ಗುರುನಾಥ ಗಾನಾಮೃತ 

ಚಿಂತೆ ಮಾಡಬೇಡಾ ಮನುಜಾ

ರಚನೆ: ಅಂಬಾಸುತ 

ಚಿಂತೆ ಮಾಡಬೇಡಾ ಮನುಜಾ

ಚಿನುಮಯಾತ್ಮಕ ಗುರುವಿದ್ದಾನೆ||

ಚಿಂತೆ ಎಲ್ಲವ ಕಳೆಯುತ್ತಾನೇ

ಚಿತ್ತದೊಳಗೇ ತಾನಿರುತಾನೇ ||

ಹುಟ್ಟಿಸಿದವನು ಅವನಿದ್ದಾನೇ

ಅನ್ನ ವಸ್ತ್ರ ನೀಡುತ್ತಾನೇ

ಪಟ್ಟವಿರದಿದ್ದರೆ ಏನಂತೇ

ಕಡೇವರೆಗೂ ಕಾಯುತ್ತಾನೇ ||

ಕಷ್ಟವೆಂದೂ ಕೂಗೀ ಕರೆಯೇ

ಇಷ್ಟದಿಂದಾ ತಾ ಬರುತಾನೇ

ಕಷ್ಟ ಕಳೆದೂ ಅಭೀಷ್ಠ ನೀಡೀ

ಕಂಬನಿಯಾ ಒರೆಸುತ್ತಾನೇ ||

ಹೊನ್ನು ಮಣ್ಣು ಹೆಣ್ಣಿರದಿದ್ದರೂ

ಬದುಕಬಹುದೋ ಈ ಭುವಿಯೊಳಗೇ

ತಮವ ಕಳೆಯೋ ಗುರು ಸಿಗದಿದ್ದರೇ

ಸಾಗದಯ್ಯಾ ಬದುಕೂ ಮುಂದೇ ||

ಸೋಲು ಗೆಲುವು ಅಳುವು ನಗುವೂ

ಅವನ ಪಾದದಡಿಯಲ್ಲಿರಿಸೀ

ನೀನೇ ಗತಿಯೂ ನೀನೇ ಮತಿಯೂ

ಎಂದು ಅವನ ಬೇಡಿದ ಮೇಲೇ ||