ಗುರುನಾಥ ಗಾನಾಮೃತ 

ಕಂಡೇ ಕಂಡೇ ಕಂಡೇ ನಾ ಗುರುವರನಾ

ರಚನೆ: ಅಂಬಾಸುತ 

ಕಂಡೇ ಕಂಡೇ ಕಂಡೇ ನಾ ಗುರುವರನಾ

ಗಣನೆಗೆ ನಿಲುಕದ ಮಹಿಮೆಯ ತೋರಿದವನಾ

ಗಂಗೆಯಂತೆ ಶಿಷ್ಯರ ಪಾಪವ ಕಳೆವವನಾ ||ಪ||

ಬಾಧೆ ಕಳೆವವನಾ ಭಕುತರಾ ಪಾಲಿನಾ ಭಾಗ್ಯದ ನಿಧಿಯಾ

ಬೋಧರೂಪನಾ ಶುದ್ಧಭಾವದಿ ಸೇವೆಯ ಮಾಡಿರಿ ಎಂದವನಾ ||೧||

ಸತಿ ಬೇಡಲು ಪತಿಭಿಕ್ಷೆ ನೀಡಿದವನಾ ಮಾತೆಯ ಬರಿದಾದ ಮಡಿಲಾ ತುಂಬಿದವನಾ

ಅನ್ನದಾನ ಹಿರಿದಾನ ಎಂದವನಾ ಪರರ ಚಿಂತೆಯ ಮಾಡದೆ ಬಾಳಿರಿ ಎಂದವನಾ ||೨||

ದಟ್ಟಿಯೊಂದನು ಸುತ್ತಿಕೊಂಡು ಕುಳಿವನಾ ದಿಟ್ಟ ನೋಟದಿ ಮುಗಳು ನಕ್ಕವನಾ

ಬಾ ಇಲ್ಲಿ ಎನ್ನುತ ಪಾದವ ತೋರಿದವನಾ ಮೂಢನ ಕರದೊಳೂ ಪದವಾಗಿ ನಲಿದವನಾ ||೩||

ಸಖರಾಯಪುರದೊಳು ಇರುವವನಾ ಸಖನಾಗಿ ಸಂತೈಸಿ ಪೊರೆವವನಾ

ಅಂಬಾಸುತನಾ ಅಂತರಂಗದಿ ಆನಂದ ರೂಪದಿ ಅನವರತ  ನೆಲೆಸಿಹನಾ ||೪||