ಗುರುನಾಥ ಗಾನಾಮೃತ 

ಅಣಿಯಾದೆನು ನಾ ಗುರುಪೂಜೆಗೆ

ರಚನೆ: ಅಂಬಾಸುತ 

ಅಣಿಯಾದೆನು ನಾ ಗುರುಪೂಜೆಗೆ

ಅಣಿಗೊಳಿಸಿ ಎಲ್ಲಾ ಪರಿಕರಗಳನು||ಪ||

ದಿವ್ಯ ಸದ್ಗುರು ಧರಿಸಿದ್ದ ಪಾದುಕವಾ

ಭವ್ಯವಾದ ಬೆಳ್ಳಿ ಮಂಟಪದೊಳಗಿಟ್ಟು

ಸುತ್ತಲು ತುಪ್ಪದ ದೀಪವನಿಟ್ಟು

ಒಪ್ಪವಾಗಿ ರಂಗೋಲಿ ಬಿಟ್ಟು ||೧||

ಶುದ್ಧಗಂಗೆಯಾ ನೀರನು ತಂದೆ

ಪಂಚಾಮೃತ ಅಭಿಷೇಕಕೆ ಎಂದೆ

ನಾನಾ ಒಡವೆ ರೇಶಿಮೆ ವಸ್ತ್ರ

ನಾನಾ ಪುಷ್ಪ ತುಳಸಿ ಬಿಲ್ವಪತ್ರ ||೨||

ಧೂಪ ದೀಪ ಸಡಗರದಿಂದೆ

ಭಕ್ಷ್ಯಭೋಜ್ಯದಾ ನೈವೇದ್ಯವೆಂದೆ

ಏಕಾರತಿ ಪಂಚಾರತಿ ಮುಂದೆ

ನಾನಾ ವಾದ್ಯವ ಬಾರಿಸು ಎಂದೆ ||೩||

ಇಷ್ಟೆಲ್ಲಾ ಅಣಿಗೊಳಿಸಿ ಕುಳಿತೆ

ಗುರುಪಾದದಿ ಎನ್ನ ಚಿತ್ತವನಿಟ್ಟೆ

ಅರಿವಿನ ಗುರು ಆಗ ನಕ್ಕು ನುಡಿದಾ

ಅಹಂಭಾವ ಕಾಣುತಿದೆ ಎಂದ ||೪||

ನಾ ಇಹೆ ನಿನ್ನ ಮನಮಂದಿರದಿ

ನಾನಿಲ್ಲ ಆ ಬಾಹ್ಯ ಬಿಂಬದಿ

ಮಾಡೋ ಮಾನಸ ಪೂಜೆಯನು

ನಾನಾಗಲೇನೇ ಒಲಿಯುವೆನು ||೫||

ಬೇಕಿದು ಬಾಹ್ಯಪೂಜೆ ಮೊದಮೊದಲು

ಭಕ್ತಿಯ ಎನ್ನೊಳು ಸ್ಥಿರಗೊಳಿಸಲು

ಮೆಟ್ಟಿಲು ಏರುತ ಮೇಲಕೆ ಹೋಗಬೇಕು

ಅಕ್ಕ ಪಕ್ಕದ ಕಟ್ಟೆಯ ಹಿಡಿದಿರಬೇಕು ||೬||

ಇಂತೆಂದನು ಸದ್ಗುರುಮಹಾರಾಜ

ಮಾನಸಮಂದಿರವಾಸಿ ರವಿತೇಜ

ಅಂಬಾಸುತನೊಳು ಅರಿವಾಗಿ ನಿಂತು

ಬರೆಸುತ ಈ ಪದಪುಂಜಗಳಾ ||೭||