ಗುರುನಾಥ ಗಾನಾಮೃತ 

ದಾಸನಾನಾಗಿಹೆನಯ್ಯ ದಾರಿ ತೋರೋ ಗುರುವೇ 

ರಚನೆ: ಅಂಬಾಸುತ 

ದಾಸನಾನಾಗಿಹೆನಯ್ಯ ದಾರಿ ತೋರೋ ಗುರುವೇ 

ದೀನತನದಿ ನಿನ್ನಡಿಯನಾಶ್ರಯಿಸಿರುವೇ ||ಪ||

ಬಣ್ಣಬಣ್ಣದ ಜಗದೊಳು ಬಂಧಿಯಾಗಿಹೆನಯ್ಯಾ 

ಭಾವನೆಗಳ ಬೇಲಿಯೊಳು ಸಿಲುಕಿಕೊಂಡಿಹೆನಯ್ಯಾ 

ಬಿಡುವೆನೆಂದರೂ  ಬಿಡದಾ ವ್ಯಾಮೋಹವಿಹುದಯ್ಯಾ 

ಬಡತನವಾದರೂ ಸರಿಯೇ ಬಾಧೆಯಾ ಪರಿಹರಿಸಯ್ಯಾ ||೧||

ಕೆಟ್ಟ ಕುತೂಹಲದಾ ಕಷ್ಟ ನಿರಂತರಾ

ನಷ್ಟದಾ ಜೀವನಾ ಇಷ್ಟದೀ ಹಂಬಲಿಸೀ

ಉತ್ಕೃಷ್ಟ ಮತಿ ನೀಡ್ವ  ಉತ್ತಮೋತ್ತಮನಾ ಮರೆತೇ 

ಒಂದಿಷ್ಟು ಕರುಣೆಯ ತೋರೀ ಉದ್ಧರಿಸಯ್ಯಾ ಗುರುವೇ ||೨|| 

ಅವಗುಣಗಳನೆಣಿಸೀ ಅತೀಹೀನ ಎನ್ನದಿರೂ

ಆತಂಕ ಹೆಚ್ಚಿಸೀ ಅನ್ಯಾಯ ಮಾಡದಿರೂ 

ಸರ್ವೋತ್ತಮ ಸದ್ಗುರು ಕೃಷ್ಣ ಯೋಗೀಂದ್ರಾ

ಸಲಹಯ್ಯ ಸಾಹುಕಾರ  ಸೋತು ನಿನ್ನಡಿಯೊಳಿಹೆನೂ ||೩||