ಗುರುನಾಥ ಗಾನಾಮೃತ 

ನನ್ನಾ ಗುರುವರನಾ ನೀವೇನಾದರೂ ಕಂಡೀರಾ 

ರಚನೆ: ಅಂಬಾಸುತ 

ನನ್ನಾ ಗುರುವರನಾ ನೀವೇನಾದರೂ ಕಂಡೀರಾ 

ನಗುಮೊಗದೀ ಭವಸಾಗರ ದಾಟಿಸುವಾ ನಾವಿಕನಾ 

ನೀವೇನಾದರೂ ಕಂಡೀರಾ

ನೀವೇನಾದರೂ ಕಂಡೀರಾ ||

ದಟ್ಟಿಯ ಉಟ್ಟಿಹನೂ ದಿಟ್ಟರೊಳೂ ದಿಟ್ಟನಿವನು

ದಿಕ್ಕು ಕಾಣದೆ ಬಂದಾ ಭಕ್ತಗೆ ಭಗವಂತನಾದಾ ||

ಭಸ್ಮಾ ಭೂಷಿತನೂ ಪಾಪಗಳಾ ಭಸ್ಮಾ ಮಾಡುವವನೂ

ಭಕ್ತಿ ಇಂದಲಿ ಬೇಡೇ ಬಿಡದೇ ಪಾಲಿಸುವವನಾ ||

ಕಲ್ಲೆದೆಯ ಒಳಗೆ ಮಲ್ಲಿಗೆಯ ಅರಳಿಸುವವನೂ

ಕರ್ಮ ಕಳೆದೂ ಧರ್ಮದ ಮಾರ್ಗಾ ತೋರುವವನಾ ||

ಪವಾಡ ಪುರುಷನಲ್ಲಾ ಧನದಾಸೆ ಮೊದಲಿಲ್ಲಾ

ಸತಿಸುತರಾ ಜೊತೆಗಿದ್ದೂ ನಾಲ್ಕಾಶ್ರಮ ಮೀರಿದವನಾ ||

ಕಣ್ಣೀರು ಒರೆಸುವವನಾ ಕರೆದೂ ಮುದ್ದಾಡುವವನಾ

ತಂದೆ ತಾಯಿ ತಾನಾಗೀ ಸಲಹುವ ನಿಜಬಂಧುವಾ ||

ತಮವಾ ಕಳೆಯುವವನಾ ತನ್ಮಯತೆ ನೀಡುವವನಾ

ಅಹಂಭಾವವ ಬಿಡಿಸೀ ಸೋಹಂಭಾವ ನೀಡುವವನಾ ||

ಭೇಧವ ಅಳಿಸೀದವನಾ ವೇದವ ತಿಳಿಸೀದವನಾ

ಶುಧ್ಧ ಭಾವವ ನೀಡೀ ಶಂಕರ ತಾನೆನಿಸಿದವನಾ ||

ವೇಂಕಟಾಚಲನೆಂಬೋ ನಾಮವ ಧರಿಸೀದವನಾ

ಶಾರದೆಯಾ ಮಡಿಲೊಳಗೇ ನಗುತಾ ಇರುವವನಾ ||

ಧರೆಯೊಳಗುತ್ತಮವಾದಾ ಸಖರಾಯಪುರದೊಳಗೇ

ಸಖನಾಗಿ ಸಂತನಾಗೀ ದೊರೆಯಾಗಿ ಇರುವವನಾ ||

ಅಂಬಾಸುತನಾ ಅನವರತ ಪೋಷಿಸಿ

ಅವನಂತರಂಗವಾ ತಿಳಿಗೊಳಿಸುವ ಅವಧೂತನಾ ||