ಗುರುನಾಥ ಗಾನಾಮೃತ 

ಸ್ತುತಿಸಲರಿಯೆನೊ ನಿನ್ನ ಗುರುವೆ

ರಚನೆ: ಅಂಬಾಸುತ 

ಸ್ತುತಿಸಲರಿಯೆನೊ ನಿನ್ನ ಗುರುವೆ

ಪಠಿಸಲರಿಯೆನೊ ನಿಮ್ಮ ಮಹಿಮೆ

ಕಪಟವಿಲ್ಲದೆ ನಿಮ್ಮ ಪೂಜಿಪ

ಮತಿಯ ಪಾಲಿಸಯ್ಯ ಗುರುವೆ ||ಪ||

ಸತಿಯು ಬೇಡಲು ಸೌಭಾಗ್ಯವಿತ್ತೆ

ಮತಿಹೀನಗೆ ಜ್ಞಾನವನಿತ್ತೆ

ಮೋಡಕೂಡಿಸಿ ಮಳೆಯ ಸುರಿಸಿ

ಜಲಕ್ಷಾಮವ ನೀಗಿಸಿದೆ ||೧||

ದೀನನನು ದೊರೆ ಎನಿಸಿದೆ

ದಾರುಣತೆಗೆ ನೀನು ಕರಗಿದೆ

ದಾರಿ ತಪ್ಪಿದ ಸುತರನೆಲ್ಲಾ

ಸರಿದಾರಿಗೆ ಕೊಂಡೊಯ್ದೇ ||೨||

ಪ್ರಾಣಕಂಟಕವಿರಲಿ ಪಾರು

ಮಾಡಿದಂಥ ಸಂಜೀವಿನಿ ನೀನು

ಸತಿಗೆ ಪತಿಯೆ ಪರದೈವಾ

ಎಂಬುದಾ ಅರುಹಿದೆ ಗುರುವೇ ||೩||

ಮುಷ್ಟಿಯಲಿ ಭಂಡಾರ ಹಿಡಿದೆ

ತೆಕ್ಕೆಯಲಿ ನಿಧಿಯನ್ನೆ ಇರಿಸಿಹೆ

ಅಕ್ಷಯದ ಅನ್ನಪೂರ್ಣೆಯನು

ಸದಾ ನೀ ಸ್ಮರಿಸಿದೆ ||೪||

ನಿನ್ನ ಲೀಲೆ ಕಾಣದವರ್ಯಾರೊ

ನಿನ್ನನು ಅರಿತವರು ಯಾರೊ

ಪ್ರತ್ಯಕ್ಷ ಪರಮೇಶ್ವರ 

ನೀನೇ ನೀನೇ ನೀನೇ ಪ್ರಭುವೆ ||೫||

ಸಖರಾಯಪುರಾಧೀಶನೇ

ಹೇ ಅವಧೂತನೇ

ಅಂಬಾಸುತನಾ ಪಿತನೇ

ಅರಿವಿನರಮನೆಯ ದೊರೆಯೇ ||೬||