ಗುರುನಾಥ ಗಾನಾಮೃತ 

ವರವೊಂದ ನೀಡಯ್ಯಾ ಗುರುದೇವ

ರಚನೆ: ಶ್ರೀಮತಿ.ಶೈಲಜಾ ಕುಮಾರ್, ಮೈಸೂರು 

ವರವೊಂದ ನೀಡಯ್ಯಾ ಗುರುದೇವ

ಅಂಜಲಿಪಿಡಿದು ಬೇಡುತಿಹೆ ನಾನು

ವರವೊಂದ ನೀಡಯ್ಯಾ ಗುರುವೇ ||

ಮನದ ಬಿಂಬದಲಿ ನೀನಿಹೆ ದೇವ

ನೀನಿಲ್ಲದೆ ಗತಿಯಾರೆನಗೆ ಗುರುದೇವ !|

ಮನೋವಾಕ್ಕಾಯಗಳಲಿ ತುಂಬಿರಲಿ ನಿನ್ನ ಮೂರುತಿ

ಶಾಂತಮಂದಿರದಿ ನೆನೆಯಲಿ ನಿನ್ನ ಕೀರುತಿ || ೧ ||

ಕಂಗಳಲಿ ತುಂಬಿಹುದು ಆರ್ತತೆಯ ಕಣ್ಣೀರು

ಮನದಲಿ ಹರಿದಿಹುದು ಭಕ್ತಿರಸದಾ ಪನ್ನೀರು |

ನಿ‌ನ್ನ ಸೇವೆಧ್ಯಾನವೆಮ್ಮಯ ಉಸಿರಾಗಲೀ 

ನಿನ್ನ ಮಾತೇ  ಅನುಶಾಸನವಾಗಲೀ || ೨ ||

ಮೌನಮನವು ಕಾಯುತಿದೆ ನಿನ್ನ ವರವ 

ಅಂತರಂಗವು ಬೇಡುತಿದೆ ನಿನ್ನ ಕರುಣೆಯ |

ನಿನ್ನ ಮಹಿಮೆಯು ನಮಗೆ ಅಮೃತವಾಗಲೀ

ಸುಮಾರ್ಗದಿ‌ ನೆಡೆದು ನಿನ್ನ ಪಾದವ ಸೇರುವಂತಾಗಲೀ || ೩ ||