ಗುರುನಾಥ ಗಾನಾಮೃತ 

ಮುದ್ದುಪಾದವ ನೋಡುವ ಬಾರೆ

ರಚನೆ: ಅಂಬಾಸುತ 

ಮುದ್ದುಪಾದವ ನೋಡುವ ಬಾರೆ

ಸದ್ಗುರುನಾಥನ ದಿವ್ಯಪಾದವ ಕಾಣುವ ಬಾರೆ ||ಪ||

ಬೇಡದೇ ವರಗಳನೆ ನೀಡುವ ಭಾಗ್ಯದ ಗಣಿಯಂತಿರುವಾ

ಪರಮಪುರುಷ ಪರಂಧಾಮ ಪರಮೇಶ್ವರ ಅವಧೂತನಾ ||ಅ.ಪ||

ಸ್ವರ್ಗಸುಖ ಅಲ್ಲಿಹುದು ಕಾಣಮ್ಮ

ಸದ್ಗುರುನಾಥನ ಪಾದದೊಳಗೆ ಪಾಪವೆಲ್ಲಾ ಭಸ್ಮ ನೋಡಮ್ಮ

ಸರ್ವತೀರ್ಥಗಳಿಹವು ಅಲ್ಲಿ ಎಂದು ನುಡಿದಿವೆ ವೇದಶಾಸ್ತ್ರಗಳು

ಸರ್ವವಿಹಿತ ಧರ್ಮಗಳನು ಬೋಧಿಸುವ ನಮ್ಮ ಗುರುನಾಥನಾ ||೧||

ಆನಂದ ನಿಲಯ ಕಾಣಮ್ಮ

ಸದ್ಗುರುನಾಥನ ಪಾದದೊಳೆ ನಿಜಾನಂದವಿಹುದಮ್ಮ

ಅಹಂಭಾವವ ಅಳಿಸಿ ಸೋಹಂಭಾವವ ನೀಡುತಾ ಪೊರೆದು

ಸತ್ಸಂಗ ಸಾಮೀಪ್ಯ ಸಾಯುಜ್ಯ ನೀಡೋ ಗುರುವಿನ ||೨||

ಸಖರಾಯಪುರದೊಳಮ್ಮಾ

ಸದ್ಗುರುನಾಥ ನೆಲೆಸಿಹ ನೋಡಮ್ಮಾ

ಅಂಬಾಸುತನಾ ಪದಕೆ ಪ್ರೇರಣೆ ಈ ಗುರುಪಾದ

ಆತ್ಮದೊಳು ಅಡಿಯಿಟ್ಟು ಅಚಿಂತ್ಯನನ್ನಾಗಿಸೊ ಗುರುವಿನ ||೩||