬಿಚ್ಚಿಡುವವರು ||೩||

ಸಖರಾಯಪುರದೊಳು ಸಖನಾಗಿರುವರು

ಆತ್ಮಸುಖವೀಯೇ ಕಾದಿರುವವರು

ಅಂಬಾಸುತನ ತಾಯಂತೆ ಕಾದಿರುವವರು

ಜಗದಂಬೆ ಪಾದವ ತೋರುವಂಥವರು ||೪||

ಗುರುನಾಥ ಗಾನಾಮೃತ 

ಪಾಲಯಮಾಂ ಗುರುನಾಥ

ರಚನೆ: ಅಂಬಾಸುತ 

ಪಾಲಯಮಾಂ ಗುರುನಾಥ

ಪರಿ ಪಾಲಯಮಾಂ ಗುರುನಾಥ ||ಪ||

ಪರಮಪದವೀಯೊ ಎಂದು ಬೇಡೆನು ನಾ ಪರಮಪುರುಷನೆ

ನಿನ್ನ ಪಾದಪದುಮದ ಧೂಳನ್ನೆನ್ನಾ ಶಿರದ ಮೇಲಿರಿಸೊ ||ಅ.ಪ||

ಹಂಗಿರದಾ ಶ್ರೀರಂಗನ ರೂಪನೆ

ಸತ್ಸಂಗವನಿತ್ತು ನೀ ಸಲಹಯ್ಯ

ಭಂಗವಿಧೂರನೆ ನಿನ್ನ ಮರೆಯದಾ ಹಾಂಗೆ ಜ್ಞಾನ ಗಂಗೆಯನು ಸ್ಪುರಿಸಿ

ಮಂಗತನವ ಮರೆಸುತ ದೇವನೆ ನೀ ಎನ್ನಂತರಂಗದೊಳು ಬಂದು ನೆಲೆಸೊ ||೧||

ಗುರುದೇವನೆ ಗುಣಪರಿಪೂರ್ಣನೆ

ಘನ್ನ ಮಹಿಮೆಯಾ ತೋರಯ್ಯಾ

ಆರರಿಗಳ ಅಟ್ಟಾಡಿಸಿ ಓಡಿಸಿ ಆದಿಮೂರುತಿ ನಿನ್ನ ಅರ್ಚನೆಗಯ್ಯುವ

ನಿಜ ಆನಂದವ ನಿರುತವು ನೀನಗೆ ಪಾಲಿಸಲೇ ಬೇಕೈ ಗುರುವೇ ||೨||

ಶ್ರೀಕೃಷ್ಣಯೋಗೀಂದ್ರ ಅವತಾರಿ

ನಾರಾಯಣ ಯೋಗೀಂದ್ರ ರೂಪಿ

ಸಖರಾಯಪುರದೊಳು ಸಾತ್ವಿಕ ರೂಪದಿ ಬಂದ ಶಿಷ್ಯರನು ಸಲಹುತಲಿರುವೆ

ಅಂಬಾಸುತನ ಈ ಮೊರೆಯನು ಕೇಳುತ ಕನಿಕರದಿ ದರುಶನವನ್ನೀಯೊ ||೩||

ಗುರುನಾಥ ಗಾನಾಮೃತ 

ಒಲ್ಲದ ಮನದಿಂದ ಕೈ ಮುಗಿದು ಬೇಡಿದೊಡೆ

ರಚನೆ: ಆನಂದರಾಮ್, ಶೃಂಗೇರಿ  

ಒಲ್ಲದ ಮನದಿಂದ ಕೈ ಮುಗಿದು ಬೇಡಿದೊಡೆ

ಎಲ್ಲೋ ಮನವಿತ್ತು ಕೂಗಿದೊಡೆ ಬರಲಾರನು

ಗುರುರಾಯ ಸಖರಾಯಪುರದ ಮಹನೀಯನು|

                                                      

ನಡೆದಾಡುವ ದೇವನು ನಿನ್ನ ಎಲ್ಲಾ ನಡೆಯ ಬಲ್ಲನು

ಕಣ್ತಪ್ಪಿಸಿ ನಡೆಯದೇನು ಅವ ಎಲ್ಲಾ  ಬಲ್ಲ ದೇವನು|

                                             

ಅವಕಾಶವಾದಿಯಂತೆ ಭಕ್ತಿ  ತೋರಿದೊಡೆ ನಾನು

ಮರುಳಾಗಿ ಕರುಣಿಸನು ಎಂದೂ ನನ್ನ ಗುರುದೇವನು

ಪ್ರಚಾರ ಪ್ರಿಯನಲ್ಲ ನನ್ನ ಗುರು ಏನೂ ಬಯಸನು

ಅಡೆತಡೆಯಿಲ್ಲದೆ ಗುರು ಸದಾ ಸ್ವಪ್ರಕಾಶಿಸುವವನು|

ಏನೂ ಬಯಸದ ಗುರು ಇರುವುದೆಲ್ಲ ಕೊಡುವನು

ನಿನ್ನರ್ಪಣೆಯ  ಎಲ್ಲರಿಗೂ ಅವ ಸಮರ್ಪಿಸುವನು|

ಅರ್ತತೆಯ ಕೂಗಿನ  ನಿಜ  ಬಕುತನ  ಪ್ರಿಯ ಇವನು

ನಿಜಬಕುತನ ತಿದ್ದಿತೀಡಿ ಸದಾ ಸರಿದಾರಿ ತೋರುವನು

ಬೃಂದಾವನದಲಿ ನೆಲಸಿಹನು ನಮ್ಮೆಲ್ಲರ ದೇವನು

ಸಕರಾಯಪುರವೆಂಬ ಪುಣ್ಯ ಭೂ ವೈಕುಂಠದೊಳು|

ಗುರುನಾಥ ಗಾನಾಮೃತ 

ನೀ ಕಾಡಬೇಡವೊ ನೀ ದೂಡಬೇಡವೊ

ರಚನೆ: ಅಂಬಾಸುತ 

ನೀ ಕಾಡಬೇಡವೊ ನೀ ದೂಡಬೇಡವೊ

ನಾ ನಿನ್ನ ದಾಸನೊ ಸದ್ಗುರುರಾಯ ||ಪ||

ನಾ ಕಾಡುವೆ ನಾ ಬೇಡುವೆ

ನಿನ್ನಡಿಯನೆ ಸದಾ ||ಅ.ಪ||

ದೇಹಿ ಎನ್ನುತ ನಿನ್ನ ಕರುಣಾದಾಹಿಯಾಗಿ

ಬಂದಿಹೆನೊ ಬಳಲುತ ಭವದ ಮನೆಯಿಂದ

ಬರಿದಾದ ಈ ಮನದಿ ನಿನ್ನ ಮೂರುತಿ ತುಂಬಿ

ಸಲಹಯ್ಯ ಸಾಕೆನಗೆ ಬೇರೇನು ಬೇಡೆನೊ ||೧||

ಹೊಸಿಲ ದಾಟಿಸೊ ನಿನ್ನ ಮನೆಯೊಳಗೆ ಸೇರಿಸೊ

ಹಸಿದು ಬಂದಿಹೆನೊ ಹುಸಿಯನಾಡುತಲಿಲ್ಲ

ಭಕ್ಷ್ಯ ಭೋಜನ ಬೇಡೆ ಧನಕನಕ ಮೊದಲೇ ಬೇಡೆ

ದೊರೆ ನೀನು ದೀನ ನಾನು ಪ್ರೇಮದೀ ಹರಸೋ ||೨||

ಗುರುವಿರದ ಬಾಳೆಂದೂ ಹಾಳು ಗುಡಿಯಂತೆ

ಗುರುವಿದ್ದರೆ ಬೇರೇ ದೈವವೇ ಬೇಡವಂತೆ

ಗುರಿತೋರು ಬಾ ಗುರುವೇ ಘನತನದ ಅರಿವೆ

ಗುಣಪೂರ್ಣನಾಗಿಸೆನ್ನ ನಿನ್ನ ಸೇವೆಯ ನೀಡೀ ||೩||

ಸಖರಾಯಪುರವಾಸಿ ಸದ್ಗುರುನಾಥಾ

ಅಂಬಾಸುತ ಎಂದೂ ನಿನ್ನಯ ದಾಸ

ಅವನ ಈ ಮೊರೆಯ ಕೇಳಯ್ಯ ನಾಥ

ಕರುಣೆ ತೋರುತ ಕಾಯೊ ಸದ್ಗುರುನಾಥ ||೪||

ಗುರುನಾಥ ಗಾನಾಮೃತ 

ಹಾಸಿಗೆ ಹೇಸಿಗೆ ಎನಿಸಿದ ಮೇಲೆ

ರಚನೆ: ಅಂಬಾಸುತ 

ಹಾಸಿಗೆ ಹೇಸಿಗೆ ಎನಿಸಿದ ಮೇಲೆ

ಕಾಸಿಗೆ ಕಿಮ್ಮತ್ತು ಕೊಡದ ಮೇಲೆ

ಕನಸಿಗೆ ಕಾಲ ಕಳೆಯದ ಮೇಲೆ

ಏರುವೆ ನೀ ಮಾಳಿಗೆಯಾ

ಏರುವೆ ನೀ ಮಾಳಿಗೆಯಾ||

ಮರಣದಾ ಭಯವ ಬಿಟ್ಟ ಮೇಲೆ

ಮತ್ತಿನ ಮೋಹವ ಸುಟ್ಟ ಮೇಲೆ

ಮರೆಮಾಚದೆ ಎದಿರು ನಿಂತಾ ಮೇಲೆ

ಏರುವೆ ನೀ ಮಾಳಿಗೆಯಾ

ಏರುವೆ ನೀ ಮಾಳಿಗೆಯಾ ||

ಬದುಕ ಬಂಧನವೆಂದು ಭಾವಿಸದ ಮೇಲೆ

ಬರಡಿಗೆ ಕನಿಕರ ತೋರಿದ ಮೇಲೆ

ಭಾವಕ್ಕೆ ಪ್ರತಿಭಾವವ ನೀಡಿದ ಮೇಲೆ

ಏರುವೆ ನೀ ಮಾಳಿಗೆಯಾ

ಏರುವೆ ನೀ ಮಾಳಿಗೆಯಾ ||

ಅರಿವಿನಾ ಹಾದಿ ಹಿಡಿದಾ ಮೇಲೆ

ಆದಿಗೆ ಆದ್ಯತೆ ನೀಡಿದ ಮೇಲೆ

ಆತಂಕವೆಂಬುದ ತಳ್ಳಿದ ಮೇಲೆ

ಏರುವೆ ನೀ ಮಾಳಿಗೆಯಾ

ಏರುವೆ ನೀ ಮಾಳಿಗೆಯಾ ||

ಆನಂದವೆಂಬೋದೆ ಇಲ್ಲಿ ಮಾಳಿಗೆ

ಆನಂದ ರೂಪಿ ಗುರು ಇರುವ ಮಾಳಿಗೆ

ಅಂಬಾಸುತ ತಾನೇರಲು ಬೇಡಿಹ ಮಾಳಿಗೆ

ಗುರುಪಾದ ಕೃಪೆಯಿಂದ ಕಾಣುವ ಮಾಳಿಗೆ 

ಏರುವೆ ನೀ ಮಾಳಿಗೆಯಾ

ಏರುವೆ ನೀ ಮಾಳಿಗೆಯಾ ||

ಗುರುನಾಥ ಗಾನಾಮೃತ 

ಯಾವ ಸೇವೆಯ ಮಾಡಲಿ  ಗುರುವೇ ನಿನ್ನ ಪ್ರೀತಿ ಪಡೆಯಲು 

ರಚನೆ: ಆನಂದರಾಮ್, ಶೃಂಗೇರಿ  

ಯಾವ ಸೇವೆಯ ಮಾಡಲಿ  ಗುರುವೇ ನಿನ್ನ ಪ್ರೀತಿ ಪಡೆಯಲು

ಎಷ್ಟು ಮಾಡಿದರೂ ಸಾಲದು ನಿನ್ನ ಕರುಣೆ ದೊರೆಯಲು|

ಯಾವ ಹೂವ ಅರ್ಪಿಸಿ ಬೇಡಲಿ ನಿನ್ನ ಚರಣಕ್ಕೇ

ಮಾಲೆಯೋ ಬಿಡಿ ಪುಷ್ಪವೋ ಅರಿಯದಾದೆ ಗುರುವೇ"|

ಹೇಗೆ ಮಡಿ ಮಾಡಿ ಬರಲಿ ನಾನು ನಿನ್ನ ಸನಿಹಕೇ

ಮಲಿನ ಮನವ  ಶುದ್ಡಿ ಮಾಡಿ ಬರಲೇ ಗುರುವೇ|

ಉಟ್ಟ ಬಟ್ಟೆಯೊಳು ನಾ ನಿನ್ನ ಬಜಿಸಲೇ ಗುರುವೇ

ನಾರಿನ ಮಡಿಯ ಬಟ್ಟೆ ಎನ್ನ ಬಳಿ ಇಲ್ಲ ಗುರುವೇ|

ಫಲ ಪುಷ್ಪ ಸಿಹಿ ಹಣ್ಣು ತಾಂಬೂಲ ಬುಟ್ಟಿಯಲಿರಿಸಿ

ಪಂಚಾಮೃತ ಎಳನೀರು ಒಪ್ಪವಾಗಿಇಡುವೆ ಗುರುವೇ|

ಮಂತ್ರವಿಲ್ಲದೆ ಬರಿ ಮಂತ್ರಾಕ್ಷತೆಯಲಿ ಪೂಜಿಸುವೆ

ಆರತಿ ಮಾಡದೆ ಮನಧಾರತಿ ಬೆಳಗುವೇ ಗುರುವೇ|

ಇನ್ನು ತಡಮಾಡದೆ ನಿನ್ನ ದರುಶನವ ನೀಡು ಗುರುವೇ

ನಿನ್ನ ಅಶಿರ್ವಾದವೆ  ಎನಗೆ ತೀರ್ಥಪ್ರಸಾದ ಗುರುವೇ|