ಗುರುನಾಥ ಗಾನಾಮೃತ 

ಅಚ್ಚರಿಯ ಭಾಗ್ಯವದು ನೀನರಿಯೊ

ರಚನೆ: ಅಂಬಾಸುತ 

ಅಚ್ಚರಿಯ ಭಾಗ್ಯವದು ನೀನರಿಯೊ

ಗುರುಪಾದ ಸೇವೆಯು ಅಚ್ಚಳಿಯದ ಪುಣ್ಯ ನೀ ತಿಳಿಯೊ ||ಪ||

ಕಲ್ಲುಸಕ್ಕರೆಯಚ್ಚ ಸವಿದಂತೆ

ರಸಾನುಭವವ ನೀನುಭವಿಸೊ ||ಅ.ಪ||

ಸ್ವಚ್ಚ ಮನದಲಿ ಅವನ ಕಾಲ್ಪಿಡಿಯೊ

ರಚ್ಚೆ ಮಾಡದೆ ಅಚ್ಚುತನ್ನ ಅವನೊಳಗೆ ಕಾಣೊ

ಹುಚ್ಚುತನವಿದು ಎನ್ನಬೇಡ ಹೆಚ್ಚು ಚಿಂತೆಯ ಮಾಡಬೇಡ

ಅಚ್ಚುಮೆಚ್ಚಿನ ದಿವ್ಯಮೂರುತಿ ಗುರುವರನ ನೀ ದೂರಬೇಡ ||೧||

ವ್ಯರ್ಥವಲ್ಲವೊ ಗುರುವಿನಾ ಸೇವೆ

ಬಹುತೀರ್ಥಯಾತ್ರೆಯ ಫಲವು ಇಹುದಿದರೊಂದರಿಂದಲೆ 

ಸ್ವಾರ್ಥ ಕೂಡಿದ ಅರ್ಥದಾಸೆಯ ಬಿಟ್ಟು ಗುರುಪಾದವನೆ ಹೊತ್ತು

ಕೃತಾರ್ಥನಾಗೊ ಧರ್ಮ ಮಾರ್ಗವ ತೋರೊ ಸದ್ಗುರುವ ನಂಬಿ||೨||

ವೈಭವದ ಆಡಂಬರವ ಬಿಟ್ಟೂ

ಮನ ಮಂದಿರದೊಳು ಗುರುಪಾದವನೇ ಇಟ್ಟು

ಸ್ಥಿತಿ ಗತಿ ಮತಿ ನೀನೇ ದೇವಾ ನೀನೆ ಎಮಗೆ ಮಹಾದೇವಾ

ಎಂದು ಮೊರೆಯಾ ಹೊಕ್ಕಿದಾಕ್ಷಣ ಹತ್ತಿರಕೆ ಬಂದು ಸಲಹುವನು ||೩||

ಸಖರಾಯಪುರದೊಳಿರುವವನಾ

ನಿಜಸುಖ ನೀಡುತಾ ಭಕುತರೆಲ್ಲರ ಪೊರೆದಿಹನಾ

ಅಂಬಾಸುತನ ಅಂತರಂಗದಿ ಆನಂದದ ರೂಪ ಧರಿಸಿ

ವೇಂಕಟಾಚಲನೆಂಬೊ ನಾಮದಿ ಹರಸುತಿಹ ಅವಧೂತನ ಸೇವೆಯು ||೪||