ಗುರುನಾಥ ಗಾನಾಮೃತ 

ಬಾಗಿಲಲಿ ನಿಂತು ಒಳಗೆ ಬಾರದಿರುವುದು ತರವೆ

ರಚನೆ: ಅಂಬಾಸುತ 

ಬಾಗಿಲಲಿ ನಿಂತು ಒಳಗೆ ಬಾರದಿರುವುದು ತರವೆ

ಭಕುತರಾ ಭಾಗ್ಯದಾ ನಿಧಿ ಎಂಬಾ ಬಿರುದು ಪಡೆದಾ ಗುರುವೆ ||ಪ||

ಎನ್ನ ಬಹುಜನ್ಮದಾ ಪುಣ್ಯದಾ ಫಲದಿಂದ

ನೀನೆಗೆ ದೊರಕಿರುವೆ ಎನಗಾಗೆ ಬಂದಿರುವೆ

ಕಾರಣವ ಪೇಳದೆ ಕಣ್ಮುಚ್ಚಿ ನೀನಿಂದು

ಕಾದಿರುವ ಎನ್ನ ಮೇಲೆ ಕರುಣೆಯಾ ತೋರದೆ ||೧||

ಹಾತೊರೆದು ಹಂಬಲಿಸಿ ಹಲುಬುತಿಹೆನೊ

ನಿನ್ನ ಪಾದಪದುಮದ ಸೇವೆಗೆ ನಾ ಕಾದಿಹೆನೊ

ಅಣಿಗೊಳಿಸಿಹೆನೊ ಘಟವಾ ಪಕ್ವಗೊಳಿಸಿ ಮನವ

ಸೊಕ್ಕಾಡೊ ಅರಿಗಳನು ನಾ ದೂರ ತಳ್ಳಿದರೂ ||೨||

ಮಾತನಾಡಲೊಲ್ಲೆ ಏಕೆ ಮುನಿಸು ಎನ್ನಮೇಲೇಕೆ

ಒಳಗೆ ಬಾರದೆ ಪೋಪುದಾದರೆ ಇಲ್ಲಿ ಬಂದೆ ಏಕೆ

ಮತ್ತೆ ಕರೆಯೆನೊ ನೀನೀಗ ಹೋಗುವುದಾದರೆ

ಹಲವು ಬಗೆ ಆಸೆ ಹುಟ್ಟಿಸಿ ನೀರನೆರಚುತಿರುವೆ ||೩||

ಬೇಡಲು ಕರೆಯುತಿಲ್ಲ ಕಾಡಲು ಕರೆಯುತಿಲ್ಲ

ಕೊಳ್ಳಲೂ ಕರೆಯುತಿಲ್ಲ ನೀ ಎನ್ನೊಬ್ಬನಿಗೆ ಅಲ್ಲ

ತಾಯಿ ನೀ ಈ ಮಗನಾ ಮನೆಗೆ ಬಾರದಿದ್ದರೆ

ಕಂಡವರು ಕಂಡಕಂಡ ಹಾಗೆ ಮಾತನಾಡುವರು ||೪||

ಸಖರಾಯಪುರದಿಂದ ಬಂದಿರುವ ಗುರುವೇ

ಅವಧೂತ ಅಪ್ರಮೇಯ ಅನಂತ ನೀನಾಗಿರುವೆ

ಅಂಬಾಸುತನ ಈ ಮನ ಮನೆಗೆ ಒಡೆಯ ನೀನಯ್ಯ

ನೀ ಬಾರದಿದ್ದ ಮೇಲೆ ಅದಕೆ ಒಳಿವು ಇನ್ನೆಲ್ಲಯ್ಯ ||೫||