ಗುರುನಾಥ ಗಾನಾಮೃತ 

ವರ್ಣಿಸಲಸದಳನೋ ಗುರುವರ ನಿಜಾನಂದ ರೂಪನವನೋ

ರಚನೆ: ಅಂಬಾಸುತ 

ವರ್ಣಿಸಲಸದಳನೋ ಗುರುವರ ನಿಜಾನಂದ ರೂಪನವನೋ

ಆದ್ಯಂತರಹಿತಾ ಅಗಣಿತಗುಣ ಮಹಿಮಾ ಅನಂತ ರೂಪಾ ಅಪ್ರಮೇಯಾ ||ಪ||

ತಾಯಿಯ ಮಮತೆಯಂತೇ ಗುರುವರಾ ತಂದೆಯ ಪ್ರೇಮದಂತೇ

ತಪ್ಪುಗಳೆಲ್ಲವನ್ನೂ ತಿದ್ದಿ ಬುದ್ದಿ ಹೇಳುತಾ ಕೈ ಪಿಡಿದು ಮುಂದೇ ನೆಡೆಸುವ ನಮ್ಮ ಗುರು ||೧||

ನಿಜಸಖನ ಸ್ನೇಹದಂತೇ ಗುರುವರಾ ಪ್ರಿಯಸತಿಯ ಪ್ರೀತಿಯಂತೇ

ಕುಗ್ಗಿ ಕುಳಿತಾಗಲೆಲ್ಲಾ ಬಂದು ಹುರಿದುಂಬಿಸೀ ಎತ್ತರಕ್ಕೆ ಕರೆದೊಯ್ಯೊವ ನಮ್ಮ ಗುರು ||೨||

ಸುಮದೊಳಗಿರುವಾ ಸುವಾಸನೆಯಂತೇ ಮಧುವಿನೊಳಗಿನಾ ಮಧುರತೆಯಂತೇ

ಕಾಣದಿದ್ದರೂ ಕಲ್ಪನೆಗೆ ಸಿಗದಿದ್ದರೂ ಸೆಳೆದೂ ಸುಖವ ನೀಡುವಂಥಾ ನಮ್ಮಾ ಗುರು ||೩||

ಸಖರಾಯಪುರವಾಸನೋ ಗುರುವರಾ ವೇಂಕಟಾಚಲ ನಾಮನೋ

ಅಂಬಾಸುತಾದಿಯಾಗಿ ಅಂತರಂಗದ ಭಕ್ತರಿಗೆ ಆನಂದ ಆನಂದ ಆನಂದ ನೀಡೋ ಗುರು ||೪||