ಗುರುನಾಥ ಗಾನಾಮೃತ 

ನನ್ನತರಂಗದ ಹುಳುಕ ಹೆಕ್ಕಿ 

ರಚನೆ: ಅಂಬಾಸುತ 

ನನ್ನತರಂಗದ ಹುಳುಕ ಹೆಕ್ಕಿ 

ಹೊರಹಾಕದೆ ಪರರ ಅಂತರಂಗವ 

ಅರಿಯಲು ಹೊರಟ ನಾನೆಂತಾ ಮೂರ್ಖ ||

ಪರರ ತಪ್ಪುಗಳ ಜಾಲಾಡಿ 

ಹುಡುಕುವ, ನನ್ನ ತಪ್ಪಿನ ಮೇಲೆ 

ವಸ್ತ್ರ ಹೊದ್ದಿರುವ ನಾನೆಂಥ ಮೂರ್ಖ ||

ನನ್ನೊಳಗೆ ತಪ್ಪಿರದೆ ಪರರ 

ತಪ್ಪನು ನಾ ಹುಡುಕಲಾರೆ 

ಎಂಬುದನರಿಯದ  ನಾನೆಂಥ ಮೂರ್ಖ ||

ಕಣ್ಣೆದಿರಿಗಿರುವ ಕಡುಸತ್ಯವನು ದೂಡಿ 

ಸತ್ಯದಾ ಮುಖವಾಡದ ಮಿಥ್ಯೇಯಾ 

ಹಿಂದೆ ಬಿದ್ದಿರುವ ನಾನೆಂಥಾ ಮೂರ್ಖ ||

ಅರಿವು ನೀಡೋ ಗುರುವು ತಾನಾಗೆ 

ಬಂದಿರಲು ತೋರುಗಾಣಿಕೆಗೆ 

ಅವನ ಹಿಂದೆ ಬಿದ್ದಿರುವ ನಾನೆಂಥ ಮೂರ್ಖ ||

ಸತಿಸುತರ ನೋಯಿಸುತ ಹೆತ್ತವರ

ಪೀಡಿಸುತ ಗುರುವಿನಿಚ್ಚೆ ಎನುತ 

ಕುಳಿತಿರುವ ನಾನೆಂಥ ಮೂರ್ಖ ||

ಪತಿತ ತಾನಾಗಿಯೇ ಪರಮ 

ಪುಣ್ಯತಮನೆನುವ ಪೋಶಾಕು

ಧರಿಸಿರುವ ನಾನೆಂಥ ಮೂರ್ಖ ||

ಮನದೊಳಗೆ ಮನದನ್ನೆಯ ನೆನೆದು 

ಬಾಯೊಳಗೆ ಮಂತ್ರವ ಜಪಿಪ 

ನಾನೆಂಥ ಮೂರ್ಖ ||

ಜಗದಂಬೆ ಜಗದ್ಗುರುವಿನಾ 

ನಡುವೆ ಬೇಧವೆಣಿಸಿದ ಈ 

ಅಂಬಾಸುತ ಬಹುದೊಡ್ಡ ಮೂರ್ಖ ||