ಗುರುನಾಥ ಗಾನಾಮೃತ 

ಇನ್ನೂ ಬರದಿಹನೇಕೇ ಗುರುನಾಥಾ

ರಚನೆ: ಅಂಬಾಸುತ 

ಇನ್ನೂ ಬರದಿಹನೇಕೇ ಗುರುನಾಥಾ

ಎನ್ನ ಕುಟಿಲತನವ ಬಿಟ್ಟೂ ಕೂಗಿ ಕರೆದರೂ ||ಪ||

ಹಳೆ ಕಸವನೆತ್ತಿ ಹೊರಹಾಕಿಹೆನೂ

ಮಡಿಯುಟ್ಟು ಮನಮನೆಯಾ ಮಡಿಮಾಡಿಹೆನೂ

ಜ್ಞಾನ ದೀವಿಗೆಯಾ ಬೆಳಗಿಹೆನೂ

ಭಕ್ತಿ ಎಂಬ ರಂಗೋಲಿಯಾ ಇಟ್ಟಿಹೆನೂ ||೧||

ಗುರುನಾಮ ಸ್ಮರಿಸುತಾ ಮಣೆಯ ಹಾಕಿಹೆನೂ

ಗುರುಭಿಕ್ಷೆಗೆ ಎಂದೇ ಮನಫಲ ತಂದಿಹೆನೂ

ಆರತಿಗೆಂದು ಆನಂದದ ಸೊಡಲಿಟ್ಟಿಹೆನೂ

ಗುರುಸೇವೆಗೆಂದೂ ಈ ತನುವ ಕಾಯ್ದಿರಿಸಿಹೆನೂ ||೨||

ಸಖರಾಯಪುರವಾಸಾ ಶ್ರೀ ವೇಂಕಟಾಚಲ

ನಿಜಭಕ್ತಿಯಿಂದಾ ಕರೆಯೇ ಓಡಿಬರುವ ಮಹನೀಯಾ

ಬಾರಯ್ಯ ಬಾ ಕರೆವೇ ಬಾರೋ ಎನ್ನಪ್ಪಾ

ತೋರೋ ನಿನ್ನಯ ಪಾದಾ ಬಿಗಿದಪ್ಪಿ ನಾ ಪಿಡಿವೇ ||೩||