ಗುರುನಾಥ ಗಾನಾಮೃತ 

ಆರತಿ ಮಾಡಿರಮ್ಮಾ  

ರಚನೆ: ಅಂಬಾಸುತ 

ಆರತಿ ಮಾಡಿರಮ್ಮಾ 

ಸದ್ಗುರು ಅವಧೂತ ಇವನಮ್ಮಾ  ।। ಪ ।।

ಸಖರಾಯಪುರದೊಳು ಘನರೂಪ ತಾ ಧರಿಸೀ 

ವೇಂಕಟಾಚಲನೆಂಬೋ ನಾಮದಿಂದಿರುವನಮ್ಮಾ  ।। ಅ.ಪ ।।

ಆರನ್ನು ಮೀರಿರಮ್ಮಾ ಆನಂದ ಹೊಂದಿರಮ್ಮಾ 

ಅಂತರಂಗದೊಳು ಅವನನ್ನ ಕುಳ್ಳಿರಿಸೀ 

ಅತಿಶಯ ಪ್ರೇಮದಿ ಅಚ್ಯುತ ನೀನೆನುತಾ ।। ೧ ।।

ಗುರುವಾಕ್ಯ ನೆನೆಯಮ್ಮಾ ಅದ ಬಿಡದೇ ಪಾಲಿಸಿರಮ್ಮಾ 

ಅರಿತರಿತು ಅರಿವಿನ ಆಲಯದ ಒಳಹೊಕ್ಕು 

ಜ್ಞಾನ ಕಾಮಹರ ಪರಮೇಶ್ವರನೇ ನೀನೆನುತಾ ।। ೨ ।।

ಮಾತು ಮುತ್ತಾಗಲಮ್ಮಾ ಮನಸೀನ ಮೌನವೇ ಹಿತವು 

ಮತ್ತೆ ಮತ್ತೆ ಗುರುಪಾದವ ನೆನೆನೆನೆದೂ 

ಜ್ಞಾನದಾಯಕ ವಾಣಿಪತಿಯೇ ನೀನೆನುತಾ ।। ೩ ।।

ಸತ್ಸಂಗ ಮಾಡಿರಮ್ಮಾ ಸಮಚಿತ್ತದಿ ಬಾಳಿರಮ್ಮಾ 

ಅಂಬಾಸುತನ ಅಂತರಂಗದೊಳಗೆ ನಿಂತೂ 

ಸತ್ ಚಿತ್ ಆನಂದವ ನೀಡುವ ಗುರುವೆನುತಾ ।। ೪ ।।