ಗುರುನಾಥ ಗಾನಾಮೃತ 

ಪರಿಹರಿಸೊ ಈ ಭವದಾ ಬಾಧೆಯನ್ನೂ

ರಚನೆ: ಅಂಬಾಸುತ 

ಪರಿಹರಿಸೊ ಈ ಭವದಾ ಬಾಧೆಯನ್ನೂ

ಬೇಡೆ ಇನ್ಯಾರನೂ ನೀನೇ ಗತಿ ಎನಗೇ ||ಪ||

ನಿನ್ನ ಹೊರತೆನಗೆ ಯಾರಿಲ್ಲ ಪ್ರಭುವೆ

ನೀನೇ ಆತ್ಮದ ಸಖನು ನೀನೇ ಸುಖದಾತನು||ಅ.ಪ||

ದೀನತನದಲಿ ನಿನ್ನ ಸನ್ನಿಧಿಗೆ ಬಂದಿಹೆನೊ

ಭವದ ಬಹು ಭಾರವನು ಹೊತ್ತು ತಂದಿಹೆನೋ

ಬಳಲಿಹೆನೊ ದೊರೆಯೋ ಬಾಳಲಾರೆನು ಹೀಗೆ

ಕರಿಯ ಕೆಳಗಿರುವಾ ಇರುವರಯಂತೇ ||೧||

ತಾಸಿಪ್ಪತ್ತು ದುಖಃ ನಾಲ್ಕೇ ತಾಸು ಸುಖ

ಆ ಸುಖವೊ ದುಖಃಕ್ಕೆ ಮೂಲವಾಗಿಹುದಯ್ಯ

ಸತಿಸುತರು ಸಿರಿ ಬಯಸಿ ಸೊರಗಿಹರು ಅಯ್ಯೋ

ಸೊಡಲ ಮುತ್ತಿಕ್ಕುವಾ ಪತಂಗದಂತಲೀ ||೨||

ಹರನ ನೆನೆಯದ ಜ್ವರವು ಹರಿನಿಂಧೆ ಹಲವು

ಕುಲಗುರುವ ಜಾಡಿಸಿದಾ ದೋಷದಾ ಬರವು

ದೇಹಿ ಎಂದವರಿಗೆ ಇಕ್ಕಾದ ಬಹು ಶಾಪವೂ

ಇದಕೆಲ್ಲ ಕಾರಣ ಈ ಭವಸಂಸಾರವೂ ||೩||

ಸಖರಾಯಪುರಾಧೀಶ ಶ್ರೀವೇಂಕಟಾಚಲ

ಅವಧೂತ ಅಸಾಮಾನ್ಯ ಅಪ್ರಮೇಯಾ

ಅಂಬಾಸುತ ನಾ ನಿನ್ನಡಿಯಲಿ ಬೇಡಿಹೆನೊ

ಈ ಕೋರಿಕೆಯ ಕೇಳೊ ಕನಿಕರಿಸೊ ಮಹರಾಯಾ ||೪||