ಗುರುನಾಥ ಗಾನಾಮೃತ 

ಭಕುತಿ ನೀಡೊ ಗುರುವೇ ಭಕುತಿ ನೀಡೊ

ರಚನೆ: ಅಂಬಾಸುತ 

ಭಕುತಿ ನೀಡೊ ಗುರುವೇ ಭಕುತಿ ನೀಡೊ

ಭಕುತಿ ನೀಡೊ ಗುರುವೇ ಭಕುತಿ ನೀಡೊ||ಪ||

ಮುಕುತಿಗಾಗಲ್ಲವೋ ಶಕುತಿಗಾಗಲ್ಲವೋ

ವಿರಕುತಿಗಾಗಲ್ಲವೋ ವಿಶೇಷತೆಗಾಗಲ್ಲವೋ ||ಅ.ಪ||

ಸತ್ಯ ಸಚ್ಚಿದಾನಂದನೆ ನಿನ್ನನು ನಿತ್ಯವು ಭಜಿಸಲು

ಮಿಥ್ಯೆ ಅಳಿಸುವ ಬೋಧರೂಪನೆ ನಿನ್ನನು ನೆನೆಯಲು

ಹೆತ್ತ ತಾಯ್ತಂದೆಯಂತಿರುವವನೆ ನಿನ್ನನು ಸ್ತುತಿಸಲು

ಅಚ್ಚಳಿಯದ ಮನಮಂದಿರವಾಸನ ಅರ್ಚಿಸಿ ಪೂಜಿಸಲು ||೧||

ಅಂತರಂಗದ ಆತ್ಮಬಂಧುವೇ ನಿನ್ನನು ಅರಿಯಲು

ಆಗಮ ನಿಗಮ ಸ್ತುತಿಸಿದ ರೂಪನೆ ನಿನ್ನನು ಕಾಣಲು

ಅಜಹರಿಹರರು ಒಂದಾದ ನಿನ್ನ ಮೂರತಿ ಸ್ಪರ್ಶಿಸಲು

ನಿನ್ನ ನುಡಿಯೆಂಬಾ ಅನಂದಾಮೃತವನೆ ಸವಿಯಲು||೨||

ನಶ್ವರಕಾಯದಿ ಈಶ್ವರನಾ ಕಂಡು ಪುನೀತನಾಗಲು

ನಾ ನಿನ್ನೊಳಗೆ ಒಂದಾಗಿ ಸದಾ ನಲಿಯಲು

ಸಖರಾಯಪುರದಾ ಸದ್ಗುರುನಾಥನೆ ನಿನ್ನ ಸೇವೆಯೊಳಗಿರಲು

ಅಂಬಾಸುತ ನಾ ಅನವರತಾ ಸದ್ಗುರು ಎನುತಿರಲು ||೩||