ಗುರುನಾಥ ಗಾನಾಮೃತ 

ತಪ್ಪನ್ನು ಮನ್ನಿಸೋ ಗುರುರಾಯಾ

ರಚನೆ: ಅಂಬಾಸುತ 

ತಪ್ಪನ್ನು ಮನ್ನಿಸೋ ಗುರುರಾಯಾ

ಎನ್ನಪ್ಪ ನೀ ಕಾಯೋ ಮಹನೀಯಾ ||ಪ||

ಅರಿಯದಾದೆನೋ ನಿನ್ನಿರುವಿಕೆಯಾ

ಮರೆತು ನಾ ಗೈದೆ ಮಹಾಪರಾಧವಾ ||ಅ.ಪ||

ಧರ್ಮ ಮಾರ್ಗವ ಬಿಟ್ಟು ಅಧರ್ಮ ಮಾರ್ಗ ಹಿಡಿದೆ

ಧನಕನಕ ಕೂಡಿಡಲು ದಾರಿತಪ್ಪಿ ನೆಡೆದೆ

ತತ್ವ ಚಿಂತನೆ ಬಿಟ್ಟೆ ತುತ್ತಿಗಾಗಿ ಕಾಲ ಕಳೆದೆ

ಕಾಮಾದಿ ದಾನವರ ದಾಸನಾಗೀ ನಿಂತೆ ||೧||

ನಿನ್ನ ನಾಮ ಭಜಿಸಲಿಲ್ಲಾ ನಿನ್ನಾ ಕೀರ್ತಿ ಪಾಡಲಿಲ್ಲಾ

ನೀನೆಂಬುವವನಿಹೆ ಎಂಬುದನೆ ನಂಬಲಿಲ್ಲಾ

ನಿನ್ನ ಪಾದ ಸೇವೆಯ ಮಾಡಲಿಲ್ಲವೋ ಗುರುವೇ

ನಿನ್ನ ಪದ ವಾಕ್ಯಗಳ ನೆನೆಯಾಲಿಲ್ಲವೋ ಪ್ರಭುವೇ ||೨||

ತಂದೆ ತಾಯಿಯು ನೀನೇ ಬಂದು ಬಳಗವೂ ನೀನೇ

ಕಂದ ನಾನೆಂದು ಈಗ ಬಂದಿರುವೆನೋ ಗುರುವೇ

ಶಿಕ್ಷೆಯ ನೀಡಿಯಾದರೂ ರಕ್ಷೆಯ ನೀಡೋ ಪ್ರಭುವೇ

ನಿನ್ನಾ ಕಕ್ಷೆಯ ಒಳಗೆ ಎನ್ನಾನಿರಿಸೋ ದೊರೆಯೇ ||೩||

ಸಖರಾಯಪುರವಾಸ ಶ್ರೀ ಸದ್ಗುರುನಾಥಾ

ಎನ್ನಾ ತಪ್ಪನ್ನು ಮನ್ನಿಸೋ ಹೇ ಅವಧೂತಾ

ಒಪ್ಪವಾಗೀ ಅಪ್ಪಾ ನಿನ್ನಾ ಅಡಿಯಲ್ಲಿರುವೇ

ಅಂಬಾಸುತಗೆ ಕ್ಷಮೆಯನಿತ್ತೂ ಪೊರೆಯೋ ಗುರುವೇ ||೪||