ಗುರುನಾಥ ಗಾನಾಮೃತ 

ನೋಡಿದೆನು ನಮ್ಮಾ ಗುರುವರನಾ

ರಚನೆ: ಅಂಬಾಸುತ 

ನೋಡಿದೆನು ನಮ್ಮಾ ಗುರುವರನಾ

ನೋಡಿದೆನು ನಮ್ಮಾ ಗುರುವರನಾ

ಮನಬಾಗೀ ಬೇಡಿದವಗೇ

ಮೋಕ್ಷವನ್ನೇ ಕೊಡುವವನಾ ||ಪ||

ಮಾರ್ಗಶೀರ್ಷಾ ಕೃಷ್ಣಪಕ್ಷದಾ

ಷಷ್ಠಿಯಾ ಶುಭದಿನಾದಂದೂ

ಅವತಾರಾ ತಾಳಿದಾ

ಪೂರ್ಣಬ್ರಹ್ಮ ಭುವೀಶನಾ ||1||

ವೇಂಕಟಾಚಲನೆಂಬೊ ನಾಮವ

ಪೊತ್ತವನ ಧರೆ ಉದ್ಧರಿಸಿದವನಾ

ದೋಷವಿರದಾ ಭಕ್ತಿಪಾತ್ರನಾ

ಧಾರುಣಿಯ ಅವಧೂತನಾ ||2||

ಅದ್ವೈತವ ಸಾರಿದವನಾ

ಆನಂದವ ತೋರಿದವನಾ

ಚಿತ್ತದೊಳು ಬಂದು ನೆಲೆ ನಿಂತೂ

ವಿತ್ತಭ್ರಾಂತಿಯ ಕಳೇದವನಾ ||3||

ಸ್ವಪ್ನದೊಳು ಸಾಮೀಪ್ಯ ತೋರೀ

ಗುಪ್ತವಾಗೀ ಗ್ನಾನ ನೀಡೀ

ಸಪ್ತಜನ್ಮದ ಪಾಪ ಕಳೆದಾ

ಸಖರಾಯಾಧೀಶನಾ ||4||

ಧರ್ಮ ಮಾರ್ಗದಿ ನೆಡೆಯಿರೆನುತಾ

ಗುರುಪಾದವ ಪಿಡಿಯಿರೆನುತಾ

ಶುದ್ಧಭಾವದಿ ಬಾಳಿರೆಂದಾ

ದತ್ತನಾ ಅವತಾರಿಯಾ ||5 ||

ದಟ್ಟಿ ಉಟ್ಟೂ ದಿಟ್ಟನಾಗೀ

ಕಷ್ಟ ಹರಿಸಿದ ರುದ್ರನಾ

ಮುಗುಳುನಗುತಲಿ ಸನ್ನೆ ಮಾಡುತಾ

ದುಖ ನೀಗಿದ ಕೃಷ್ಣನಾ ||6||

ಆಷಾಡ ಬಹುಳಾ ಪಂಚಮಿಯದಿನ

ದೇಹವನ್ನೇ ತ್ಯಜಿಸಿದವನಾ

ಭಕ್ತೋದ್ಧಾರಕೆ ಅವತರಿಸಿದಾ

ಪರಬ್ರಹ್ಮ ರೂಪನಾ ||7||

ಅಂಬಾಸುತನಾ ಅಂತರಂಗದ

ಆತ್ಮಾರಾಮನಾ

ಸಖರಾಯಪುರವಾಸೀ

ಸದ್ಗುರುನಾಥನಾ ||8||