ಗುರುನಾಥ ಗಾನಾಮೃತ 

ಗುರು ನಿನ್ನ ಶ್ರೀಚರಣದಡಿಯೊಳೆನ್ನ ಮನ

ರಚನೆ: ಅಂಬಾಸುತ 

ಗುರು ನಿನ್ನ ಶ್ರೀಚರಣದಡಿಯೊಳೆನ್ನ ಮನ

ಸ್ಥಿರವಾಗಿ ನಿಲುವಂತೆ ನೀ ಹರಸಲೇ ಬೇಕೋ

ಎನ್ನ ನೀ ಕಾಯಲೇ ಬೇಕೊ ||ಪ||

ಹಣ ಕುಣಿದಾಡಿಹುದು ಹಸಿವ ಹೆಚ್ಚಿಸಿಹುದು

ಹುಚ್ಚು ಹಿಡಿಸಿ ಎನ್ನ ಬೀದಿಯೊಳಿಟ್ಟಿಹುದೋ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೧||

ಮಣ್ಣಿನ ವ್ಯಾಮೋಹ ಮಮತೆಯ ಮುರಿದಿಹುದೊ

ಮನ ಮನೆಯ ಮೂರು ಪಾಲು ಮಾಡಿ ಮೆರೆದಿಹುದೋ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೨||

ದೇಹದ  ದುಷ್ಟ ತೃಷೆಯು ಮನವಾ ಕೊಳೆಸಿಹುದೊ

ನಾರುತಿಹುದೊ ನಾಲ್ವರೊಳ್ ತಲೆ ತಗ್ಗಿಸುವಂತಾಗಿಹುದೊ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೩||

ಆರು ವೈರಿಗಳು ಹಾರಾಡಿ ಮೆರೆದಿಹರೊ

ನಿನ್ನ ಬಿಟ್ಟು ಆರನು ನಾ ಮೊರೆ ಹೊಕ್ಕಲೊ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೪||

ಹಿಡಿ ಅನ್ನ ಪುಟ್ಟ ಗೂಡು ಮಾನಮುಚ್ಚುವ ಬಟ್ಟೆ ಸಾಕು

ಬೆಟ್ಟವಾದರು ಸರಿ ನಾ ನಿನ್ನ ಧ್ಯಾನದೊಳಿರುವಂತೆ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೫||

ಶಕ್ತಿ ಬೇಡೆನು ನಾನು ಯುಕ್ತಿ ಬೇಡೆನು ನಾನು

ಮುಕ್ತಿಯ ಬೇಡಲು ಬಂದಿಲ್ಲ ನಾನೂ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೬||

ಅಂಬಾಸುತನಾ ಅತಿ ವಿನಯದಾ ಬೇಡಿಕೆ ಇದು

ಎನ್ನ ಮನಮಂದಿರದಿ ನೀ ಸ್ಥಿರವಾಗಿರುತಾ

ಗುರುವೆ ನೀ ಎನ್ನ ಕಾಯಲೇ ಬೇಕೊ ||೭||