ಗುರುನಾಥ ಗಾನಾಮೃತ 

ಅಣುವಿನೊಳಗೂ ನಿನ್ನ ಬಿಂಬವಾ

ರಚನೆ: ಅಂಬಾಸುತ 

ಅಣುವಿನೊಳಗೂ ನಿನ್ನ ಬಿಂಬವಾ

ಕಾಣುವ ಗುರುತರ ಭಾಗ್ಯವ ನೀಡೈ ಗುರುವೇ ||ಪ||

ಅರಿಯದೆ ಅಲೆದಿಹೆನೊ ಮರವಿನೋಳು ಸಿಲುಕಿಹೆನೊ ||ಅ ಪ||

ಸಗುಣರೂಪಧಾರೀ ನಿನ್ನ ಸನ್ನಿದ್ಧಿಯೊಳು

ಮನವೇಕೊ ನಿಲ್ಲದಾಗಿದೆ

ಮೂಢನ ಮಾತಿಗೆ ಮರುಳಾಗಿಹೆನಾ

ನಿನ್ನ ಕಾಣದೆ ಮಂಕಾಗಿಹೆ ನಾ ||೧||

ವಿಷಯದ ವಿಷಮ ವಿಷ

ಈ ಕಣ್ಣನು ಮಂಜಾಗಿಸಿದೆ

ಕೋಟಿಯೊಳು ಇರುವ ಲಕ್ಷ್ಯ

ಕರುಣಾಳು ನಿನ್ನನು ಮರೆಮಾಚಿದೆ ||೨||

ತೃಣ ನಾ ಮಹತ್ತು ನೀ

ದೀನ ನಾ ದಾನಿ ನೀ

ಬೇಡೋ ಕೈ ಎನ್ನದಯ್ಯಾ

ನೀಡೋ ಕೃಪಾಳು ನೀನಯ್ಯಾ ||೩||

ಸದ್ಗುರು ಸಖರಾಯಪುರಾಧೀಶ

ಅಂಬಾಸುತನಾ ಸರ್ವೇಶಾ

ಸರ್ವರೊಳೂ ಸಮಸ್ತದಲೂ

ನೀ ಕಾಣೋ ಗುರುದೇವಾ ||೪||