ಗುರುನಾಥ ಗಾನಾಮೃತ 

ಕಲ್ಯಾಣಕಾರಣ ಸದ್ಗುರು ವಚನಾ

ರಚನೆ: ಅಂಬಾಸುತ 

ಕಲ್ಯಾಣಕಾರಣ ಸದ್ಗುರು ವಚನಾ

ಅದ ನಂಬಿ ನೀ ಸಲ್ಲಿಸು ನಮನಾ

ವ್ಯರ್ಥವಾಗಿ ಮಾಡಬೇಡ ಕಾಲಹರಣಾ

ಅದನೆಂದಿಗೂ ಒಪ್ಪನೂ ಪನ್ನಗಶಯನಾ ||

ನಿನ್ನ ಮನವಾಗಲಿ ಸತ್ಚಿಂತನೆಗಳ ಸದನಾ

ದೂರುವರೊಂದಿಗೆ ನೀ ಮಾಡಬೇಡಾ ಕದನಾ

ನಿನ್ನ ನುಂಗಲು ಹೊಂಚುಹಾಕಿಹನು ಮದನಾ

ಅದರಿಂದ ಪಾರಾಗಲು ಹಿಡಿ ಸದ್ಗುರು ಚರಣಾ ||

ಗುರುಭಕ್ತಿಯೊಂದೇ ಸಕಲಕೂ ಸಾಧನಾ

ಬಿಡದೆ ನೀ ಮಾಡು ಜ್ಞಾನ ಸಂಪಾದನಾ

ಧೃಡ ಭಕ್ತಿ ಒಂದೇ ಗುರು ಪಡೆವ ವಿಧಾನಾ

ಸಾತ್ವೀಕತೆಯೊಳಗಿರಲಿ ನಿನ್ನ ಪ್ರತಿಪಾದನಾ ||

ಗುರುವೆಂದರೆ ತತ್ವ ದೇಹವದು ಅಲ್ಲಾ

ಇದ ಸಾರಿದ ನಮ್ಮ ಸದ್ಗುರುವೇ ಎಲ್ಲಾ

ಅಂಬಾಸುತನಾ ಈ ಪದದೊಳಗೆಲ್ಲಾ

ಅವಧೂತನ ಕರುಣೆಯಾ ಕಾಣೋನಲ್ಲಾ ||